Segunda, Komisaun Ba Revizaun Rekrutamentu PNTL Halo Primeira Reuniaun

Hatutan.com,  (20 Fevereiru 2026), Díli-Ministru Interiór (MI), Francisco da Costa Guterres hateten, Segunda-feira (23/02/2026),  komisaun ba revizaun rekrutamentu Polísia Nasionál Timor-Leste (PNTL) na’in-20  hahú primeira reuniaun halo preparativu depois hahú halo avaliasaun ba prosesu tomak.

Lee Mós: CAC Hahú Averiguasaun Bá Kazu Rekrutamentu Kadete PNTL

jornalista sira halo entrevista ho Ministru Interiór, Francisco da Costa Guterres, relasiona ho andamentu ka prosesu ba polemika rekrutamentu kadete PNTL 2025. Foto/Hatutan.com

“Ha’u seidauk iha informasaun klaru mais iha duni kadetes foun balun halo hela reklamasaun, agora ita iha komisaun ida ne’ebé sira komesa reuniaun halo preparativu Segunda-feira (23/02/2026), sira halo primeira reuniaun para depois hahú ona halo avaliasaun tomak ba prosesu ne’e,” Ministru Interiór (MI), Francisco da Costa Guterres ba jornalista sira iha Ministériu Finansas (MF), Sesta(20/02/2026).

Ministru Francisco da Costa Guterres informa, komisaun ne’e sei konvida mós  husi Austrália no Portugál,  husi  jurista sira, husi Provedoria Direitus Humanus no Justisa (PDHJ), husi parte komisaun B  Parlamentu Nasionál no konvida hotu veteran,  hodi halo revizaun totál mak haree to’ok sala ne’e iha ne’ebé depois mak hatene prosesu ne’e.

“Atu re-teste ka lae?’ ne’e ha’u la hatene, ha’u labele ko’alia. Ne’e komisaun mak sei rekomenda, komisaun mak sei ko’alia,” Francisco da Costa Guterres hateten.

Nia salienta tan, konkluzaun servisu ne’e komisaun sira mak sei hasai, rekomenda saida mak presiza halo ne’e para rezultadu di’ak liu.

Jornalista: Juvinal Cabral dos Santos