Porsentu 6,2 Estoke-Out Ai-Moruk iha Ospitál Referral Maubisse

Hatutan.com, (11 Agostu 2025), Ainaro-Diretór Ezekutivu Ospitál Referral Maubisse,  Virgílio Mendonça Pereira hateten, Ospitál Referral Maubisse daudaun ne’e enfrenta  estoke-out  ai-moruk porsentu 6,2 ka item 24.

Ospitál Referral Maubisse. Foto/Zita Menezes

“Medikamentu estoke  ai-moruk nia sei tama hela estandar tanba porsentu 6,2, kuandu  mais porsentu 10 maka dalaruma iha problema. Mais  durante tinan ida-ne’e nia laran iha fulan-Jullu ne’e estoke tama hela estandar normal signifika ai-moruk sira ne’e bele lori atende hela pasiente sira,” -Diretór Ezekutivu Ospitál Referral Maubisse, Virgílio Mendonça Pereira  informa bá jornalista sira iha Ospitál Referral Maubisse, Segunda (11/08/2025).

Iha fatin hanesan Diretora Servisu Apoiu Diagnóstiku Terapéutiku, Epifania José Moniz da Silva hateten, durante ne’e Unidade Farmásia sempre halo  pedidu estoke-out, maibé depende husi parte Farmásia Nasionál nian.

“Ami daudaun ne’e rejistu estoke-out hamutuk porsentu 6,2 ka 24 item, maka hanesan vitál esensiál no mós nesesáriu, ami sempre halo barter troka kona-bá ai-moruk sira ne’ebé maka laiha ami sempre esforsu no depende hotu bá farmásia nasionál no ami halo pedidu iha oin tolu maka regular, extra no mós emerjénsia,” Diretora Servisu Apoiu Diagnóstiku Terapéutiku, Epifania José Moniz da Silva, informa.

Nia afirma Ospitál Referral Maubisse dalaruma  halo transferénsia pasiente bá iha Ospitál Nasionál Guido Valadares (HNGV) tanba kauza husi estoke  ai-moruk no ekipamentu menus.

Nia hatutan kona-bá estoke ne’ebé maka Ospitál Referral Maubisse enfrenta durante tempu naruk maka hanesan  diazepam injesaun ho tán  konsumaveis, plástiku bá iha esterilinjeksi nian maka  durante 2024 to’o agora seidauk iha atu  esteril bá ekipamentu sira halo operasaun sira ne’e maka plástiku laiha. Maibé, ida ne’e la sai bareira ida no sira iha alternativu seluk maka uza fali APD no vistidu hodi kontinua halo operasaun bá pasiente sira.

Rejistu Inan Partu Hamutuk 522

Hahú husi fulan-Janeiru to’o fulan-Agostu tinan 2025 Ospitál Referral Maubessi rejistu inan partu ka bebé moris hamutuk na’in 522 kompostu husi partu normál 313, Vacon 23 no Cesarian 154.

Xefe Departamentu Ginecologia no Obstétriku iha Ospitál Referral Maubesse, Luizinha da Costa hateten, inan isin-rua ne’ebé mai halo tratamentu no partu ne’e lá’os Postu Maubisse de’it, maibé husi Munisípiu tolu, inklui mós Suai.

Nia tenik  husi númeru ne’e la iha inan maka lakon vida, maibé iha inan  ida mak ho idade ne’ebé mak menoridade.

“Ida obitu fetál ne’e katak bebé ida ne’ebé mak inan sira mai bebé mate tiha ona iha kabun laran, ne’e maka ohin 22 ne’e, ne’e mós la’ós Postu Maubesse de’it mai husi Munisípiu tolu, husi númeru ne’e  iha inan ida mak ho ida-ne’e menoridade ho idade tinan 15,” Luizinha da Costa ba Jornalista sira.

Nia informa inan sira ne’ebé mak partu la bele ka laiha forsa, médiku sira iha alternativu sira seluk mak uza mákina atu ajuda inan sira atu partu.

“Inan sira ne’ebé mai bee-manas fakar liu tiha ona oras rua, entaun kolega no sira bele halo ventonsa para dada sai bebé, agora kona-bá bebé sira ne’ebé mak prematura ne’e la barak ida kuaze na’in 20 ida hanesan de’it, maioria bebé moris normál,” nia hateten.

Ospitál Referral Maubisse iha totál profisionál saúde iha Departamentu iha maternidade hamutuk na’in-15 kompostu husi kontratadu na’in-haat no funsionáriu permanente hamutuk na’in -11.

Entretantu husi fulan Janeiru-Agostu Ospitál Referral Maubisse rejistu moras númeru aas maka moras respiratóriu.

Jornalista: Zita Menezes