IGJ Deklara Grand Dragon Lotaria Legál Maibé Deskonfia Halo Mós Atividade Jogu Online Mak PNTL Halo Buska-Apreensaun

Hatutan.com, (18 Dezembru 2025), Díli-Inspetór Jerál ba Jogu (IGJ), Anibal Martis, Kinta (18/12/2025), esklarese katak Lotaria Grand Dragon ne’e empreza ida hetan lisensa bá atividade Lotaria versaun Singapura ho Kambodia, hanesan mós jogu  lotaria Amizade no Rudál, tanba ne’e, atividade Lotaria Grand Dragon nian ne’e legál, maibé Polísia Nasionál Timor-Leste (PNTL) halo buska no apreensaun tanba deskonfia uza lisensa Dragon ba atividade jogu online.

Lee Mós: Tribunál Aplika Medida Aprezentasaun Periódika Bá Jerente Grand Dragon Lotaria

Empreza jogu Lotaria Grand Dragon. Foto/Juvinal Cabral dos Santos

“Ha’u esplika oituan kona-bá Dragon ba ita boot, Dragon ne’e empreza ida  hetan lisensa bá atividade Lotaria versaun Singapura ho Kambodia ne’e hanesan hela jogu lotaria Amizade, Rudál,” Inspetor Gerál Jogu (IGJ), Anibal Martis,  informa ba Hatutan.com liuhusi  komunikasaun WhatsApp.

Nia hateten, agora ida ne’ebé Polísia Nasionál Timor-Leste (PNTL) ba halo buska ne’e tanba de’it deskonfia nia halo atividade jogu online balun iha laran.

“Sé nia halo fali atividade jogu online iha laran ne’e ilegál, mais ida Lotaria ne’e la ilegál,  id- ne’e legál” Inspetór Jerál ba  Jogu Anibal Martins afirma.

Inspetór ba Jogu ne’e haktuir, atividade jogu ne’ebé  Lotaria Grand Dragon rejistu iha IGJ ne’e lotaria versaun Singapura ho Kambodia hanesan ne’e legál hela tanba sira selu hela taxa, kumpri hela sira nia dever selu taxa ba Governu la’o hela, no sira fó hela servisu bá Timoroan.

“Agora deskonfia Polísia tama ne’e rona katak sira hala’o fali atividade jogu online, sira uza fali lisensa ida Dragon ne’e halo fali atividade jogu online ne’e mak Polísia halo buska no apreensaun ba sira ne’e,” nia klarifika tan.

Lotaria Grand Dragon. Foto/Juvinal Cabral dos Santos

Nia salienta, prosesu sira ne’e sei ba Tribunál sei haree desizaun husi Tribunál. Sé loos duni. Entaun prontu desizaun Tribunál deside sé sira la halo buat ne’e, deskonfia de’it la iha evidensia ne’e depois desizaun Tribunál.

“Sim, desizaun Tribunál mak sei fó, agora investigasaun la’o ba hela Tribunál mak sei desidi. Sé karik mak tuir leí halo investigasaun mak la iha evidensia entaun konforme desizaun Tribunál kontinua ka lae ne’e orsida Tribunál mak desidi,” Anibal Martis dehan.

Nia hatutan, Inspesaun Jerál ba Jogu la desidi atividade ne’ebé mak autoridade seguransa halo ona atuasaun, maibé Tribunál mak desidi.

Jornalista: Juvinal Cabral dos Santos