Hatutan.com, (07 Janeiru 2024), Díli-Hosi fulan-Janeiru to’o fulan-Dezembru 2024, Polísia Nasionál Timor-Leste (PNTL) liuhosi Departamentu Tránzitu no Seguransa Rodoviáriu Nasionál, prende evidénsia liu-liu karreta sira estadu nian hamutuk 12  no aplika koima ka multa bá infratór sira hamutuk $9000-resin.

Komandante Departamentu Tránzitu no Seguransa Rodoviáriu Nasionál, Superintendenre Asistente Luís Costa halo konferénsia imprénsa iha Kuartel Jerál PNTL, Caicoli-Díli, Tersa (07/01/2025). Foto/PNTL

Komandante Departamentu Tránzitu no Seguransa Rodoviáriu Nasionál, Superintendenre Asistente Luís Costa, informa, alende prende karreta estadu nian, Polísia Tránzitu halo mós apreensaun transporta privadu  rihun 16-resin, no transporte públiku hamutuk rihun ida resin, inklui dokumentu sira.

“Evidénsia hirak ne’ebé Polísia Tránzitu prende ne’e hamutuk 121 karreta estadu, transporte privádu hamutuk 16,719, transporte públiku hamutuk 1634, no mós dokumentu sira ne’ebé mak polísia prende iha munisípiu 14 ne’e hamutuk 7990,” Komandante Luís Costa, informa bá jornalista sira liuhosi konferénsia imprénsa iha Kuartel Jerál PNTL, Caicoli-Díli, Tersa (07/01/2025).

Komandante Polísia Departamentu Tránzitu Nasionál nian ne’e informa prosesu bá karreta sira estadu nian ne’e hanesan baibain, tanba iha tinan kotuk sira hala’o servisu konjunta entre liña ministerial sira ne’ebé maka atribui tiha ona despaisu konjunta nian.

Liña ministerial sira ne’e mak hanesan, Comissão da Função Pública (CFP), Comissão Antí Corrupção (CAC), Instituto Gestão do Estado (IGE), Diresaun Nasionál Transporte Terrestre (DNTT), inklui PNTL nia Departamentu Tránzitu rasik.

Kona-bá Reseita ka Taxa

Komandante Luís Costa, informa mós kona-bá totál reseita no mós taxa hirak ne’ebé sira rekolla durante iha tinan 2024 nian  hosi komandu munisípiu 14 nian, rekolla liuhosi atividade patrullamentu, swipping no mós check-point hamutuk $764,705.00 Iha mós reseitas hosi Fronteira fatin tolu nian, (Batugade, Salele no Sakato), iha tinan ida 2024 nian  konsege kontribui taxas bá Kofre Estadu nian hamutuk $203,887.00

“Hosi total sira ne’ebé maka ita konsege hatama bá iha kofre estadu nian ne’e $968,592,000.00. Hosi hirak ne’e, iha mós infrasaun sira ne’ebé maka la konsege selu, ne’e pur-volta ema hamutuk 4487 infratór. Karik, mak ema sira ne’e konsege selu, polísia tránzitu hosi 14 munisípiu ne’e, bele hatama reseita bá kofre estadu nian ne’e pur-volta  millaun $1,”  Lúis Costa hateten.

Komparasaun koimas ne’ebé rekolla iha 2023 ho 2024 nian, tinan 2024 nian sa’e tanba iha tinan kotuk (2023) hetan de’it $822,29,000.00 tanba ne’e maka estatistikamente nia balansu bá tinan ida ne’e (2024) sa’e oitoan.

Reseita hirak ne’e rekolla barak liu ne’e mai hosi (1) Komandu Munisípiu Díli, (2) Tránzitu Seguransa Rodoviáriu, (3) Komandu Munisípiu Aileu, (4) Komandu Munisípiu Bobonaro, (5) ikus liu mak Komandu Munisípiu Ermera.

Jornalista: Rogério Pereira Cárceres