Hatutan.com, (26 Jullu 2022), Díli-Aviaun komersiál Citilink PK-GQE hetan insidente ki’ik bainhira hala’o operasaun ka vou husi Denpasar-Bali mai Dili-Timor Leste, Segunda (25/07/2022).

Lee Mós : Inundasaun iha Aeroportu Comoro, Citilink “Hakdasak” Oras Ida

Internasionál Prezidente Nicolau Lobato, Díli, Segunda (25/07/2022). Foto/Hatutan.com

Kronolojia insidente ne’ebé haktuir husi pasajeiru balun katak bainhira aviaun ne’e semo to’o iha Illa Lombok nia leten derrepente parafuzu ka baut 14 haksoit sai husi parte  liras (wing).

Wing ka aviaun nia liras nu’udár superfície orizontál (permukaan horizontal) husi aviaun ne’ebé fó kbiit foti no rezulta aviaun bele semo.

Advertisement

Iha vou ne’e aviaun Citilink transporta pasajeiru hamutuk na’in-117 no tuir loloos loron ne’ebá kedas semo fila-fali bá Denpasar-Bali hodi transporta pasajeiru 137, maibé la konsege no tenke para kalan ida loron-rua iha Aeroportu Internasionál Prezidente Nicolau Lobato, Comoro, Díli, tanba insidente ki’ik ne’e.

Responsavel Citilink iha Timor-Leste, Fernando da Silva, klarifika katak, aviaun ne’e bainhira to’o iha Dili iha Segunda (25/07/2022), ho kondisaun hot-hotu la’o di’ak hela. Mais, depois tékniku halo inspesaun hatudu katak  iha aviaun nia liras (wing) iha baut ka parafuzu  balu mak laiha.

Tuir prosedura bá safety nian, pilotu labele semo fila-fali bá Denpasar, tanba nia tenke hetan aprovasaun husi Jakarta no horiseik hein to’o lokraik, desizaun seidauk tuun. Nune’e, pilotu ho ekipa  ninia oras servisu termina ona, entaun tuir nia rekizitu, kuandu oras servisu hotu ona, sira tenke fila ba deskansa.

Bá jornalista sira iha Aeroportu Internasionál Prezidente Nicolau Lobato, Díli, Tersa (26/07/2022), Fernando da Silva, esplika tuir regra tempu deskansa bá pilotu sira, tenke lori oras ualu (8) nia laran. Maibé, horiseik lokraik, bainhira pilotu sira atu fila bá deskansa iha otél, simu informasaun hosi Sentrál Citilink iha Jakarta, fó autorizasaun katak, bele semo fila-fali.

La’ós ne’e de’it, Fernando da Silva liu tun dehan, desizaun sira kona-bá aviaun ne’e bele semo fila-fali bá Denpasar, tanba Citilink servisu hamutuk ho Autoridade Aviação Cívil Timor-Leste (AACTL) ho Autoridade Nasional bá Aviasaun Timor-Leste (ANATL) no autoriza halo vou fila bá Denpasar iha tuku 11 liu Oras Timor-Leste (Otl).

Advertisement

“Agora daudauk iha ona Sumba nia leten. Kondisaun di’ak hela, pilotu kuandu dehan semo ona, signifika katak di’ak mak nia semo. Nia lori pasajeiru, nia la’ós aviaun mamuk,” Fernando konfirma tán.

Responsavel Citilink iha TL ne’e, esklarese katak, loos mosu fallansu hodi aviaun ne’e labele semo fila-fali bá Denpasar tanba parafuzu hamutuk 14 iha aviaun ninia liras (wing) mak ‘semo sai no lakon’.

“Informasaun kona-bá ne’e loos, mais iha kada aviaun ida mak mai, tékniku ida sempre tuir ka lae. No tékniku rezolve tiha ona ho situasaun ida ne’e. Safety ne’e di’ak hela, bainhira pilotu kuandu deside semo, signifika katak ne’e di’ak mak nia bele semo ne’e,” Fernando das Silva hateten tán.

Iha Tersa, 26 Jullu ne’e, maizumenus tuku 10 liu, Aviaun Citilink transporta fila pasajeiru sira hamutuk 120 resin husi Díli bá Denpasar. Tuir loloos ema na’in-137, maibé balu deside kansela. Pasajeiru sira ne’e, balu bá Jakarta no timoroan sira balu mak semo bá nasaun Europeia hodi transit iha Denpasar-Bali.

Hatutan.com tenta ona halo konfirmasaun bá insidente ki’ik ne’e ho AACTL, liu-liu ligadu seguransa aviaun nian bá pasajeiru sira, maibé responsavel másimu AACTL nian laiha fatin.

Advertisement

Jornalista: Rogério Pereira Cárceres