Membru PNTL ho Inisiál ASG Fasilita Hatama Sasán Kontra Bandu

Hatutan.com, (28 Jullu 2025), Díli–Membru Polísia Nasional Timor-Leste (PNTL) ida ho inisial ASG  fasilita  hatama sasán kontra liuhosi fronteira terrestre.

Lee Mós: Deskonfia, Pesoál Membru PNTL Na’in-haat Envolve iha Importasaun Fogete Ilegál

Sasán kontra bandu ne’ebé Polísia asegura. Foto/Juvinal Cabral dos Santos

Portavós  PNTL, Superintendente Polísia João Belo dos Reis, informa iha Domingu (27/07/2025), ekipa servisu konjunta identifika atividade kontra bandu balun iha fonteira  terrestre,  nune’e ekipa  halo operasaun no konsege asegura evidénsia ba atividade kontra bandu ne’e hodi aprezenta ba iha Ministériu Públiku (MP).

“Dadus sira ne’ebé mak Polísia iha  maka membru PNTL ida mós fasilita lori nia karreta ba tula sasán kontra bandu sira-ne’e, tanba saida mak nia ba? Tanba saida mak nia tula? Ida ne’e prosesu identifikasaun la’o hela,” Superintendente Polísia João Belo dos Reism informa ba jornalista sira iha Kuartél Jerál PNTL,  Segunda (28/07/2025).

Komandu PNTL sei aplika medida tuir  regulamentu disiplinar ho loke prosesu krimi  ba membru PNTL ho inisiál ASG ne’ebé envolve iha atividade kontra bandu ne’e.

Tuir Polísia katak aktu ne’ebé nia elementu komete ne’e bele konsidera no suspeitu sira ho insial hanesan ASG, AL, RP, no ITSR  iha hela sela detensaun polísia nian.

Ekipa konjunta identifika karreta rua ho marka Carry no Grand Max ne’ebe maka tula bebida  maka hanesan Coca-Cola hamutuk kaixa 132 kaixa ho total kalén 3168, Sprite hamutuk kaixa 126 ka kalén 3026 no Y.C one 1000 hamutuk no sasán kontra bandu sira seluk tan.

Sasán kontra bandu ne’ebé Polísia asegura. Foto/Juvinal Cabral dos Santos

Iha sorin seluk Ministru Interior Francisco Guterres hateten membru ida ne’ebé involve iha kestaun ilegal nia iha prosesu nia laran, prosesu kuandu hetan nia kulpadu nia fatin la iha Polísia.

“Ita la iha ema ida ne’ebé mak emvolve kualker atividade ilegál, se  nia Polísia, membru Polísia ida ne’ebé mak atribui ona kompetensia, estadu fiar hela  atu mai servisu serví estadu ne’e ho loloos no atu impoin Leí no ordem, regra ida ne’ebé mak atu impoin maibé nia mak imvolve fali hakarak ka  lakohi  tenke sai,”  Ministru Francisco Guterres afirma.

Ministru Interior hateten membru Polísia ne’ebé imvolve iha atividade ilegál ne’e tenke sai para hakarak haree fali Polísia ne’ebé profisionál no Polísia ne’ebé mak servisu duni tuir regra no tuir povu nian hakarak.

 Jornalista: Juvinal Cabral dos Santos