PNTL Asegura Ema Nain-91 Hakat Fronteira Terrestre Bá Partisipa Graduasaun Arte-Marsiál

Hatutan.com, (09 Jullu 2025) Díli– Polísia Nasionál Timor-Leste (PNTL) liuhosi Unidade Patrullamentu Fronteira (UPF)  asegura ema na’in-91 bainhira hakat fronteira terrestre ho ilegál ba partisipa graduasaun iha Indonézia.

Lee Mós: UPF Prende Kombustivel Litru 245 iha Memo-Maliana

Portavós PNTL Superintendente João Belo dos Reis ne’ebé akompaña husi Komandante UPF Superintendente Euclides Belo, halo konferénsia imprensa iha Kuartél Jerál PNTL, Kuarta (09/07/2025). Foto/Juvinal Cabral dos Santos

Iha operasaun UPF nian ne’e prende mós sasan kontra nu’udár  evidénsia hanesan kilat manu (senapan angin),  animal  hanesan asu, ho mós atributu arte-marsiál nian.

Portavós PNTL  Superintendente João Belo dos Reis ne’ebé akompaña husi Komandante UPF Superintendente Euclides Belo, liuhosi konferénsia imprensa, Kuarta (09/07/2025), iha Kuartél Jerál PNTL, informa operasaun konjuntu husi ekipa sira ne’ebé destaka iha fronteira iha semana kotuk hodi bele identifika no monitoriza movimentu sidadaun sira ne’ebé  tama-sai iha liña fronteira terrestre nian, deteta no asegura abitante na’in-91 lori ho atributu arte-marsiál ho intensaun atu tuir graduasaun arte-marsiál nian iha Indonézia.

“Polísia mós prende osan kuaze $2,000.00 no prosesa ona ba Ministériu Públiku,” Superintendente João Belo dos Reis hateten.

Komadante UPF,  Superintendente Euclides Belo, hateten  kooperasaun ho servisu informasaun husi nasionál fó apoiu hamutuk autoridade liña fronteira kumpri misaun tomak  hodi garantia seguransa iha fronteira.

“Ba sira ne’ebé mak viola ita-nia regras nasaun nian, UPF la iha opsaun seluk foti medida tuir prosedimentu legal ne’ebé vigora,” Komadante UPF  Superintendente Euclides Belo hateten.

Jornalista: Juvinal Cabral dos Santos