MP Hakle’an Hela Investigasaun Kazu Jogu Online no Online Scaming iha Otél Oe-Upu RAEOA

Hatutan.com, (19 Setembru 2025), Díli— Prokuradór Jerál Repúblika (PGR, sigla portugés),  Nelson de Carvalho, informa Ministériu P’ubliku liuhosi prokuradór titulár  halo hela investigasaun kle’an  bá kazu jogu online  no online scamming  iha  Otél Oe-Upu, Rejiaun Administrativu Epesiál Oé-Cusse Ambeno (RAEOA).

Lee Mós: Kazu Jogu Online iha Otél Oe-Upu, Tribunál Aplika Prizaun Preventiva Ba Arguidu sira

Prokuradór Jerál Repúblika, Nelson de Carvalho. Foto/Marcelino Tomae

Bá jornalista iha Palasíu Prezidensiál, Sesta (19/09/2025),  PGR Nelson de Carvalho, hateten, Ministériu Públiku iha prinsipiu hein partisipasaun husi Polísia Sientifika Investigasaun Kriminál  (PCIC-sigla portugés), hanesan órgaun  ne’ebé hato’o informasaun, maibé kodigu penál garante katak jogu ilegál ka fortuna, sei halo investigasaun tuir lei.

“Hanesan ita-boot jornalista sira hatene ona katak iha Oé-Cusse, sidadaun estranjeiru ne’ebé tama iha prizaun preventivu sei la sai livre tanba prosesu sei bá oin, Prokuradór titulár sei halo investigasaun kle’an  bá kazu jogu online ne’e ,” PGR Nelson Carvalho hateten.

PGR nia parte konsidera Prezidente Repúblika nia preokupasaun,  kona-bá kestaun jogu online, hakiak krime organizadu sira, tanba ne’e nia alarga bá invetigasaun tenke kle’an liután.

PGR  rasik  mós  akompañia  informasaun sira kona-bá jogu online  iha media, no ONU mós  koloka  asuntu krime organizadu, nune’e  tenke haree ho prova sira ne’ebé tenke forte.

“Temi ema ida-ne’e ida-ne’ebá mais  ita haree bá hanesan entre aspas hela,  ka mosu pergunta boot, seraké  sira iha faktu  ne’ebé  maka bele determina  katak  ema sira ne’e inklina emidiatamente  para atu lori mai ka lae,  sé lae ita ko’alia de’it hanesan de’it , ita sunu de’it, ita provoka de’it para ema atu  ko’alia espikulasaun oioin,” PGR  Nelson Carvalho  hateten.

Nia subliña, Ministériu públika   hein partisipasaun husi rezultadu investigasaun ninian,  tanba   nia  haree jogu barak la halimar, nune’e halo  oinsá  haree atu kombate  krime organizadu, maka tenke investiga didi’ak jogu online sira ne’ebé loke iha Timor-Leste laran tomak.

Tribunal Judisiáriu Primeiru Instánsia Oé-Cusse (TJPIO) aplika medida koasaun prizaun preventiva arguido sira ne’ebé deskonfia envolve iha jogu online iha Otél Oe-Upu, Rejiaun Administrativu Epesiál Oé-Cusse Ambeno (RAEOA).

Tribunál nia fundamenta haree bá kazu ida-ne’e iha indísiu forte ida, katak arguida ida ho arguidu na’in-lima komete krime ne’ebé mak konsidera jogu ilegál no mós burla informátika.

Rezultadu operasaun iha Otél Oe-Upu RAEOA husi PCIC  ho SNI,  Segunda kalan to’o Tersa, 25-26 fulan-Agostu 2025, knsege halo apreensaun ba ekipamentu ne’ebé fasilita jogu online no online scamming, inklui  Desktop hamutuk 86, Laptop 13, Telemovel 194, asesu oioin Wifi ida (1),  Starlink rutel rua (2) no sim Card  135   husi operador balun iha Timor laran.

Halo mós aprensaun bá iha  krime burla informátika  ne’e maka hanesan Desktop 54, Laptop haat (4), headphone  54, asesu poin, telemovel 44,  mákina sura osan ida (1),  no mós inpesor ida.

Suspeitu na’in 10 ne’ebé PCIC ho SNI halo detensaun    kompostu husi sidadaun estranjeiru ho nasionalidade Xina nain-ualu (8),  Indonéziu na’in-ida ho sidadaun Malázia na’in-ida ne’ebé  aprezenta bá Ministériu Públiku.

Liuhosi audénsia primeira interrogatóriu iha Tribunal Judisiáriu Primeiru Instánsia Oé-Cusse (TJPIO) aplika medida koasaun prizaun preventiva arguido sira ne’ebé envolve iha jogu online iha Otél Oe-Upu, RAEOA.

Arguido sira ne’e kompostu husi arguidu na’in-lima no arguida na’in-ida mesak sidadaun estranjeiru, kompostu husi na’in-tolu ho nasionalidade Xina, na’in ida (feto) ho nasionalidade Nepal, no na’in-ida seluk ho nasionalidade Indonézia.

Jornalista: Marcelino Tomae