Funu iha Médiu Oriente Nia Impaktu Bele Alastra Mai Timor-Leste

Hatutan.com, (04 Marsu 2026), Díli-Ministru Petroleu no  Rekursu Minerál (MPRM), Francisco da Costa Monteiro, hateten funu iha Médiu Oriente to’o fulan oin nia  impaktu bele alastra mai Timor-Leste hodi fó influensia ba presu konbustivel,  mós impaktu maka’as ba iha ekonomia mundiál.

Ministru Petroleu no Rekursu Minerál (MPRM), Francisco da Costa Monteiro. Foto/Juvinal Cabral dos Santos

“Médiu Oriente, durante ne’e, nia mak sai hanesan rejiaun ida ne’ebé produsaun mina no gás barak tebe-tebes. Iha Saudita Arabia, Qatar no sira seluk tan,” Ministru Petroleu  no Rekursu Minerál (MPRM), Francisco da Costa Monteiro, informa  ba jornalista sira iha Ministériu Finansas (MF),  Díli, Kuarta (04/03/2026).

Ministru Francisco da Costa Monteiro hateten, problema hanesan agora kuandu funu iha ne’ebá neineik sempre sei alastra bá presu petroleu no gás mundiál, bele mosu  fó impaktu maka’ás bá iha ekonomia mundiál nian.

“Parese iha fulan oin, ita bele sente dadauk ona nia impaktu ne’e. Horseik, ha’u ko’alia ona Timor Gap ho autoridade nasionál, ami sei halibur malu para ko’alia estratéjia balun ba antisipasaun,” Francisco da Costa Monteiro informa.

MPRM sei haree oinsá mak bele lori mai aprezenta to’o iha Konsellu Ministru hodi  diskute estratejia sira atu enfrenta situasaun sira pior bainhira funu iha mediu oriente nia implikasaun afeta direta mai Timor-Leste.

Tuir nia, iuha tempu sira mai ne’e kombustivel balun folin hahú sa’e no ida-ne’e mak MPRM haree hela no formalmente Governu sei halo nia pasu rasik.

Jornalista: Juvinal Cabral dos Santos