Kandidatu Ajente PNTL Sei Koordena ho Universitáriu Sira Organiza Manifestasaun

Hatutan.com, (09 Fevereiru 2026), Díli-Kandidatu Ajente Polísia Nasionál Timor-Leste (PNTL) kompromete atu koordena ho universitáriu sira atu organiza asaun pasifiku bianhira laiha rezultadu ba sira-nia petisaun ne’ebé sira submete ba Primeiru-Ministru Xanana Gusmão ho Prezidente Parlamentu Nasionál, Maria Fernanda Lay, Segunda (09/02/2026).

Lee Mós: Rekrutamentu Kadetes PNTL Diskriminativu, Ministériu Interiór ho Komandu PNTL Dezobediénsia Ba Desizaun Tribunál

Kandidatu ajente PNTL organiza malu hodi submete petisaun ba PM Xanana ho PPn Maria Fernanda Lay, Segunda (09/02/2026). Foto/Juvinal Cabral dos Santos

Kandidatu ajente Polísia liu na’in-100 sumete karta petisaun ba iha PM Xanana ho PPN Maria Fernanda Lay atu bele submete mós sira-nia naran iha lista teste médiku hodi evita pratika ne’ebé deskonfia favoritizmu no familiarizmu iha rekrutamentu PNTL 2025.

Tuir lista ne’ebé publika husi Komisaun Juri bá  Rekrutamentu  membru Polísia Nasionál Timor-Leste (PNTL) 2025, foin lalais ne’e, katak kandidatu ajente foun PNTL hamutuk na’in-10.595 aprovadu ba faze teste médiku iha Ospitál Nasionál Guido Valadares (HNGV), maibé  na’in-400 mak bele (aptu) no aat liután mosu akuzasaun katak husi kandidatu na’in-400 ne’e maioria superiór Polísia ho komisaun juri  rekrutamentu sira nia oan no família besik husi munisípiu to’o nasionál.

Portavós kandidatu ajente PNTL foun, Deolando Yano Mendonça ba jornalista iha resintu Palásiu Governu, hateten dadaun sira iha faze submete petisaun ba PM Xanana ho PPN Mari Fernanda Lay. Maibé, bainhira laiha resposta, maka iha faze tuir mai sei organiza no mobiliza asaun pasifiku ka manifestasaun.

“Karta petisaun sira ne’ebé mak hato’o ona tuir leí hateten mak la iha resposta nafatin mak ami sei organiza malu ba iha faze demonstrasaun,” Deolando Yano Mendonca informa.

Nia haktuir, atu partisipa iha demostrasaun ne’e sira sei hato’o karta ba iha universidade hotu-hotu, sosiedade sivíl, inklui organiza inan-aman sira atu hato’o solidariedade ba kandidatu ajente PNTL  sira ne’ebé sai vitíma ba desizaun ne’ebé deskonfia nakonu ho favoritizmu no familiarizmu.

“Governu tenke tun mai para rezolve, ita labele husik situasaun  ida ne’e liu de’it, se ita husik ida ne’e liu de’it, ita koko halo lutu ba injustisa depois ita rega para injustisa buras iha rai ida ne’e,” Deolando Yano Mendonça hateten.

“Iha ne’ebá ami nia ezizensia mak ida de’it, katak ami mós tenke  iha direitu hetan oportunidade, ami nia direitu atu defende ami nia an, sé karik halo deskriminasaun ba ami, no ami nia ezizensia mak ne’e tenke iha solusaun ba ami nia problema tanba ami mós iha direitu,” Deolando Yano Mendonça  afirma tan.

Nia hatutan, rekrutamentu PNTL ida ne’e mosu deskriminasaun ida ne’e la’ós kandidatu mesak mak hatene, maibé média sira mós hatene ema hotu hatene no iha evidensia barak, iha rekrutamentu ne’e mosu sistema familiarismu  ida ne’e labele husik  liu.

Komisaun Juri Rekrutamentu PNTL 2025 halo konferénsia imprensa. Foto/Juvinal Cabral dos Santos

Iha sorin seluk portavós Komisaun Juri bá  Rekrutamentu  membru Polísia Nasionál Timor-Leste (PNTL) tinan 2025, Superintendente Polísia António da Luz, iha Sentru Formasaun Polísia (CFP-sigla portuges) hateten iha semana kotuk fó sai ona ba públiku katak loron 10 fulan-Fevereiru ne’e, kandidatu sira ne’ebé mak aptu ba teste médiku ne’e na’in-400.

Nia hateten parte Departamentu Saúde PNTL halo koordenasaun ho Laboratoriu Nasionál iha HNGV ba konfirma katak ekipamentu ne’ebé mak atu halo teste hanesan reajente to’o agora seidauk iha, tanba ne’e mak fó hatene fali ba kandidatu sira hein ekipamentu ne’e to’o ona maka foin bele halo teste médiku.

Iha fatin hanesan Xefe Departamentu Saúde Superintendente Assistente Polísia Analita do Rego, haktuir, oráriu atu ba prova médiku tuir loloos hahú iha loron 10  to’o loron 20  fulan-Fevereiru ne’e, maibé tuir konfirmasaun husi departamentu saúde, katak laboratoriu nasionál HNGV reajente ne’ebé atu halo teste ne’e seidauk to’o iha Timor-Leste.

Portavós Komisaun Juri bá  Rekrutamentu  membru PNTL tinan 2025, Superintendente Polísia António da Luz, hatutan, tenke hein parte laboratoriu nian, atu reajente ne’e to’o tiha iha Timor-Leste mak bele hahú teste médiku ba kandidatu ajente PNTL na’in-400 ne’ebé atu konkore ba vaga 400 iha PNTL.

“Ita espera katak iha tempu badak mai ona para  ita-nia joven sira  400 ne’e bele teste,”  Superintendente Polísia António da Luz hateten tan.

Nia esplika, ba tuir teste médiku mantein kandidatu 400  bazeia ba Rezolusaun Governu Nu:10/2025 ne’ebé mak fó sai presiza na’in-400 de’it.

Iha Diploma Ministerial Nú:17/2025 kona-ba kuota ne’ebé fahe ba iha modalidade haat, ida mak oan husi veteranu, oan husi PNTL, ida ba feto no mós ba públiku.

“Maibé depois husi desizaun Tribunál Rekursu hatun desizaun iha artigu 42° númeru alinea B no C ne’ebé konsta iha Diplomata Ministerial Nú:17/2025 ne’e inkonstitusionál, tanba ne’e mak kandidatu hotu-hotu aplika ba iha jeral, ita la fahe ona ba kuota veteranu nia oan ka polísia nia oan hotu-hotu ba jeral,” portavós Rekrutamentu PNTL  ne’e esplika.

Públiku kestiona liga ho naran fó sai ba teste médiku maioria Polísia nia oan, portavós Rekrutamentu PNTL 2025 ne’e konsidera  katak ne’e opiniaun públiku no  direitu ema ida nia atu halo reklamasaun.

“Sé mak la satisfás ho prosesu ne’e, ha’u hanoin iha dalan legál, komisaun hala’o nia knar tanba hahú husi prosesu lubuk ida, verifikasaun dokumentu sira ne’e hotu katak, ema ne’e prienxe mak nia passa. Tanba ita haree ba dokumentu ne’e se mak la satisfás ho prosesu ne’e, karik detekta buat ruma liga ho ida-ne’e ha’u hanoin ema hotu-hotu iha direitu ba keixa depois pessoal ne’ebé mak iha bele responde,” nia hateten.

Jornalista: Juvinal Cabral dos Santos