Ramos-Horta Alerta Prepara Kondisaun Hasoru Krize Ekonómia Globál

Hatutan.com, (05 Marsu 2026), Díli–  Funu iha Médiu Oriente entre Amerika hamutuk ho Izraél hasoru Iraun sei afeta ekonomia global, tanba ne’e, Prezidente Repúblika, José Ramos Horta, alerta ona bá Govenrnu  prepara osan husi  fundu soberanu   hodi asegura importasaun ai-han no proteje povu, liu-liu sira ne’ebé kiak liu bainihra mosu  krize ho folin mdrkadu global ne’ebé aas no karun.

Lee Mós: Funu iha Médiu Oriente Nia Impaktu Bele Alastra Mai Timor-Leste

Prezidente Repúblika, José Ramos-Horta. Foto/Marcelino Tomae

Hafoin enkontru semanál ho Primeiru-Ministru, Kay Rala Xanana  Gusmão  iha Palásiu Prezidensiál, Kinta (05/03/2026),  José Ramos-Horta, hateten Governu presiza prepara mekanizmu atu hasoru posível krize ekonómia globál ne’ebé bele mosu husi eskalasaun konflitu iha Médiu Oriente.

Nia dehan Governu tenke haree dalan atu labele fó impaktu boot liu ba povu, liu-liu sira ne’ebé kiak liu.

Xefe  Estadu ne’e afirma tan katak ida-ne’e bele halo liu-husi utilizasaun osan espesiál husi Fundu Soberanu, hodi garante importasaun ai-han no nesesidade báziku sira, atu nune’e, povu la sente todan liu tanba mudansa folin iha merkadu internasionál.

Xefe Estadu Timor-Leste ne’e alerta  tan katak eskalasaun konflitu iha Médiu Oriente bele lori impaktu boot bá ekonómia globál, no konsekuénsia ne’e bele afeta mós rai sira ki’ik hanesan Timor-Leste.

Nia  fó ezemplu katak uluk folin ai-han iha Timor-Leste baratu liu. Nia dehan foos saku ida ho kunatidade  kilograma 25 US$11 de’it, maibé depois  konflitu iha Ukráine ho Rusia, folin foos sa’e to’o  tiha US$15,00  no balun US$19.00 kada saku.

Jornalista: Marcelino Tomae