Dili
Sesta-Sábadu, Forsa Tarefa Kontijente Timor-Leste Arranka ba Filipina
Hatutan.com, (12 Novembru 2025), Díli-Forsa tarefa kontijente Timor-Leste ba apoiu umanitária ba vitíma dezastre natural iha Filipina sei arranka ho aviaun Aero Dili iha Sesta-Sábadu (14-15/11/2025).
Xefe Estadu Maiór Jenerál Forsa Armada (XEMGFA) Tenente Jenerál Domingos Raúl “Falur Rate Laek” . Foto/Juvinal Cabral dos Santos
Forsa tarefa kontijente Timor-Leste ne’ebé kompostu husi ema na’in-150 ne’e sei fahe ba grupu rua; grupu ida ema na’in-70 sei aranka uluk iha Sesta-feira no grupu segundu hamutuk na’in-70 arranka fali iha Sábadu ne’e.
Xefe Estadu Maiór Jenerál Forsa Armada (XEMGFA) Tenente Jenerál Domingos Raúl “Falur Rate Laek” informa, daudaun ne’e rosa tarefa kontijente Timor-Leste seidauk bele ba Filipina no sei hein to’o Sesta ho Sábadu mai ne’e mak arranka fali tanba espasu Aereu Indonézia nian seidauk autoriza forsa tanba espasu aviaun iha espasu aereu Indonézia nian okupadu no ajenda ne’ebé fiksa ona.
“Forsa tarefa kontijente na’in-150 husi Timor-Leste seidauk ba tanba sei iha tan autorizasaun husi Indonézia kona-bá espasu aereu nian, so haree sira nia ajenda ne’e aviaun barak liu, tanba ne’e sira ajenda ona ba iha Sesta, 14 fulan-Novembru 2025, karik nune’e mais ha’u seidauk fó orientasaun loloos mais ohin labele ba tanba razaun ida ne’e. Horkalan no horseik kedas ita nia Ministériu Negosiu Estranjeiru no Koperasaun (MNEK) kontaktu permanente hela ho autoridade iha Provinsia Cebu-Filipina no Jakarta, soke espasu Aereu ne’e mak seidauk mamuk para ita atu liu,” Tenente Jenerál Domingos Raúl “Falur Rate Laek” informa ba jornalista sira hafoin partisipa serimónia masakre Santa Kruz, 12 Novembru 1991 iha Semitériu Santa Kruz, Kuarta (12/11/2025).
Xefe Estadu Maiór Jenerál F-FDTL , ne’e afirma tenke iha autorizasaun tanba sira-nia tráfiku aereu ne’e, ne’ebé sira tenke presiza autoriza ne’ebé sira ajenda ona ba bain-rua no bain-tolu iha loron 14 ho loron 15 fulan-Novembru ne’e.
Forsa Tarefa Kontijente Timor-Leste ne’ebé ba iha Filipina area atuasaun defini ona mak lokal prinsipal provinsia Cebu.
Governu liu-husi Ministru Defeza Kontra Almirante Donaciano do Rosário da Costa Gomes Pedro Klamar Fuik hamutuk ho Xefe Estadu Maiór Jenerál Forsa Armada (XEMGFA) Tenente Jenerál Domingos Raúl “Falur Rate Laek” halo despedida ba forsa tarefas kontijente na’in 150 husi Timor-Leste sei ba kumpri misaun asisténsia umanitaria ba povu Filipina liga ho dezastre natural akontese foin dadaun hodi rezulta ema barak sofre.
Kontijente forsa tarrefa konjunta na’in 150 nebé atu ba fó asisténsia ba Filipina ne’e kompostu husi militár F-FDTL nain 120 Autoridade Protesaun Sivil Diresaun Bombeiros na’in 20 servisu saúde na’in neen (6) no Institutu Jestaun Ekipamentu Dezenvolvimentu Infrastrutura Institutu Públiku (IGEDI,IP) reprezenta husi ema na’in haat (4), sira sei estadia iha Filipina durante loron 20 Ekipa refere lidera husi Tenente Koronél Vitorino Soares.
Jornalista: Juvinal Cabral dos Santos