Hatutan.com, (23 Outubru 2025), Díli— Konstrusaun Edifísiu Sentrál  Rádiu Televizaun Timor-Leste, Empreza Públika (RTTL,E.P) ne’ebé konstrui husi  empreza internasionál PT Aulia Multi Sarana paradu besik tinan ona. Nune’e, Primeiru-Ministru Kay Rala Xanana Gusmão, husu ba Sekretáriu Estadu Komunikasaun Sosiál (SEKOMS), Expedito  Dias Ximenes, bá hemu maran tiha bee ne’ebé nalihun iha área konstrusaun refere.

Lee Mós: Projetu Edifísiu Sentrál RTTL, E.P Atraza, PT Aulia Multi Sarana Husu Tan Adisionál

Projetu konstrusuan edifísiu sentral foun RTTL,E.P. paradu besik tinan ona. Foto/Dok

Projetu ho nia  kustu total  US$3,760,405.00, nu’udár apoiu husi Govenru Japaun no implementa husi UNDP ne’e paradu kuaze tinan hafoin Pirmeiru-Ministru Xanana Gusmão rasik halo lansamentu ba hatuur fatuk inan iha loron 19 fulan-Dezembru 2024.

“Ha’u rona katak  rai monu, rai ne’e aat, rai saída bee sa’e, ida-ne’e haruka tiha nia (Expedito Ximenes-red) bá hemu tiha bee  entaun bee mós la sa’e ona,” PM Xanana hateten ba jornalista sira hafoin enkontru semanaál ho Prezidente Repúblika José Ramos-Horta iha Palasíu Prezidensiál, Díli, Kinta (23/10/2025).

Expedito Dias Ximenes ne’ebé kualidade hanesan Sekretáriadu Estadu Komunikasaun Sosiál  hamrik hela iha PM Xanana Gusmão nia kotuk hatan dehan,  asuntu bá konstrusaun RTTL,E.P ne’e nia responde  tiha ona.

“Ne’e ha’u responde tiha ona iha fulan kotuk,” SEKOMS  Expedito Dias Ximenes hatan hosi kotuk.

Fó hanoin fali katak, konstrusaun ne’e  paradu tanba empreza vensidór ba projetu ne’e, PT Aulia Multi Sarana hakarak halo fali estudu viabilidade ka SOIL tes foun.  

Projetu edifísiu sentrál foun RTTL,E.P ne’e previstu investimentu ida  ho montante US$5,970659,11, ne’ebé finansiamentu hetan hosi parseria ida entre Governu Timor-Leste, Governu Japaun no Programa Nasoins Unidas ba Dezenvolvimentu (UNDP, sigla inglés) hanesan implementadór.

Jornalista: Marcelino Tomae