Komisaun C PN Sei Vizita Ró Haksolok, Bankada FRETILIN: Di’ak Liu Tan

Hatutan.com, (02 Jullu 2025), Díli- Parlamentu Nasionál liuhosi Komisaun C ne’ebé trata asuntu Finansa Públika sei halo estudu komparativu iha Nasaun Portugál durante semana ida, inklui planu ona vizita mós Ró  Haksolok.

Lee Mós: Ró Haksolok, Xanana: “Sé iha 2014 Ha’u Mak Asina Karik Ha’u Sei Responsabiliza”

Iha loron 28 fulan Novembru tinan 2023, Koordenadora Grupu Traballu bá Reforma Justisa, Lúcia Lobato hala’o vizita privada ida bá Figueira da Foz, Portugal hodi haree besik prosessu kontrusaun Ró Haksolok. Foto/dok. Lúcia Lobato.

Prezidente Komisaun C trata asuntu Finansa Públika, Deputada Cedelizia Faria dos Santos, Kuarta (02/07/2025), iha Parlamentu Nasionál, informa bainhira Parlamentu Nasionál tama bá resesu iha loron 15 fulan-Jullu 2025 maka Komisaun C foin bá halo vizita bá  Portugál no aproveita vizita Ró Haksolok.

“Ami nian atividade lubuk ida primeiru ami sei bá haree asembleia Parlamentu Portugál nian. Ami mós iha planu atu vizita bá Ro Haksolok,  ami atu haree, tanba gasta ona osan barak ba Ró Haksolok mós seidauk mai, tanba ne’e maka ami-nia planu ida mós ami sei bá halo vizita bá fatin ne’ebé  prodús Ró Haksolok,” Deputada Cedelizia Faria dos Santos informa bá jornalista sira.

Komisaun C sei halo mós reuniaun ho ekipa sira  Figueira de Voz  atu rona problema ne’e halo nusa bá oin  bele rezolve ka lae.

Membru Parlamentu Nasionál husi Bankada CNRT ne’e afirma Komisaun C mós haruka ona karta bá Portugál no sira informa ona katak Komisaun C sei bá vizita Ró Haksolok nia fatin

Iha fatin hanesan Xefe Bankada FRETILIN Aniceto  Lopes Guterres hateten, uluk Bankada FRETILIN rasik mós husu para atu halo auditoria kuandu Deputadu sira husi Bankada Governu kestiona bei-beik Ró Haksolok.

“Ami hatene buat hotu la’o hela, kestaun pagamentu maka seidauk kompletu, sé pagamentu kompletu ida karik oras ne’e Ro ne’e haksolok ona ita. Momentu ne’e Bankada FRETILIN rasik maka husu duni órgaun kompetente para halo auditoria bá Ro Haksolok. Agora sé komisaun C bá Portugal halo estadu komparativu aproveita vizita Ró Haksolok ne’e di’ak,” Deputadu Aniceto Guterres hateten.

Xefe Bankada FRETILIN apresia, tanba hanesan mós membru  Komisaun C, la’o estudu komparativu maibé aproveita estudu komparativu ne’e bá haree ka vizita Ró Haksolok iha fatin ne’ebé prepara hela.

“Ida-ne’e di’ak liután tanba programa ida-ne’e maka ha’u mós hakarak hola parte. Tantu laiha problema no di’ak liután bá Komisaun C, la’ós bá halo auditoria maibé bá haree rasik ho matan bá rona rasik problema ne’e iha ne’ebé,” Aniceto Guterres hateten.

Bá Ró Haksolok ne’e, governu prevee orsamentu inísiu millaun $13-liu no iha orsamentu 2020 nian aumenta tan millaun $14. 

Iha proposta Orsamentu Jeral Estadu (OJE) tinan fiskal 2023, Rejiaun Administrativu Espesiál Oé-Cusse-Ambeno (RAEOA) propoin tan orsamentu hamutuk millaun $120.

Husi total orsamentu ba RAEOA ne’e, millaun $84  utiliza ba administrasaun iha RAEOA no millaun $36 ba Fundu Espesiál ba Dezenvolvimentu (FED). Husi millaun $36 ba FED ne’e inklui rihun $32 ne’ebé sei aloka ba formasaun ba futuru tripulante Ró Haksolok.

Jornalista : Zita Menezes