Justisa & Krime
PM Xanana: “Sé iha Membru Governu Envolve Jogu Online Fó Naran Mai Ha’u”
Hatutan.com, (24 Setembru 2035), Díli– Primeiru Ministru (PM), Kay Rala Xanana Gusmão hateten, parte ruma iha identidade membru Governu ne’ebé envolve iha jogu online ka rede mafia transnasionál fó naran ba nia.
Primeiru-Ministru (PM) Kay Rala Xanana Gusmão . Foto/Juvinal Cabral dos Santos
“Sé dehan membru Governu balun envolve iha jogu online ne’e, membru Governu sé, fó naran mai ha’u, hatama Servisu Nasionál Intelijénsia (SNI) lori bá Ministériu Públiku,” PM Xanana Gusmão hateten hodi responde jornalista sira iha Portu Dili, Kuarta (24/09/2025).
Xanana mós hateten nia sei lori isu membru Governu ne’ebé deskonfia envolve iha jogu online ne’e iha reuniaun Konsellu Ministru iha semana ne’e atu husu tuir malu.
“Aban ka bairua ami iha Konsellu Ministru mak ami ko’alia kona-bá ida-ne’e,” Xanana hateten tán.
Kona-bá jogu online ne’e, PM Xanana simu kontaktu oioin husi parte Migrasaun, Polísia Nasionál Timor-Leste (PNTL) no Servisu Nasionál Intelijénsia (SNI) no sé ema sira ne’e iha informasaun loloos bele aprezenta bá Ministériu Públiku ka kaer oho sira ka bá tau iha kadeia.
“Ha’u nu’udar Primeiru-Ministru ha’u buka akompañia problema barak, trafiku umanu mós ha’u simu kontaktu husi Migrasaun, Polísia Nasionál Timor-Leste (PNTL) no husi Servisu Nasionál Intelijénsia, ami haree hela no buka hela atu haree buat sira ne’e hotu kona-bá jogu sira ne’ebé imi jornaslista temi-temi sira ne’e,” Xefe Governu ne’e hateten.
Jornalista: Marcelino Tomae