Hatutan.com, (27 Agostu 2025), Díli- Sekretáriu Jerál Partidu FRETILIN Mari Alkatiri, sosa karreta ba membru Parlamentu Nasionál na’in-65 ne’e normal, importante mak tenke halo jestaun ho didiak.

Lee Mós: Parlamentu Nasionál Presiza Karreta Foun no Orsamentu Aprova Tiha Ona iha OJE 2025

Sekretáriu Jerál Partidu FRETILIN, Mari Alkatiri. Foto/Juvinal Cabral

“Talves  Deputadu na’in-65  ne’e maka aat liu iha mundu liu. Ita haree ministru sira ne’e troka karreta dala hira tinan ida. Sé bele Deputadu sira sa’e biskleta bá halo fiskalizasaun ka sa’e kuda karik halo fiskalizasaun, ka sira lalika bá halo fiskalizasaun, entaun saida maka sira atu lori mai plenária para dehan saida maka loos no saida maka sala,” eis Primeiru-Ministru Mari Alkatiri hateten bá jornalista sira iha nia edifísiu eis-titulár iha Farol, Díli, Kuarta (27/08/2025).

Fundadór RDTL ne’e sekunda atu Deputadu sira presiza karreta hodi bá halo fiskalizasaun, nune’e importante mak halo jestaun loloos bá karreta foun ne’ebé maka Parlamentu Nasional atu sosa.

“Agora Parlamentu Nasionál tenke define loloos karreta ne’e  mai  jestaun ne’e atu halo nusa ne’e maka importante, ita la’ós hanesan rai Austraáia,  ema to’o Deputadu la presiza ona karreta Estadu,” lider opozisaun ne’e afirma.

Jornalista: Zita Menezes