Hatutan.com, (08 Maiu 2026) Díli-Xefe Seksaun Tránzitu No Seguransa Rodoviaria, Superintendente Asistente Polísia Afonso da Silva, informa  akontese kazu  asidente trafegu iha área Kuluhun,  Sesta (08/05/2026), haleu tuku 09:52 Otl, karreta tanki ho motór ida no   rezulta motorista motorizada Olandina do Rosario lakon vida.

Asidente trafegu iha Kuluhun rezulta Olandina do Rosario, Sesta (8/05/2026). Foto/PNTL

“Ita nia alin feto ida ho idade 25, naran Olandina do Rosario,  hela iha Aldeia Ai-Look, Kamea, Díli, lakon nia vida iha asidente ne’e,” Xefe Seksaun Tránzitu No Seguransa Rodoviaria, Superintendente Asistente Polísia Afonso da Silva, informa ba jornalista sira iha nia knaar fatin, Komandu Polísia Munisípiu Díli.

Kazu asidente ne’e dadaun motorizada ho númeru matrikula Q.1595-TL no karreta tanki ho númeru matrikula A.53.649 ne’e mós  autoridade seguransa polísia asegura ona iha Komandu Polísia Munisípiu Díli.

“Motorista ne’ebé lori karreta tanki empreza Esperança Timor Oan (ETO) ho naran inisial EPB, prosesu kazu ne’e depois akontesimentu kolega sira ba kedas iha fatin rekolla evidensia sira,”  Xefe Seksaun Tránzitu no Seguransa Rodoviaria, Superintendente Asistente Polísia Afonso da Silva esplika.

Nia hatutan, diresaun karreta ho motorizada ne’e husi Bekora mak tun mai, maibé kauza husi asidente ne’e mai husi hotu motorista na’in-rua, nune’e hein prosesu investigasaun mak determina kronolojia loloos husi asidente iha terenu.

Motorista karreta tanki mós iha ona Komandu munisípiu Dili hodi kontinua ba prosesu tuir mai, haree tuir nia kronolojia depois prosesu hotu mak infoma ba média, tanba ema lakon vida. Mate isin ohin ba mortuariu ona agora daudaun foti ona ba iha nia rezidensia.

“Tuir kronolojia iha kamera CCTV karreta tanki tula mina  konsege ultrapassa iha motorizada ne’e depois mak akontese asidente haleu tuku 09:52 Otl dadersan depois polísia to’o fatin akontese hale’u tuku 10:15 Otl halo atendimentu,” dehan Superintendente Asistente Afonso da Silva.

Kazu asidente nia prosesu ne’e iha  loron tolu nia laran prosesu tenke ba kedas iha Ministériu Públiku, labele liu loron tolu lae evidensia ne’e MP la simu ona, entaun ita esforsu para antes ba loron tolu  submete ba iha Ministériu Públiku.

Autoridade seguransa ne’e mós alerta ba motorista transporte  públiku no privadu sira tenke respeita regra tránzitu sira iha estrada, liu-liu ultrapassa karik iha parte liman loos la’o karik ho seguru.

Tuir observasun Hatutan.com  hale’u tuku 12:00 Otl família husi vítima to’o iha edifisiu  Seksaun Tránzitu Komandu munisípiu Dili, hodi hasoru malu ho kondutór karreta tanki   hamutuk  ho funsionariu husi empreza ETO ne’ebé antes ne’e hein iha Komandu Dili, parte rua  tama hamutuk  akompaña husi autoridade seguransa polísia hodi foti desizaun balun kona-ba kazu asidente trafegu iha Kuluhun ne’e.

Jornalista: Juvinal Cabral dos Santos