PNTL Koloka Ona Seguransa iha Resintu Parlamentu Nasionál

Hatutan.com, (03 Setembru 2025), Díli– Polísia Nasionál Timor-Leste (PNT) alerta (siap siaga) ka prontu nafatin kualker oras atu fó seguransa iha resintu Parlamentu Nasionál bainhira estudante sira halo manifestasuan kontra desizaun Estadu nian sosa karreta ba Deputadu sira hlao sira-nia serbisu.

Lee Mós: Mari Alkatiri: Deputadu Sira La’ós Sa’e Kuda Bá Halo Fiskalizasaun

PNTL koloka seguransa iha resintu Parlamentu Nasionál. Foto/Juvinal Cabral dos Santos

Iha Kuarta (03/09/2025), hale’u tuku 09:00  dadeer, membru Polísia Nasionál Timor-Leste (PNTL) husi Forsa Rezerva no mós  husi Batallaun Orden Públika (BOP)  kolokadu ona iha resintu Parlamentu Nasionál nian hodi fó seguransa bá Parlamentu Nasionál.

Komandante PNTL Munisípiu Díli, Superintendente Xefe Polísia Orlando Gomes, hateten to’o oras ida-ne’e PNTL Munisípiu Díli seidauk  simu pedidu kona-bá manifestasaun hasoru desizaun Parlamentu Nasionál (PN) sosa karreta bá Deputadu na’in-65.

“Polísia  Munisípiu Díli nafatin antesipa no  nafatin  fó seguransa iha Parlamentu Nasionál (PN), atu nune’e,  labele hamosu anárkizmu ruma iha Uma Fukun”  Superintendente Xefe Polísia Orlando Gomes haktuir bá jornalista sira iha resintu Parlamentu Nasionál, Kuarta (03/09/2025).

Informasaun ne’ebé estudante universidade sira alerta ona katak sira sei mobiliza manifestaun kontra Parlamentu Nasionál to’o bainhira PN retira sira-nia desizaun sosa karreta 65 ba membru PN sira iha tinan 2025 ne’e.

“Ita tenke disiplina bazeia ba regra ne’ebé mak vigora. Komandu Munisípiu Díli nafatin tau seguransa iha PN, atu nune’e, asegura situasaun  sira ne’e lao di’ak,” nia afirma.

Liuhosi konférensia imprensa,  Portavós Estudante Universitáriu Timor Lorosa’e (UTL), Natalizio Nunes,  afirma sira-nia parte kontra  desizaun polítika ne’ebé reprezentante povu iha uma fukun aprova orsamentu ho montante millaun $4.2 sosa karreta foun ba Deputadu na’in-65.

“Razaun sitada, mak ami Estudante Universitáriu Timor Lorosa’e (EUTL) ho nia abreviatura  lamenta tebes ka diskorda total bá politika PN nian ne’ebé atu sosa karreta luxu ho marka Prado bá Deputadu 65 tamba ita haree no observa polítika sosa karreta Prado bá deputadu sira la’os foin primeira-vez, maibe sai hanesan ona kustume ka kultura desde governasaun dahuluk to’o mai Nonu Governu,” Natalizio Nunes afirma.

Universitáriu  sira ne’e lamenta tanba la’ós sosa de’it karreta Prado, maibe simu subsídiu oioin no direitu regalia sira hanesan, osan bá manutensaun, alojamentu, laptop, tratamentu saúde, osan pulsa, subsidiu kombustivel no seluk tan ne’ebe privileizu tebes bá deputadu sira iha povu nia susar no terus ne’e.

Prezidente Repúblika Konkorda Sosa Karreta Ba Deputadu sira

Prezidente Repúblika, José Ramos-Horta

Prezidente Repúblika, José Ramos-Horta, konkorda sosa karreta bá membru Parlamentu Nasionál ka Deputadu sira hodi hala’o sira-nia servisu hanesan órgaun fiskalizasaun.

Prezidente Repúblika, José Ramos-Horta, Tersa (02/09/2025), afirma bainhira sosa karreta bá deputadu sira atu ikus mai sai Deputadu sira-nia privadu ne’e nia la konkorda, maibé sosa atu Deputadu sira utiliza bá nesesidade servisu tuir mandatu Deputadu sira-nian ne’ebé prevalese iha Lei no Konstituisaun RDTL, ne’e konkorda sosa.

“Bá ha’u ne’e la’ós problema prinsipál iha rai-ne’e nian, sé estudante sira hakarak kontribui maka’ás para hadi’a programa Governu nian ka orsamentu jeral estadu (OJE), di’ak liu haree bá estuda orsamentu hira bá viajen internasionál,” Xefe Estadu Ramos-Horta hateten ba jornalista sira iha Palásiu Prezindensiál.

Kona-bá Estudante ka akademiku sira, inklui sosiedade sivíl sira la konkorda ho programa sosa karreta bá Deputadu sira-ne’e, Ramos-Horta hateten, estudante sira-nia lamentasaun bá Deputadu sira atu sosa karreta ne’e la’ós foin ba-dahuluk, maibé beibik tiha ona. 

“Sé Deputadu sira mak sai na’in bá kerreta foun ne’e, ha’u la konkorda, sé atu entrega bá Parlamentu Nasionál depois kuandu sira presiza bá foho lori, ne’e klaru, sira iha direitu. Se lae, Deputadu sira hakarak bá halo fiskalizasaun ka monitorizasaun bá foho oinsá, nune’e bá ha’u la’ós problema boot ida. Ha’u lakohi lakon fali  tempu bá debate ida-ne’e,” Ramos-Horta hateten.

Jornalista: Juvinal Cabral dos Santos