Membru PNTL Tiru Nia Fen Detein iha Sela Hodi Submete Prosesu Kriminál no Disiplinár

Hatutan.com, (13 Outubru 2025), Díli-Membru Polísia Nasional TimorL-este (PNTL) ho inisiál  JLO ne’ebé lori arma (pistola) tiru tohar nia fen nia ain detein hela hela Sela Polísia hodi submeter ba prosesu kriminál no disiplinál.

Insidente ne’e akontese iha Aldeia São José, Suku Bairru-Pité, Postu Administrativu Dom Aleixo, Munisípiu Díli, bainhira membru Polísia ho inisiál JLO fila ba uma ho kondisaun lanu no envolve iha diskute malu ho nia fen iha Domingu madrugada, haleu tuku 04:00 dadeer Otl.

Komandante PNTL Munisípiu Díli, Superintendente Xefe Polísia, Orlando Gomes.

“Kazu tentativa ómesidu ne’ebé mak involve membru PNTL  iha eskuadra Dom Aleixo, akontese iha loron Domingu 12 fulan-Outubru tinan 2025, hale’u  tuku 04:00 dadeer Otl, iha momentu ne’ebá ita-nia membru PNTL ho inisial JLO ne’ebé mak halo nia represaun iha Timor Plaza. Depois iha madrugada tuku 04:00 Otl nia ho kondisaun lanu nia mai iha nia rezidensia fanu nia fen loke odamatan, komu tarde no mosu dezintendimentu depois ita nia membru refere foti pistola karega depois tiru  iha nia fen nia ain parte loos ruin tohar,” Komandante PNTL Munisípiu Díli, Superintendente Xefe Polísia, Orlando Gomes informa ba jornalista sira iha Eskuadra  Polísia Dom  Aleixo, Segunda (13/10/2025).

Komadante PNTL ne’e haktuir, momentu akontese família evakua kedas vítima ba halo  tratamentu iha Ospitál Nasionál Guido Valadares (HNGV) no kazu refere Komandu  PNTL Dili dezarma kedas membru refere hodi submeter bai ha detensaun iha sela durante oras 72 nia laran hodi kontinua ba prosesu kriminál.

“Prosesu ida ne’e ita nia Investigasaun Nasional mak sei atende halo prosesu kona-bá kazu ida ne’e, relatóriu hotu ita submeter ona ba iha komandu PNTTL  nune’e foti medida husi kriminál nian no mós sei foti medida husi prosesu disiplinár nian,” Superintendente Xefe Polísia, Orlando Gomes hateten.

Superintendente Xefe Polísia Orlando Gomes, informa, instituisaun PNTL ne’e instituisaun Estadu nian atribui mai iha Polísia para serbí povu ida ne’e no inklui nasaun Timor-Leste.

“Sasan Estadu ninian ita utiliza ne’e apoiu hanesan meius ida atu bele halo ita-nia seguransa ho di’ak, maibé kuandu ita uza sasan ne’ebé Estadu nian la tuir regra, la tuir leí ne’e, ita sei hasoru proseasu ida rigorozu uituan, ne’e grave,” nia afirma.

Dadaun vitima ho insiál VCV hala’o hela tratamentu iha HNGV hodi hein prosesu kontinuasaun. Nune’e, Diresaun Nasionál Investigasaun Kriminál halo onaiInvestigasaun ba membru PNTL ho inisial JLO  ne’ebé rejistu ho Numeru Uniku Krimi (NUK) 0325/25-PNSIK.

Jornalista: Juvinal Cabral dos Santos