Polísia Sei Regula Motór Sira Estasiona iha Trotoár Área Palásiu Governu

Hatutan.com, (12 Fevereiru 2026), Díli-Polísia Nasionál Timor-Leste (PNTL), Diresaun Tránzitu Seguransa Rodoviariu Nasionál (DTSRN) sei regula motór  ka karreta sira ne’ebé utiliza trotoár área Palásiu Governu nian hodi halo fali estasionamentu ne’ebé prejudika tebetebes ema la’o ain no estraga de’it ambiente Palásiu Governu nian.

Motorista sira estasiona motór “arbiru” iha trotoál área Palásiu Governu nian. Foto/Juvinal Cabral dos Santos

Diresaun Tránzitu Seguransa Rodoviariu Nasionál sei koordena ho Diresaun Nasionál Transparente Terrestre (DNTT) atu koloka hikas sinais tránzitu, bandu motorista sira utiliza trotoár Palásiu Governu sai estasionamentu.

“Loron hirak tuir mai ita nia sidadaun sira balun mós kestiona kona-ba estasionamentu iha trotoál área Palásiu Governu. Tuir observasaun ne’ebé mak ohin urjentemente parte husi Diresaun Tránzitu Seguransa Rodoviariu Nasionál (DTSRN) hatudu ambiente la furak tanba ne’e sei koordena ho DNTT atu mota fali sinais tránzitu bandu la bele utiliza trotoár sai estasionamentu motor ho karreta,” Xefe Departamentu  Koordensaun Jestaun Risku, Formasaun Edukasaun Sívika, Superintendente Asistente Polísia, Domingos Sarmento Gama, informa ba jornalista bainhira halo observasaun iha arredores Palásiu Governu, Kinta (12/02/2026).

Nia afirma, husi públiku sira nia preokupasaun Diresaun Tránzitu Seguransa Rodoviáriu Nasionál tun diretamente atu haree estasionamentu arredores Palásiu Governu.

“Tuir ita nia leí  kodigu estrada artigu 49° ho 50° ko’alia kona-ba regra estasionamentu ne’e ita nia motorista sira iha konsensia ka lae ka tenke haree oinsá mak halo estasionamentu ida ne’e labele afeta ba movimentu sidadaun sira nian,” Superintendente Asistente Polísia, Domingos Sarmento Gama informa.

Artigu 49° husi Kódigu Estrada ne’e esplika katak proibi motorista atu para veíkulu iha fatin ne’ebé bele impede fluxo tráfiku ba  ema nia seguransa. Objetivu maka hodi evita asidente no mantén movimentasaun tráfiku di’ak.

Artigu 50° maka fó regra kona-ba estasionamentu (parking) veíkulu. Iha artigu ne’e hateten katak estasiona veíkulu iha fatin la bele, hanesan: iha estrada ne’ebé impede formasaun fila tráfiku, iha rua no fatin ne’ebé la hatama karreta ne’ebé estasiona di’ak, iha asesu entrada/saida husi propriedade; iha fatin espesífiku rezerva ba tipu veíkulu (sinal) no regra seluk tan. Tanba ne’e, la bele estasiona iha lokalidade fatin ne’ebé la permisivel.

“Trotoár leten ne’e fó espasu ba ema la’o ain sira halo sirkulasaun, agora dadauk ita haree estasionamentu ida ne’e la fó fatin ba ema la’o ain sira,” nia hateten.

Nia esplika, preokupasaun ba ema la’o ain iha aredores Palásiu Governu parte Komandu fó orientasaun katak Diresaun Tránzitu Seguransa Rodoviariu Nasionál tenke halo observasaun fila-fali hodi rekomenda fali ba Diresaun Nasionál Transparente Terrestre (DNTT) futuru saida mak bele halo.

Joranlista: Juvinal Cabral dos Santos