Ekipa Selesaun Nasionál Feto Sub-16 Partisipa Jogu AFF Women’s Championship 2025

Hatutan.com, (15 Agostu 2025), Díli- Ekipa selesaun nasionál feto Timor-Leste Sub-16 sei ba partisipa iha jogu Federasaun Futeból ASEAN (AFF) Women’s Championship 2025 ne’ebé realiza iha Solo-Indonézia.

Lee Mós: Empreza Ti-Oan Fintech Apoiu $100,000.00 Bá Selesaun Nasionál Futeból Feminina

Iha serimónia despedida ba Selesaun Nasionál Feto Timor-Leste Sub-16 ne’ebé hala’o iha edifísiu Federasaun Futeból Timor-Leste (FFTL), Sesta (15/08/2025), treinadór prinsipál António Timotio Moreira da Silva, hateten selesaun nasionál Timor-Leste Feto Sub-16 foin ba dahuluk  ba tuir kompetisaun iha jogu AFF Women’s Championship 2025 ne’ebé realiza iha Solo-Indonézia.

Ekipa futeból selesaun nasionál feto sub-16 prontu partisipa ASEAN Women’s Championship Sub-16 tinan 2025 iha Solo-Indonézia. Foto/Marcelino Tomae

Hanesan treinadór,  António Timotio Moreira da Silva, hato’o agradese ua’in ba FFTL ne’ebé maka fó ona konfiansa hodi lidera Selesaun Nasional Feto Timor-Leste Sub-16, tanba ne’e nia parte mós husu atu atleta sira, liu-liu ba ekipa Sub-15 to’o Sub-17, atu aproveita didi’ak oportunidade ida-ne’e, hodi konvense nafatin FFTL nia fiar ba jogu sira iha etapa tuir mai.

António Timotio Moreira da Silva subliña mós katak, tarjetu ne’ebé ekipa tékniku no treinadór iha mak garante sei hatudu jogu ho di’ak no nia promote mós ba federasaun katak, jogadora sira ne’e sei esforsu no la lakon boot  liu iha taxa AFF Asia.

“Ha’u nia tarjetu maka ne’e, se lakon karik, la lakon ho pontu boot. Ne’e ha’u promote tiha ona, imi rona rasik se lakon karik ne’e la lakon boot, maibé ita foti oin, lakon boot ba mós ita nafatin foti oin, tanba ita maka primeira-vez sai ezemplu  hodi imi nia alin sira banati tuir,” António Timotio Moreira da Silva hateten.

Iha fatin hanesan, Ferelia Soares da Silva Soriano, hanesan jogadora ba ekipa selesaun nasionál Sub-16 hato’o agradese ba FFTL tanba bele fó ona oportunidade ba sira hodi bele ba kompete iha Asia no sira sei esforsu iha jogu ne’e rasik.

“Ha’u hanesan reprezentante husi kolega jogadora sira sub-16, hato’o obrigadu ba FFTL ne’ebé fó ona oportunidade ami, atu ba tuir kompetisaun iha Indonesia. Ami bele ki’ik oan hela, ami ba hasoru ema ne’ebé fíziku boot ami, ami sei esforsu iha jogu ne’e nia laran,” Ferelia Soares da Silva Soriano hateten.

Iha fatin hanesan Diretór tékniku FFTL, Gaspar Quintão hateten tuir observasaun tékniku durante ne’e jogadora sira esforsu duni, hakarak atu kompete selesaun ida ne’e no ikus mai jogadora hamutuk 23 mak selesionadu atu  partisipa iha taxa AFF iha nasaun viziñu Indonézia-Solo.

Ekipa feuteból selesaun nasionál feto sub-16. Foto/Marcelino Tomae

Ho prosesu ne’ebé iha parte FFTL entrega responsabilidade tomak ne’e ba jogadora sira nia kabas atu kompete ho ekipa sira iha rejiaun Asia. Maske nasaun ida ne’e, sei enfrenta dezafiu iha fasilidade infrastrutura sira ba treinu, maibé ida ne’e la sai bareira ba jogadora sira atu hatudu jogu ne’ebé maka di’ak durante semana ida iha Solo-Indonézia.

“Maske ita iha difikuldade nia laran, liu-liu infraestrutura hanesan kampu ba treinu, ita tenke esforsu buka ida ne’e, buka ida ne’ebá, imi nafatin treinu iha fatin ne’ebé la própriu hodi halo preparasaun. Tamba ne’e ho treinu sira ne’ebé iha bele ajuda ita nia preparasaun fíziku, tátika, téknika ba jogu sira ne’ebé ita sei ba kompete,” Gaspar Quintão hateten.

Adjuntu Sekretáriu Jerál FFTL, Fernando Baptista Xavier hateten ida ne’e hanesan esperiénsia dahuluk ekipa Sub-16 Timor-Leste nian atu ba joga iha kompetisaun ofisiál taxa AFF ne’ebé maka sei realiza iha Indonézia.

FFTL hakarak parabeniza jogadora sira ne’ebé selesionadu tanba bele hatudu ona abilidade jogu ne’ebé maka di’ak durante iha treinu sira.

Nia mós husu ba jogadora sira, kontinua mantein disiplina no responsabilidade durante kompete iha jogu AFF hodi tane ass dignidade nasaun nian liu-liu bandeira Repúblika Demokrátika Timor-Leste ne’ebé sosa ho ruin no ran.

“Relasiona ho ita nia partisipasaun primeira-vez, ida ne’e ha’u hakarak lori Federasaun Futeból Timor-Leste nia naran, hato’o parabens ba imi hotu, maibé hakarak mós hato’o ba ita-boot sira hotu, ida ne’e la’ós de’it hanesan oportunidade, maibé priviléjiu ba imi, mézmu imi nia idade sei ki’ik, maibé ida ne’e responsabilidade ba ita-boot sira, tanba ita ba ho ita nia selesaun nasionál Timor-Leste, katak ba ho Bandeira RDTL, bandeira ida ne’ebé maka ita nia eroi sira sosa ho ruin no ran. Tamba ne’e husu ba alin sira tenke foti, tane ita nia imajen RDTL ne’e,” Fernando Baptista Xavier hateten.

Tuir oráriu jogadora sira selesaun nasionál feto Timor-Leste Sub-16 sei arranka ba Solo-Indonézia, iha loron 18 fulan-Agostu, no sei hela iha ne’ebá durante semana ida, hodi kompete ho nasaun ASEAN sira seluk iha jogu rejionál ASEAN Women’s Championship Sub-16 tinan 2025.

Jornalista: Marcelino Tomae