PDHJ Husu Anula no Suspende Rekrutamentu Kadetas PNTL Foun

Hatutan.com, (09 Fevereiru 2026), Díli- Provedór Direitu Umanu no Justisa  (PDHJ), Virgílio da Silva Guterres “Lamukan”, Segunda (09/02/2026),  informa PDHJ submete ona karta ba Ministériu Interiór husu  anula no suspende prosesu rekrutamentu kadetas Polísia Nasionál Timor-Leste (PNTL)  hodi hein prosesu investigasaun relasiona ho diskriminasaun sira ne’ebé akontese iha prosesu rekrutamentu nian laran.

Lee Mós: Kandidatu Ajente PNTL Sei Koordena ho Universitáriu Sira Organiza Manifestasaun

PDHJ submete ona karta ba Ministériu Interiór husu anula no suspende prosesu rekrutamentu kadetas Polísia Nasionál Timor-Leste (PNTL) hodi hein prosesu investigasaun. Foto/Zita Menezes

Provedór  Virgílio da Silva Guterres “Lamukan”,  liuhusi konferénsia imprensa iha eskritóiru provizoriu PDHJ nian iha Excelsior Resort and Hotel iha  Bebonuk hateten, iha semana liubá kandidatu sira ne’ebé tuir rekrutamentu ba vaga iha PNTL hato’o keixa iha PDHJ tanba lamenta ho rezultadu rekrutamentu ne’ebé alegadu mosu disikrimansaun maka’as iha laran.

Komite jestaun keixa PDHJ deside ona atu hala’o investigasaun, ne’ebé orsida investigasaun ne’e kompostu husi Komisaun Anti-Korrupsaun (CAC siglá portugés) no diresaun investigasaun no diresaun fiskalizasaun atu investiga kle’an hodi hatene aspetu sira.

“Investigasaun sira ne’e sei haree liubá tanbasa mak iha lista ki’ik sira ne’e ofisiál polísia nian oan sira de’it mak nakonu iha no inklui mós ofisiál komisaun sira ne’ebé hola parte iha juri rekrutamentu nia oan sira sira tama hotu lista ho númeru ki’ik. Atu buka averigua mós tanba dokumentu balu hateten katak iha rekomendasaun husi entidade Governu nian no entidade estadu nian balu, entaun presiza investigasaun kle’an atu hato’o,” Provedór  Virgílio da Silva Guterres “Lamukan hateten.

Relasiona ho keixa kandidatu PNTL nian mak ohin  katak desizaun  PDHJ husi averigausaun ba faktu sira ne’ebé ba rekrutamentu ne’ebé  iha, ohin PDHJ haruka ona karta, rua, ida bá Ministériu Interiór no karta ida Parlamentu Nasionál.

“Ne’ebé nian konteudu ne’e husu no rekomennda ba Ministériu Interiór atu, suspende ka anula prosesu rekrutamentu hodi hein prosesu investigasaun, no husu atu re-avalia prosesu ne’e, atu nune’e, redús preokupasaun públiku liuliu ba kandidatu sira ne’ebé agora manifesta hela sira nian preokupasaun,”  antigun prezidente Conselho de Imprensa de Timor-Leste ne’e hateten.

Nia afirma karta ida seluk mak PDHJ dirijé ba Prezidente Parlamentu Nasionál (PPN), no husu Parlamentu Nasionál atu estabele komisaun inkeritu parlamentár ida hodi halo investigasaun ba prosesu rekrutamentu PNTL. Tanba PN iha kompeténsia atu halo inkeritu parlamentár hodi halo investigasaun.

Tuir  dadus sira ne’ebé PDHJ  haree hetan mak iha lista aprovadu ne’ebé fó sai kandidatu sira ne’ebé admitidu atu ba tuir teste médiku ne’e maiória polísia nia oan liuliu komandante sira ne’ebé tuur iha komisaun juri, komandante  jeral, komandante munisípiu nian oan sira mak nakonu iha ne’ebá.

PDHJ afirma PNTL ne’e entidade Estadu nian atu serbí povu hotu-hotu no sidadaun hotu-hotu, nune’e atu sai PNTL tenke loke ba públiku no povu Timoroan hotu iha direitu atu asesu, la’ós bazeia de’it ba polisia nia oan no veteranu nian oan ne’e labele.

“Ministériu Interiór ami husu atu bainhira haree prosesu ne’e mosu irregularidade barak, ami husu atu reanunsia loke konkursu foun, atu nune’e, konkursu ida ne’ebé transparante, konkursu ne’ebé públiku hotu-hotu asesu seim disikriminasaun, bazeia ba buat oin-oin no respeita desizaun tribunál nian fó sai,” nia hateten.

PDHJ mós  husu ba kandidatu PNTL sira atu lori prová no evidénsia ne’ebé iha buka advogadu no defensoria públika atu akompañia sir aba iha tribunál rekursu posibilidade bele uza providénsia kautelár atu tribunál mós foti desizaun hodi anula prosesu hodi hein prosesu investigasaun no bele reinisia prosesu foun ne’ebé garante trasnparánsia ba hotu-hotu.

Jornalista: Zita Menezes