Citilink ho Voo Denpasar-Dili Tun Emerjénsia iha Kupang, AACTL Seidauk Hatene Aviaun Nia Problema

Hatutan.com, (27 Jullu 2025), Díli— Aviaun komesiál Citilink ho destinu voo Denpasar-Dili, Domingu (27/07/2025), tun emerjénsia iha Aeroportu El Tari, Provinsia Kupang, Indonézia, tanba akontese fallansu tekniku balun.

Lee Mós: Citilink Hetan Insidente Ki’ik, Parafuzu 14 iha Wing Sai Bainhira Vou Husi Denpasar-Díli

Aviaun Citilink voo Denpasar-Dili enfrenta problema tekniku no tenke forsada ba tun emerjénsia iha Aeroportu El Tari, Kupang-Indonézia, Domingu (27/07/2025). Foto/Repro husi Facebook

Tuir orariu ka schedule normal, katak aviaun komersiál Citilink sempre tun iha Aerportu Internasionál Prezidente Nicolau Lobato, Dili, tuku 12:15 Otl, maibé iha oras refere la iha kontaktu husi Citilink mai Torre Kontrolu Tráfiku Aéreu (ATC) iha Aeroportu Internasionál Prezidente Nicolau Lobato, Dili, Timor-Leste.

Infomasaun ne’ebé Hatutan.com asesu katak aviaun Citilink ho númeru voo QG500 enfrenta fallansu tekniku, no forsada lori fila pasajeiru sira ba tun iha Aeroportu El Tari, Kupang, Timor Osidentál ka NTT (Nusa Tenggara Timur).

Pasajeiru sira obrigadu  tenke hein fali aviaun Citilink seluk husi Denpasar-Bali mai Kupang-NTT hodi substitui aviaun Citilink QG500  ne’ebé enfrenta fallansu tekniku.

Aviaun Citilink ne’ebé halo substituisaaun to’o fali ba Kupang mak tula hikas pasajeiru sira lori mai Dili, Timor-Leste no konsege tuun iha Aeroportu Internasionál Prezidente Nicolau Lobato iha tuku 08:02 kalan Otl no fila kedas ba Denpasar-Bali.

Bá fallansu ne’e Hatutan.com liuhosi telefonika konfirma Prezidente Auridade Aviasaun Sivíl Timor-Leste (AACTL-sigla portugés), Zezinho Gusmão, informa katak, nia parte foti ona medida hodi ejize responsavel  masímu aviaun Citilink hodi halo klarikasaun bá fallansu ne’e.

“Ha’u mós foin to’o mai iha ne’e,  ne’ebé ha’u buka hela Citilink sira,    maibé  seidauk iha ema  ida mai hasoru ha’u atu  klarifika loloos, maibé ha’u rona de’it  informasaun katak   aviaun Citilink ne’e bainhira  atu mai to’o iha Labuan Bajo nia leten, sira bá fali Kupang, maibé sira  seidauk informa mai  AACTL katak  Citilink hetan problema iha saída, sistema iha laran ka enjin,  nia falla ne’e iha ne’ebé,   sira seidauk infroma mai ami,”  Zezinho Gusmão hateten.

Nia dehan, pasajeiru sira balun lakon tikete tanba balun bá Reinu Unidu, balun bá fatin seluk, entaun ida-ne’e  Citilink tenke responsablidade tanba   pasajeiru sira  lakon ona sira nia osan.

Nia hateten, aviaun Citilink ne’ebé enfrenta problema tékniku ne’e  bá fali Kupang transfere pasajeiru sira bá aviaun Citilink seluk ne’ebé mai husi Denpasar-Bali hodi transporta tutan pasajeiru sira mai Timor-Leste.

“Ha’u haree sira mós tauk no kolen, ne’ebé ha’u atu konfirma ho Citilink para oinsá aban bele klarifiak bá pasajeiru sira,” prezidente AACTL ne’e hateten.

Kona-bá pasajeiru hamutuk nain hira,  AACTL seidauk  iha númeiru serteza tanba  ne’e responsabel Citilink tenke fó klarifikasaun no AACTL sei fó xamada bá responsabel Citilink hodi halo klarifikasaun bá aviaun ne’e nia problema.

“Ha’u agora iha ne’e, maibé sira seidauk mai hasoru ha’u,  tanba sira hetan reklamasaun husi  pasejeirus sira,  maibé ha’u sente triste tanba tuir loloos  na’in bá Citilink   mai AACTL atu rezolve pasajeiru balu nia reklamasaun,” Zezinho Gusmão afirma.

Nia preokupa, aviaun kuandu problema hanesan ne’e tuir loloos Citilink tenke informa bá AACTL hodi hatene tuir problema ne’e saída tanba AACTL maka halo rancing aviaun Citilink, onsá maka atu semo.

“Ami to’o agora lahatene problema ne’e saida. Ami husi AACTL akompaña  no haree sira nia ekipamentu, sira nia pesoál, sira nia pilotu, buat hotu di’ak, maibé ha’u hakarak hatene problema iha ne’ebé,” nia hateten.

AACTL sei  hapara Aviaun Citilink hodi halo manutensaun, tanba aviaun ne’e iha fallansu, no sira troka bá mai,  tanba momentu   ne’ebá sira chack  ne’e, aviaun di’ak  hela maibé tuir mai troka fali bá aviaun seluk.

Nia dehan, fallansu ida-ne’e amesa bá pasajeiru sira  husi rai-laran no pesoál VIP sira, tanba ne’e nia konsidera katak kazu ne’e seriu tebes tanba ne’e Citilink  presiza halo klarfikasaun.

To’o notisila ne’e públika  Hatutan.com seidauk  halo konfirmasaun ho responsabel  ka  reprezentante  Aviaun Citilink nian iha Timor-Leste.

Informasaun seluk ne’ebé iha katak fallansu ne’ebé Citilink enfrenta ne’e la’ós buat foun, maibé hanesan problema klásiku ne’ebé aviaun sira halo operasaun komersiál mai Dili sempre enfrenta. Tanba medida pista Aeroportu Internasionál Prezidente Nicolau Lobato nia badak purvolta  metru 1.800 deit  no tuir rekizitu mínimu pista aeroportu ba aviaun sira ho postura hanesan Airbus A320 presiza medida pista metru 2.500.

Tuir padraun téknika aeroportu nian katak bainhira pista ho medida ki’ik metru 1.800  obriga aviaun bainhira tuun tenke sukat ho kuidadu tanba risku boot  tebes no trava maka’as. Nune’e, aviaun nia roda bele mohu lalais no implika mós ba nia aviaun nia kondisaun tanba ne’e mínimu kada fulan-rua tenke manutensaun rotina.

Citilink hanesan kompañia aérea husi Indonézia, ne’ebé halo parte iha Grupu Garuda Indonézia. Citilink serve voo doméstiku sira iha Indonézia no rota rejionál sira balun, inklui Timor-Leste.

Aviaun komersiál Citilink koñesidu ho nia kódigu voo QG no hala’o voo inaugural mai Dili, Timor-Leste, iha loron 12 fulan-Maiu 2017, ho númeru voo QG7300.

Antes ne’e, husi fulan-Setembru 2015 to’o fulan-Janeiru 2017, Citilink hala’o operasaun rota Denpasar – Dili hanesan voo charter ne’ebé jere iha kolaborasaun ho kompañia aérea lokál ida iha Timor-Leste.

Fó hanoin fali katak iha loron 25 fulan-Jullu tinan 2022, Aviaun komersiál Citilink PK-GQE mós hetan insidente ki’ik bainhira hala’o operasaun ka voo husi Denpasar-Bali mai Dili-Timor Leste.

Kronolojia insidente ne’ebé haktuir husi pasajeiru balun katak bainhira aviaun ne’e semo to’o iha Illa Lombok nia leten derrepente parafuzu ka baut 14 haksoit sai husi parte  liras (wing).

Wing ka aviaun nia liras nu’udár superfície orizontál (permukaan horizontal) husi aviaun ne’ebé fó kbiit foti no rezulta aviaun bele semo.

Iha voo ne’e aviaun Citilink transporta pasajeiru hamutuk na’in-117 no tuir loloos loron ne’ebá kedas semo fila-fali bá Denpasar-Bali hodi transporta pasajeiru 137, maibé la konsege no tenke para kalan ida loron-rua iha Aeroportu Internasionál Prezidente Nicolau Lobato, Comoro, Díli, tanba insidente ki’ik ne’e.

Jornalista: Marcelino Tomae