Komisaun B Sei Buka Faktu Diskriminasaun iha Rekrutamentu Kadetas Foun PNTL

Hatutan.com, (06 Fevereiru 2026), Díli- Komisaun B Parlamentu Nasionál ba asuntu Negosiu Estránjeiru, Seguransa no Defeza,  sei buka tuir faktu sira ne’ebé deskonfia iha pratika diskriminasaun ne’ebé mosu iha prosesu rekrutamentu ba kadetas foun Polisia Nasionál Timor-Leste (PNTL).

Lee Mós: Deskonfia, Familiarizmu iha Rekrutamentu Kadetes Foun PNTL

Kadetes foun PNTL sira la satisfas ho prosesu rekrutamentu no halo protestu iha Ministériu Interiór, Kinta (05/02/2026). Foto/Juvinal Cabral dos Santos

Prezidente Komisaun B PN, Domingos Augosto Deker hateten, kona-bá implementasaun rekrutamentu  no kestaun tekniká kadetas Polisia Nasionál Timor-Leste (PNTL)  foun ne’e kompeténsia ba Governu, liuliu ba Ministériu Interiór, Komandu Jerál Polisia Nasionál Timor-Leste (PNTL)  no mós Komisaun Rekrutamentu mak iha direitu ko’alia.

“Agora kona-bá preokupasaun sira seluk ne’e, ha’u la tama iha laran, hanesan reprezentante povu ko’alia politíka de’it, kestaun tekniká koloká halo nusá, fasilita malu nusá, ne’e, prezisa konfirma direita ho Komisaun Rekrutamentu mak iha kompeténsia no responsabilidade hodi ko’alia buat ruma kona-bá ida-ne’e. Agora kona-bá kestaun nepotizma ka lae, ita-boot sira (jornalista-red) konfrima direita ho Ministériu Interiór no Komisaun Rekrutamentu,” Deputadu Domingos Augosto Deker ba jornalista sira iha PN, Sesta (06/02/2026).

Iha fatin hanesan Deputadu Bankada FRETILIN, David Dias Mandati Ximenes hateten, kualkér prosesamentu ida kadavéz iha duni  kometé irregularidade no pratiká nepotizmu no familiarizmu.

“Agora ha’u lakoi ema halo akuzasaun katak komandante nia oan de’it mak liu iha rekutramentu, buat sira ne’e ita halo akuzasaun ne’ebé, laiha fundamentu. Seraké sira iha faktu ka prová katak prioridade ne’e ba komandante sira nian oan de’it kalae, tanba ne’e ko’alia didi’ak para ita labele ofende malu,” Deputadu David Dias Mandati hateten.

Nia afirma momentu hahú prosesu rekrutamentu ba kadetas PNTL foun reprezentante komisaun B-PN, Deputadu Natalino dos Santos no Deputadu David Dias Mandati mak ba haree tuir mais prosesu sira  halo nusa ne’e ladún lahatene.

“Maibé haree took orsida tuur hamutuk mak ko’alia buat loos mak ida ne’ebé sala mak ida ne’ebé, kuandu iha faktu ona bele tuur hamutuk hodi ko’alia ho komisaun rekrutamentu. Karik iha duni katak komandante ninian oan sira de’it, ne’e ladún di’ak ne’e iha diskriminisaun, katak bainhira ita halo buat ruma iha Timor ita tenke hanoin katak Timor ne’e ukun aan lori ema nian  ruin no ran,” tenik Deputadu Mandati.

Nia hatutan tán katak “depende karik iha falsifikasaun dokumentu, karik iha diskriminasaun ruma, karik iha tendénsia favoritizmu, ita haree fali ba rekizitu lei, ita labele kondena ema lai, no haree padraun legalidade nia mak bele levanta,” nia tenik.

Jornalista: Zita Menezes