INFPM Nafatin Fó Konfiansa Bá Sali-Magu Fornese Produtu Medikamentu

Hatuan.com, (17 Jullu 2025), Díli– Institutu Nasionál Farmásia no Produtu Medikamentu, Institutu Públiku   (INFPM, I.P sigla portugés) nafatin fó konfiansa bá kompañia Sali-Magu Unipesoal,Lda hodi fornese ai-moruk bá armajenamentu INFPM.

Lee Mós: FRETILIN husu MP Investiga MS ho Sali-Magu

Armazenamentu Medikamentu kompañia Sali-Magu, Unipesoal, Lda. Foto/Dok.Hatutan.com

Diretora Ezekutiva INFPM,I.P,  Paulina Mendonça Maher fundamenta katak kompañia Sali-Magu iha kompeténsia nu’udár Timoroan konsege ezekuta servisu ho di’ak tebes iha kontratu fornesimentu produtu medikamentu iha tinan 2024 ho montante orsamentu millaun $6.

“Kompañia Sali-Magu ne’e mós bainhira ita presiza urjente ruma nia hatama sasan ita ulun la moras, tanba ita kompra ai-moruk ne’e tenke ema ne’ebé iha responsabilidade hatama sasan tuir tempu duni,” Diretora Ezekutiva INFPM,I.P,  Paulina Mendonca Maher bá jornalista sira iha edifisiu INFP Kampu Alor, Kinta (17/07/2025).

Tuir nia avaliasaun durante  tinan ida-ne’e nia laran kompañia Sali-Magu Unipesoal,Lda hatama ai-moruk laiha problema, agora daudaun nia hatama ai-moruk sira mai tuir hela espesifikasaun ne’ebé INFPM fó bá.

“Ita haree ita nian kompañia lokál maka manan hatama sasan ida ne’ebé bele duni tuir kontratu ida ne’ebé boot duni ida-ne’e ita-boot sira buka tuir loos, ema ne’ebé iha kompañia internasionál sira manan projeitu iha Timor laran tomak ho montante boot ne’e imi la buka tuir tanba saida,” nia afirma.

Nia esplika sé kompañia sira hatama la tuir kontratu  INFPM  rezeita no sei fó xamada no penalidade 0,05% sira tenke hatama fila orsamentu ne’e bá kofre estadu.

Jornalista: Zita Menezes