Projetu Edifísiu Sentrál RTTL, UNDP Hapara PT Aulia Multi Sarana

Hatutan.com, (04 Novembru 2025), Díli–Programa  Nasoins Unidas bá Programa Dezenvolvimentu  (UNDP-sigla inglés) hapara Empreza Internasionál PT Aulia Multi Sarana iha ezekusaun projetu konstrusaun Edifisiu Sentrál Rádiu Televizaun Timor-Leste Empreza Públika (RTTL, E.P).

Lee Mós: Konstrusaun Edifísiu Sentrál RTTL,E.P Paradu, PM Xanana Husu Expedito Ximenes Hemu Maran Tiha Bee

PT Aulia Multi Sarana lori sai ona sasán balu iha terrenu projetu konstrusuan edifísiu sentral foun RTTL,E.P. Foto/Dok.Marcelino Tomae

Konstrusaun edifísiu foun RTTL,E.P  previstu ho investimentu ida  ho montante US$5,970659,11 ne’ebé finansiamentu hetan hosi parseria ida entre Governu Timor-Leste, Governu Japaun no UNDP ho nia kontratu atu termina  iha fulan-Marsu 2026.

Projetu konstrusaun ba Edifisiu Sentrál RTTL,E.P ne’e ezekuta husi kompañia internasionál PT Aulia Multi  Sarana husi Indonézia.

Manejer UNDP Muhammad  Salim hateten bá Hatutan.com liuhosi telefonika, Tersa (04/11/2025), katak konstrusaun edifisiu Sentrál Rádiu Televizaun Timor-Leste  Empreza Públika (RTTL, E.P)   halo fali estudu foun no   halo mós dezeñu foun.

“Kompaña PT Aulia Multi Sarana, UNDP hapara tiha ona, daudaun ne’e UNDP Prepara dezeñu foun  hodi loke fali konkursu públiku ka tenderizasaun,” Muhammad Salim hateten.

Fó hanoin fila fali katak, projetu konstrusaun  edifisiu sentrál Radiu Televizaun Timor-Leste, Empreza Públika (RTTL,E.P) ho kustu total US$3,760,405.00 ne’ebé ezekuta husi kompañia internasionál PT Aulia Multi Sarana husi Indonézia la’o atraza tebetebes.

Projetu ne’ebé sai hanesan legacy husi Governu da-ualu (8) liuhusi Ministériu Asuntu Parlamentár no Komunikasaun Sosiál (MAPKOMS) no ezersísiu estra-ordináriu husi Prezidente Konsellu Administrasaun RTTL,E.P altura ne’ebá José António Belo “Taraleu”, konsege hala’o nia lansamentu ka hatuur fatuk-inan, husi  Primeiru-Ministru (PM), Kay Rala Xanana Gusmão iha loron 19 fulan-Dezembru tinan 2024.

Sura husi loron serimónia hatuur fatuk-inan to’o agora empreza internasionál  husi Indonézia, PT Aulia Multi Sarana, seidauk hatuur nia fundasaun ka fondasi no seidauk hatudu esforsu ba mobilizasaun ekipamentu iha terrenu konstrusaun tanba empreza enfrenta difikuldade no prejudika progresu konstrusaun la’o tuir nia kontratu servisu.

Edifísiu sentrál RTTL,E.P   nian ne’e tau naran Francisco Borja da Costa iha andar haat (4) kompletu ho estudiu rádiu ho televizaun, fatin servisu ho ezekutivu, ho totál administrasaun  no jornalista na’in-600.

Iha andar da-haat leten ne’e  fatin sorumutuk ho naran auditóriu Nino Konis Santana ho kapasidade akomula ema na’in-1000.

Iha fulan-Outubru tinan 2023, UNDP lansa konkursu  dezeñu ho site assessment no hafoin iha fulan-Jullu tinan 2024 no fulan-Agostu 2024 hetan aprovasaun  bá dezeñu husi Ministériu Obras Públika (MOP) depois lansa kedan  bá konsursu internasionál  hodi hetan kompañia internasionál husi Indonézia PT Aulia Multi Sarana hanesan manan na’in ba konkursu internasionál ne’e ho total kustu ba projetu ne’e $3,760,405.00.

Iha akordu ne’ebé estabelese ho parte sira, liuliu UNDP no Governu Timor-Leste liuhusi Sekretáriu Estadu Komunikasaun Sosiál (SEKOMS) iha mandatu Governu da-sia (9) nian ne’e,   kompañia PT Aulia Multi Sarana kompromete atu hatama nia ekipamentu rasik, modernu no sufisiente, maibé  realidade PT Aulia Multi Sarana  aluga de’it  karreta baskulante rua (2) ka tolu (3) husi empreza nasionál TINOLIN, Lda, maibé to’o agora fasilidade sira ne’e la estasiona ona iha fatin projetu, inklui terrenu projetu nian la hatudu progresu no paradu total.

Jornalista: Marcelino Tomae