Eufrasia Vieira Lansa Parfume Euphrates Ba Timor-Leste

Hatutan.com, (27 Setembru 2025), Díli– Eufrasia Vieira, Sábadu (27/09/2025), iha Otél Timor, lansa ba públiku Timor-Leste parfume foun Euphrates ho tema “O ritual de vestir uma fragrância”.

Iha nia lia-menon lansamentu parfume Euphrates ne’e, feto maluk potensiál Eufrasia Viera enkotaza Timoroan hotu  labele tauk atu monu, koko buat hotu hodi hakat tuir faze ida ba susesu.

Eufrasia Vieira, lansa ba públiku parfume foun Euphrates iha Otél Timor, Sábadu (27/09/2025). Foto/Juvinal Cabral dos Santos

“Susesu ne’e la’ós  instantaneu (instan), se o hakarak halo negosiu mak susesu kedas iha fulan ida ka fulan rua. Entaun nia susesu, maibé nia bele monu fali, o hakarak business ne’e atu lao ba oin, atu nia durasaun ne’e naruk entaun prosesu atu susesu ne’e presiza sakrifisiu ho durasaun naruk,” nain ba parfume Euphrates ne’e hateten.

Nia husu joven sira lalika tauk atu monu, koko de’it fiar imi nia aan, hatene saida mak imi nia an liu-liu mak disiplina no fokus buat ne’ebé mak imi halo ne’e importante.

“Ha’u espera produtu Parfume Euphrates bele to’o iha Timor-Leste, no antes ne’e lansa ona iha Indonézia barak mak asesu ha’u nia média sosial bele hatene ona. Importante mak hatene brand ne’ebé kria ho kualidade di’ak ita ko’alia hanesan internasional, Timoroan  mak kria no nain” Eufrasia Vieira hateten.

Parfume Euphrates ne’e nia hahú merkadu  boot husi rai-liur Indonézia di’ak loos mak mai, tanba husi Timor-Leste mak ba labele, la’ós fa’an iha merkadu Indonézia de’it, tanba ne’e ohin halo lansamentu iha Timor-Leste.

“Agora tama ona mai to’o Timor-Leste ha’u hakarak ha’u nia ema rasik mak sente bele hetan parfume Euphrates, produto ne’ebé Timoroan mak kria rasik”.

Parfume ne’ebé hala’o lansamentu ne’e  hamutuk 12 parfume iha nia diferensia karater ba labarik kiik, joven feto no mane, kabe-nain no nia   morin mos lahanesan.

Eufrasia Vieira, na’in ba perfume Euphrates.

“Parfume 12 ne’e nia karakter diferensia tebes ho parfume seluk,  tanba  nia morin ha’u mak kria rasik no kada perfume ha’u tau titulu tuir ida-idak nian. Produtu mina morin ne’ebé ha’u kria ne’e foku liubá nia kualidade mai husi Fransa tanba nasaun ida ne’ebé kria parfume ne’ebé di’ak liu, prosesu kria ne’e hahú husi fulan-Fevereiru, tinan ne’e, to’o ohin lansa iha Timor-Leste,” nia hateten.

Eufrasia Vieira servisu hamutuk ho kompaña husi Indonézia sira mak produs  mina morin ne’e nune’e mós servisu hamutuk kompaña ida husi Fransa, entaun mina morin ne’e halo teste iha laboratóriu Fransa mak manda mai Indonézia no asesoria sira ne’e mai husi Xina tanba sira teknolojia di’ak tebes hodi halo asesoria.

Depois lansamentu Parfume Euphrates ne’e sei loke sira nia loja permanente iha Hotel Timor no Timor Plaza. Tuir formula ne’ebé sira uza kada mina morin mak folin mós diferensia hahu husi $33 to’o $74.

“Ha’u fiar, ha’u nia produtu Parfume Euphrates  di’ak, tanba ha’u ema ida  la’ós halai ba kuantidade, maibe halai liu ba kualidade.  Se Indonézia mak simu ho di’ak, ha’u espera Timor-Leste mós simu di’ak tebes”.

Identiku naran ba mina morin ho Euphrates ne’e mai husi Biblia katak mota ida ne’ebé tempu uluk importante tebes, mota ne’e mosu iha Turkia nia sulin husi Siria depois to’o iha Iran mota ne’e para iha ne’eba maibé nia sulin ba Iran nia tasi.

“Topiku ne’ebé konekta ba ha’u nia an hodi hili naran ne’e tanba feto ne’ebé Primeira vez kria parfume iha mundu nia ema Iran, nia hela iha sidade Babilonia nia kria parfume ne’e nia foti bee husi Euphrates. Entaun naran ida ne’e di’ak tebes ba ha’u nia brand tanba bee ne’e mos no mota ne’e sulin nunka to’o hotu espera saida mak ha’u halo ne’e nunka mais hotu”.

Eufrasia Vieira dehan liu hosi lansamentu  Parfume Euphrates hanesan meiu enkoraja joven sira, tanba antes ne’e nia hasoru dezafiu oioin atu hamate nia vontade iha business sira, maibé husi dezafiu fanun nian família no kolega nia suporta, ohin nia hetan susesu ida lansamentu parfume Euphrates iha Timor-Leste.

“Fou-foun ha’u business Maromak nia planu oinseluk ha’u triste, ha’u kria buat ne’ebé ha’u hadomi ha’u nia rai, ha’u tau osan buat hotu  hakarak loke kampu traballu ba ema  liu-liu ba joven sira hakarak halo ha’u nia rai bonita. Maibé Maromak nia planu oinseluk fou-foun ha’u triste, maibé iha parte ida katak Maromak nia planu ne’e di’ak liu tanba buat ne’ebé ha’u lakon Maromak fó liu no boot liu ida ne’e mak ha’u agradese tebes bele realiza ha’u nia mehi.”

Bianco Rodriguez ” Crimson” hanesan sasin  haktuir nia mós tama iha projetu  parfume Euphrates no durante  ne’e uza mina morin barak, maibé lahatene mane nian no feto nia mak ida ne’ebé, husi projetu parfume Euphrates nia bele koñese ona nia garantia Parfume Euphrates mak kualidade tuir karakter iha Timor-Leste.

“Ha’u orgullu tanba Parfume Euphrates ne’e mai husi Indonesia maibé ita nia ema mak kria, ema Timoroan agradese tebes. Ha’u nia atividade loro-loron ha’u lao ba mai gosta uja parfume  ha’u la hatene selesaun ida ne’ebé mak di’ak no feto nian, mane nian dalaruma ha’u uja de’it tanba ha’u lahatene. Bainhira ha’u tuir mai projetu Parfume Euphrates mak hatene ida ne’ebé mak labarik nian, feton nian, mane nian, joven, no katuas nian.”

Mina morin 12 ne’ebé kompostu husi Euphrates mak 01 Eufrasia, Equinox5, Mooncean, Dark Bauty, Old Money, Asia Bloom, Tmo Eccitame, Leher, Mi Donna, Soul Kiss, Piccola Principessa, Piccolo Principe.

Jornalista: Juvinal Cabral dos Santos