Komandu PNTL Orienta Tránzitu Aplika Koima Ba Motorista Viola Kódigu Estrada

Hatutan.com, (18 Agostu 2025), Díli-Komandante Polísia Nasional Timor-Leste (PNTL) Munisipiu Dili, Superintendente Xefe Polísia Orlando Gomes, orienta Polísia Seksaun Tránzitu  atu aplika koima todan ba motorista sira ne’ebé viola kódigu estrada, liuliu hirak ne’ebé estasiona sira-nia transporte iha espasu trotoar leten.

Lee Mós: Polísia Tránzitu Prende Karreta Estadu 121 no Infratór sira Selu Koima $9000

PNTL sei aplika koima másimu ba motorista sira ne’ebé estasiona transporte la kumpre orden. Foto/Juvinal Cabral dos Santos

“Hakarak fó hatene katak iha ita-nia kapitál Díli ita-nia transporte barak, maibé ita-nia motorista sira ladún iha disiplina, tanba dalaruma estasiona  karreta la tuir iha sinais dehan labele para sira nafatin para no balun para iha trotoar leten, ne’e kontra ona regra kódigu tránzitu nian,” Superintendente Xefe Polísia Orlando Gomes informa ba jornalista sira iha Komandu PNTL Munisípiu Díli, Segunda (18/08/2025).

Komandu PNTL Munisípiu Dili hasai tan aviz no alerta dala ida tan ba iha motorista sira tomak ne’ebé kondús karreta iha Díli laran, tantu motór tenke estasiona  tuir sinais ne’ebé mak estabelese ona, labele estasiona transporte sira kontra sinais tránzitu tanba bele aplika koima,” nia hateten.

Motorista sira kuandu komete bei-beik tenke fó sansaun multa koima másimu ba sira,  atu nune’e, evita sira hatoman estasiona bei-beik transporte iha trotoar leten.

Parte Polísia liuhosi Unidade Tránzitu no Rodoviariu halo sosializasaun beibeik ona kona-ba kódigu estrada, maibé motorista sira kontinua viola ho avontade tuir sira ida-idak nia hakarak.

Jornalista: Juvinal Cabral dos Santos