Tribunál Deklara Inkonstitusionál Bá Sirkular Ministériu Saúde Bandu Profisionál Saúde Servisu iha Klínika Privadu

Hatutan.com (11 Jullu 2025), Díli—Tribunál Rekursu (TR) deside inkonstitusionál ba sirkulár Ministériu Saúde (MS)  nian ne’ebé bandu profisionál saúde Timoroan servisu iha klínika privadu.

Lee Mós: Sidadaun Sira Hatene Ona Halo Keixa bá PDHJ

PDHJ realiza konférensia immprensa, Sesta (11/07/2025). Foto/ Marcelino Tomae

Akórdaun Tribunál Rekursu nian ne’e bazeia ba pedidu fiskalizasaun abstrata ne’ebé hato’o husi Provedoria Direitu Umanu no Justisa (PDHJ, sigla portugés)  ba Tribunál Rekursu relativa ho sirkulár Ministériu Saúde nian ne’e.

Providoriu Direitus Hananu no Justisa, Virgílio da Silva Guterres “Lamukan”, Sesta (11/07/2026), liu hosi konferénsia imprensa, informa akordaun Tribunál Rekursu nian ne’e bele dehan katak médiku no profisionál saúde timoroan sira bele kontinua hala’o prátika privada hanesan baibain tanba Tribunál Rekursu deklara ona inkonstitusionál ba sirkulár MS nian ne’e.

Provedór hamutuk ho  nia adjuntu no adjunta sira, liuhosi konferénsia imprensa ne’ebé hala’o iha edifísiu PDHJ informa ba públiku, akordaun husi Tribunál Rekursu hodi hatán ba pedidu fiskalizasaun abstrata PDHJ hatama iha tinan 2025 kona-ba karreira profisionál saúde ne’ebé aprova liu husi dekretu lei númeru 13/2012, 7 de Marsu no alterada ho dekretu lei númeru 86/2022, 14 Dezembru.

Provedór Virgílio Guterres “Lamukan”  fundamenta katak norma sira ne’ebé Ministériu Saúde fó sai viola artigu-16 kona-bá universalidade no igualdade direitu, iha artigu-50 direitu ba  traballu ne’ebé haktuir iha konstituisaun-RDTL.

Tuir sirkulár ne’ebé Ministériu Saúde hasai ne’e proibidu ba Profisionál Saúde sira halo prátika iha klínika privadu sira iha tempu livre ka iha loron Sábadu no Domingu.

Tribunál konkorda katak norma sira ne’ebé Ministériu Saúde fó sai liu husi sirkulár ne’e inkonstitusionál. Tanba ne’e, PDHJ sujere ba profisionál saúde sira atu hatudu prestasaun servisu iha Ospitál sira, hodi nune’e, labele prejudika oras servisu nian nu’udar funsionáriu públiku iha instituisaun Estadu.

“Prátika iha privadu ne’e labele prejudika sira nia prestasaun servisu iha ospitál sira tuir oras servisu hanesan funsionáriu públiku nian no ba ida ne’e ami hein katak Ministériu Saúde tenke aplika mekanizmu  supervizaun atu kontrola,” Provedór Virgílio Guterres tenik.

Jornalista: Marcelino Tomae