Deskonfia Fujitivu Kalumban Mali “Hamutuk” Hela ho PR Ramos-Horta iha Atividade Sosiál Sira

Hatutan.com, (27 Fevereiru 2026), Díli–Fujitivu Kalumban Mali ne’ebé deskonfia falsifika dokumentu hodi hetan nasionalidade Timor ho naran Leonardo Benigno Tilman, hola parte ativu iha atividade sosiál ka atividade karitativu Prezidente Repúblika, José Ramos-Horta nian.

Lee Mós: Ema ho Podér Polítiku Proteze no Fó Kondisaun Ba Fujitivu Kalumban Mali iha Timor-Leste

Fujitivu Kalumban Mali ne’ebé deskonfia falsifika dokumentu hodi hetan nasionalidade Timor ho naran Leonardo Benigno Tilman (hamrik iha PR Ramos-Horta nia kotuk taka sapeu) akompaña delegasaun PR José Ramos Horta bainhira vizita no fahe ai-han ba pasiente sira moras dengue iha HNGV, 18 Fevereiru 2026. Foto/Hatutan.com

Informasaun ne’ebé Hatutan.com rekolla husi fontes oioin, katak fujitivu Kalumban Mali ka deskonfia troka ona identidade ho naran Leonardo Benigno Tilman sai mós patrosinadór ba atividade karitativa Prezidénsia Repúblika nian, liu husi atividade sosiál Casa Civil  ne’ebé halo uma ba kbiit la’ek sira ho mós   lori apoiu nesesidade baziku (ai-han) ba fahe kbiit-laek sira.

Iha loron 18 fulan-Fevereiru ne’e, iha atividade Prezidente Repúblika (PR), José Ramos-Horta nian  ba vizita no fahe ai-han ruma ba pasiente dengue sira iha Ospitál Nasionál Guido Valadares (HNGV) akompaña mós husi Leonardo Benigno Tilam ka fujitivu Kalumban Mali.

Ba kestaun ne’e, Hatutan.com konfirma ho Prezidente Repúblika, José Ramos-Horta iha sala VIP Aeroportu Internasionál Prezidente Nicolau Lobato, Sesta (27/02/2026), konfesa katak nia la hatene Leonardo Benigno Tilman ka fujitivu Kalumban Mali akompaña mós iha vizita ba HNGV ne’e.

“Ha’u la hatene nia (fujitivu Kulumban Mali ka Leonardo Benigno Tilman-red)  ne’e sé?, ha’u la hatene atu ko’alia saída,  bá ha’u keta ko’alia mangame bá ha’u, tanba ha’u la hatene  nia ne’e saída,” Prezidente Repúblika,  José Ramos-Horta  hateten hodi responde  Hatutan.com bainhira fila husi  vizita traballu bá Fransa ho Suisa.

Xefe Estadu Timor-Leste ne’e afirma katak, vizita iha HNGV hodi halo programa ida Kona-bá   moras dengue  no  apoia sasán, tanba  ne’e  nia  la hatene sé maka fujitvu Kulumban Mali ka Leonardo Benigno Tilman,  sidadaun Indonézia ne’ebé  halai husi Justisa Indonézia,  subar tinan barak ona iha Timor-Leste no deskonfia faslifika dokumentu hodi hetan nasionalidade Timor.

Kalumban Mali ne’ebé deskonfia falsifika dokumentu hodi hetan nasionalidade Timor ho naran Leonardo Benigno Tilman,  hetan sentensa husi Painél Juis Tribunál Krime Korrupsaun ka  Pengadilan Tindak Pidana Korupsi (Tipikor) Kupang-Indonézia,  tinan-15 prizaun efetivu iha tinan 2016. Maibé, prosesu julgamentu bá kazu ne’e ho karater  in-absénsia ho ajenda akuzasaun finál,  Kalumban Mali halai lakon to’o ohin loron.

Kalumban Mali sai hanesan fujitivu ka DPO (Daftar Pencarian Orang) Prokuradoria NTT ho Prokuradoria Jerál Repúblika Indonézia nian dezde kedas tinan 2016.

Kalumban Mali, envolve kazu fornesimentu adubu ka pupuk ho kuantidade tonelada  575 ho valor orsamentu millaun Rp976.

Kalumban Mali nu’udár Diretór CV Eka Cipta Persada ne’ebé hetan detensaun dezde loron 28 fulan-Fevereiru 2014. Molok ne’e, iha fulan-Jullu tinan 2013, Kalumban Mali sai hanesan kandidatu membru lejislativu husi  Partidu  Amat Nasonal (PAN) bá DPRD-NTT.

Iha entrevista Hatutan.com ho Diretór Nasionál PCIC,  Vicente Fernandes e Brito, Sesta 20 Fevereiru 2026,  informa katak kazu fujitvu Kalumban Mali ne’e sensitivu liu, tanba ema ho podér polítiku sira maka proteje

“Kazu bá fujitvu Kalumban Mali ne’e sensitivu liu, tanba ema-boot de’it mak backing ka apoiu no fó kondisaun, tanba ne’e, difisil bá PCIC hodi halo servisu investigasaun bá kazu ne’e,”  Diretór Nasionál PCIC Vicente Fernandes e Brito hateten bainhira partipa iha selebrasaun aniversáriu Komisaun Anti-Korrupsaun (CAC) iha edifisiu  CAC iha Farol, Díli.

Vicente Fernandes e Brito  hateten kazu fujitvu Kalumban Mali nian ne’e, PCIC la kontinua investigasaun kleur ona, ho razaun maka sensitivu, tanba  fujitivu ne’e rasik sadere metin ho figura importante balu iha Timor.

Fó hanoin tan  fali katak iha Kuarta, 05 fulan-Juñu tinan 2023,  hale’u tuku 16:00 Otl, PCIC  halo kapturasaun no detensaun ba  fujitivu Kalumban Mali  iha nia rezidénsia Fomento, Díli.

Autoridade PCIC kaptura no detein fujitivu Kalumban Mali relasiona ho informasaun katak nia kaer ilegalmente dokumentu sidadania Timor nian  hodi troka nia naran ba  Leonardo Benigno Tilman husi Munisípiu Bobonaro.

Iha detensaun no kapturasaun ne’e, PCIC asegura dokumentu importante sira hosi Kalumban Mali alias Leonardo Benigno Tilman, hanesan sertidaun Nascimento ne’ebé deskonfia atribui  husi indivíduu balu iha Ministériu Justisa Timor-Leste, Billete Identidade Timor-Leste no sertidaun kazamentu husi Parókia ida ne’ebé hola parte iha Arkidioseze Metropolitana Díli.

Fujitivu Kalumban Mali nia orijen husi Lamaknen, Postu Administrativu Atambua, Provínsia Kupang, Timor Osidentál ka NTT (Nusa Tengara Timur).

Jornalista: Marcelino Tomae