Hatutan.com, (30 Abríl 2026) Díli–Membru Parlamentu Nasionál husi Bankada opozisaun FRETILIN, Antoninho Doutel Sarmento, alega Sekretáriu Estadu Komunikasaun Sosiál (SEKOMS), Expedito Dias Ximenes, simu subornu ba projetu tolu; prjetu rua iha RTTL no ida seluk iha CEFTEC.

Lee Mós: CAC Ajenda Ona Inspensaun Bá Projetu Edifisiu Sentrál RTTL,E.P

Sekretáriu Estadu Komunikasaun Sosiál (SEKOMS), Expedito Dias Ximenes

Liuhusi sesaun plenáriu Parlamentu Nasionál, Segunda, 24 Abríl 2026, Deputadu Antoninho Doutel Sarmento, hateten projetu sira ne’ebé SEKOMS halo adjudiukasuan direta ba kompañia sira ne’e to’o agora la hatudu progresu signifikativu.

Informasaun ne’ebé Deputadu Antoninho Doutel Sarmento, aprezenta iha plenária PN katak, projetu ida mak instalasaun estudiu multifunsaun Rádiu Televizaun Timor-Leste Empreza Públiku (RTTL,E.P) ho osan maizaumens  US$1,300,000.00 ba empreza BRANDITALL maibé to’o agora la iha progresu servisu.

Projetu ida tan, tuir Deputadu Antoninho Doutel Sarmento, ekipamentu produsaun bá  RTTL,E.P ho valór orsamentu US$350,000.00 no  projetu seluk mak iha Direção Centro Formação Técnica Comunicação (CEFTEC)  orsamentu totál US$300,000.00 bá empreza  ASME3

Reprezentante Povu ne’e  hatutan, projetu instalasaun estudiu multifunsaun RTTL,E.P ne’e deskonfia  halo ona  pagamentu 100%, maibé projetu la la’o no prejudika RTTL,E.P tanba to’o agora laiha  estúdiu  propriu ho kualidade no ijéniu.

Tuir nia, projetu sira ne’e halo ona pagamentu maibé  laiha  relatóriu komprovativu ruma , nune’e   tanba ne’e Deputadu Antoninho Doutel Sarmento deskonfia forte SEKOMS Expedito Dias Ximenes simu subornu husi empreza sira.

“Projetu hirak ne’e falla totál , deskonfia SEKOMS  keta simu buat ruma karik, ne’e mak kompañia sira servisu halimar loos ne’e?” Deputadu Antoninho Doutel Sarlemento hateten.

Sekretáriu Estadu Komunikasaun Sosiál (SEKOMS), Expedito Dias Ximenes, ne’ebé Hatutan.com, konfirma Kinta (30/04/2026), dezmente totál alegasaun husi membru Bankada opozisaun FRETILIN, Deputadu Antoninho Doutel Sarmento nian ne’e. Nia hateten, deklarasaun Deputadu Antoninho Doutel Sarmemento ne’e laiha ballnsu, sala ka bosok.

“Ne’e maka ha’u dehan, Parlamentu sala, Parlamentu sala, ha’u  dehan tiha ona bá ó, Parlamentu sala, tanba ne’e projetu RTTL,E.P nian,” SEKOMS Expedito Dias Ximenes  hateten hafoin partisipa diskusaun ezbosu revizaun  Lei Komunikasaun Sosiál iha Salaun  Sekretária Estadu Igualdade no Inkluzsaun (SEII)) iha  Caicoli, Díli.

Kona-bá Governu liu-husi SEKOMS   halo ajudikasaun direita  bá  Projetu tolu, SEKOMS Expedito Ximenes, konfirma katak  projetu iha RTTL, nia (Deputadu Antoninho Doutel Sarmento-red)   sala.

Iha  Tersa, 28 Abríl 2026,  Hatutan.com halo konfirmasaun  Prezidente  Grupo  Empreza BRANDITALL,  Themilina Kassiou,  liuhusi nia resposta eskrita haktuir katak kona-bá progresu projetu Instalasaun Estúdiu Multifunsaun ba RTTL, E.P. ho  orsamentu montante US$1,300.000, la loos.

Hatutan.com nafatin konfirma valór  orsamentu efetivu loloos ne’e hira, maibé, prezidente  Grupo  Empreza BRANDITALL,  Themilina Kassiou, informa ne’e segredu empreza nian tanba  relatóriu hothotu submete ona bá parte RTTL,E.P ho Sekretáriu Estadu Komunikasaun Sosiál (SEKOMS), Expedito  Dias Ximenes.

Nia afirma  katak, Empreza BRANDITALL manán projetu ida-ne’e liuhusi prosesu konkursu ne’ebé rigorozu no transparente ne’ebé administra hosi  Komisaun Nasionál Aproviszonamentu (CNA-sigla portugés) tanba  empreza BRANDITALL maka empreza úniku iha rai-laran ho kredensiál sira ne’ebé prova ezekuta servisu ida-ne’e.

“Alegasaun ida-ne’e kategorikamente falsu.  Empreza BRANDITALL simu pagamentu sei zero to’o ohin loron, seidauk simu, nein pagamentu ida. Tanba estúdiu ne’e harii tuir padraun internasionál ho ekipamentu espesializadu, ne’ebé konfigura tuir pedidu, no sei halo atualizasaun signifikativu bá infraestrutura antes ne’e ho kualidade la di’ak. Prazu sira kompletasaun nian iha ligasaun diretamente ho pagamentu iha projetu nia rohan,” nia hateten.

Kona-bá problema tékniku ka mudansa bá planu implementasaun  kauza bá atrazu tuir nia  laiha  problema, tanba planu implementasaun  ne’e la muda.

Nia afirma, durante  ne’e Empreza BRANDITALL Unipesoal Lda hala’o servisu ezekusaun projetu, hetan monitorizasaun ka avaliasaun husi SEKOMS  .

“BRANDITALL servisu besik ho tantu SEKOMS no RTTL durante ezekusaun tomak bá Projetu ne’ebé iha . Ami hatama ona relatóriu progresu formál sira, ne’ebé hotu-hotu hetan ona revizaun no aseitasaun,”  nia afirma.

BRANDITALL oferese ninia ekipamentu bá Estadu no públiku garantia bazeia ba pilár tolu, rekorde fornesedór iha rai-laran,   kolaborasaun besik ho SEKOMS no RTTL tuir kuadru relatóriu formál, no  kompromisu atu fornese servisu ho klase mundiál, padronizadu internasionalmente.

“Sé Informasaun  la bele públika, ami sei la fó sai, di’ak ita  boot sira bele husu RTTL ho SEKOMS tanba sira mak na’in bá projetu, ami lakohi viola termu kondisaun kontratu nian,” nia haktuir.

Xefe Aproviszonamentu RTTL,E.P, Levi Branco, ne’ebé konfirma liu husi  telefonika, Kuarta (29/04/2026),  hateten prosesu   aprovizionamentu  tomak, estrutura anteriór sira maka halo, nia seidauk simu relatóriu.

“Deskulpa, ha’u simu knaar ne’e iha fulan-Fevereiru ne’e,  prosesu  tomak iha Xefe ka Diretór anteriór nian,  ne’ebé ha’u seidauk bele fó komentáriu bá buat ida,” Levi Branco konfirma.

Nia informa mós katak tanba prosesu tomak ne’e hahú iha tinan 2025, to’o agora seidauk iha dokumentu  ruma  hodi  entrega bá  estrutura bá  aproviszonamentu atuál.

Kona-bá projetu rua ne’ebé  deskomfia  SEKOMS ho RTTL  halo  ajudikasaun  direita  bá empreza BRANDITALL Unipesoal Lda, ho Empreza  ASME3, maibé informa katak  relatóriu hothotu seidauk to’o nia liman.

“Dokumentu  no relatóriu sira ne’e seidauk to’o ha’u nia liman , maibé  kuandu iha ha’u nia liman ona ne’e ha’u haree didi’ak maka ha’u bele fó informasaun bá ita boot sira,”  nia tenik tan.

Jornalista: Marcelino Tomae/ Zita Menezes