PA-RAEOA Regio da Cruz Salu Hapara Funsionáriu Kontratadu 1,500

Hatutan.com, (25 Marsu 2026) Oé-cuse–Prezidente Autoridade Rejiaun Administrativu Espesiál Oé-cuse Ambenu (RAEOA), Regio da Cruz Salu,  fó ona karta notifiksaun “hapara”   funsionáriu kontratadu hamutuk 1,500 resin.

Lee Mós: Tribunál Oé-cuse Adia Desizaun Kazu Kontrabandu Deskonfia Envolve Arguidu Regio Salu Atuál PA-RAEOA

Diretór Rejionál Administrasaun Estatál Rejiaun Administrativu Espesiál Oé-cuse Ambenu (RAEOA), José Tanesib Anuno.

Diretór Rejionál Administrasaun Estatál Rejiaun Administrativu Espesiál Oé-cuse Ambenu (RAEOA) , José Tanesib Anuno, ne’ebé informa ka. Pronúnsia desizaun PA-RAEOA nian ne’e, Kuarta (25/03/2026), kosnidera desizaun PA-RAOA nian ne’e afeta bá funsionamenntu servisu Administrasaun iha RAOEA.

Funsionáriu iha RAEOA hamutuk na’in-1.597 maioria kontratadu, kompostu husi nomeasaun polítika na’in-rua (2), funsionáriu ajénte administrasaun na’in-1.284, funsionáriu kontratadu na’in-250, asisténsia téknika nasionál na’in-44, asesór nasionál na’in-ualu (8) no asesór internasionál na’in-sia (9).

Diretór Rejionál Administrasaun Estatál Rejiaun Administrativu Espesiál Oé-cuse Ambenu (RAEOA) , José Tanesib Anuno  bá Jornalista sira iha  Edifísiu Munisípal Nunbei Oé-cuse Kuarta (25/03/2026), hateten, iha gabinete  Administrasaun ninia funsionariu kontratadu hamutuk 60, simu ona karta  notifiksuan,  balun hahú la tama ona servisu maibé balu sei kontinua tama servisu.

“Karta notifiksuan ne’ebé Prezidente Autoridade Rejiaun Administrativu Espesiál Oé-cuse Ambenu (RAEOA),  Regio da Cruz Salu fó bá funsionariu kontratadu sira  ha’u rona hamutuk  1,500  resin hodi hapara,  maibé  afeta tebes bá  servisu Administrasaun Finansas Oé-cuse. Agora ha’u atu lori sasán emerjensia  bá ne’ebé haruka ha’u maka atu foti karon sira ne’e, tanba ha’u laiha ona funsionáriu, entaun bolu komunidade sira bele mai foti foos sira ne’e ha’u la bele ba,”  José Tanesib Anuno  hateten.

Nia esplika, desizaun husi Prezidente Autoridade RAEOA Regio da Cruz Salu katak karta notifiksaun ne’ebé fó bá funsionariu kontratadu sira ho razaun tanba orsamentu ne’e menus,  atu  finansia  funsionariu  sira la to’o,  tanba ne’e  tenke  hapara sira depois maka Govenrnu sentrál hanoin fali  atu bolu fali ka lae tanba osan seidauk iha.

José hateten katak funsionariu sira ne’ebé servisu iha gabinete Administrasaun Estatál Rejiaun Administrativu Espesiál Oé-cuse Ambenu (RAEOA) hamutuk ema na’in-60, maibé kontratadu sira ne’e mai husi períodu lideransa oioin, inklui tempu Mari Bin Amude Alkatiri, Arsenio Paixão Bano, no Rogerio Tiago de Fátima Lobato, inklui mós Prezidente Autoridade RAEOA atuál, Regio da Cruz Salu.

Nia dehan atualmente, funsionáriu permanente iha Administrasaun Estatál RAEOA, iha de’it ema hamutuk na’in-30 resin, inklui sira ne’ebé servisu iha Sub-Rejiaun sira. Situasaun ida ne’e konsidera hanesan dezastre ida, tanba afeta direitamente bá efisiénsia servisu.

Nia fundamenta, funsionáriu sira ne’ebé iha, kategoria sofer mak barak liu, ne’ebé la kontribui ho forma efetiva bá nesesidade administrativa no operasional. Tanba falta rekursu umanu ne’ebé adekuadu, atividade simples hanesan transporta ekipamentu ka muda kadeira mós sai difísil.

“Agora dadaun iha funsionáriu permanente de’it kuaze ema na’in 30, inklui Sub-Rejiaun sira. Maibé ida ne’e hanesan dezastre ida tanba prejudika servisu. Sé maka atu foti kadeira? Tanba ne’e ha’u dehan sira katak imi mai lori kedas imi nia ema hodi foti kadeira. Ha’u halo despaisu, imi maka mai foti, la’ós ha’u maka mai foti,” dehan fonte José Anuno.

Nia afirma, desizaun atu halo fali rekrutamentu bá funsionáriu sira sei depende bá Autoridade, tanba karta ne’ebé antes fó sai la’ós aprovasaun definitiva, maibé .hanesan notifikasaun.

Nia subliña, proposta atu rekruta fali funsionáriu sei presiza hein uluk aprovasaun lei foun.  Maibé dúvida kona-bá oinsá prosesu ne’e bele la’o, no se bele mantén ka lae, liu-liu depois de suspensaun ne’ebé akontese tiha ona.

José Anuno preokupa, situasaun ne’e fó impaktu boot ba funsionamentu servisu iha diresaun hotu-hotu, tanba menus ema sai dezafiu real bá instituisaun atu ezekuta programa sira ne’ebé planeadu ona.

“Kuandu prosesu ne’e hapara, ami hasoru difikuldade tebes tanba menus rekursu umanu. Ne’e bele afeta diretamente implementasaun atividade governu nian iha terenu,” hateten nia.

Dadaun  ne’e Administrasaun  Estatál RAEÓA iha hela preparasaun atu implementa programa governu iha nivél suku, ho objetivu atu identifika suku sira no halo sosializasaun kona-ba lei sira ba komunidade durante fulan Marsu. Maibé, planu ida-ne’e agora enfrenta obstákulu boot tanba sai kolektivu husi traballadór sira.

Tuir  José Anuno  atividade sira ne’ebé planeadu atu hala’o iha terenu bele afetadu maka’as, tanba agora só Diretór sira no Xefe Departamentu de’it maka disponivel.

“Staff ne’ebé baibain fó apoiu operasional, inklui sofer sira, hotu sai ona tuir karta notifiksuan. Ne’e fó difikuldade boot atu halo movimentasaun, liu-liu kona-bá uza kareta Estadu,” hateten nia.

Nia subliña  tan katak desizaun ne’e mai husi nivel leten, no funsionáriu sira iha terenu só bele hein no ezekuta de’it. Maibé medida ida-ne’e bele lori risku ba funsionamentu Estadu, tanba ema lubuk ida mak sai iha tempu hanesan.

Funsionáriu sira ne’ebé servisu ho kontratadu iha  Rejiaun Administrativu Espesiál Oé-cusse Ambeno (RAEOA) sei remata sira-nia servisu iha loron 31 fulan-Marsu 2026.

Jornalista: Marcelino Tomae