Tara An La’ós Solusaun Ba Problema, Ko’alia Sai Labele Rai Presaun

Hatutan.com, (01 Abríl 2026), Díli-Arsebispu Arkedioseze Metropolitana Díli, Mgr. Virgílio Kardeál do Carmo da Silva, SDB hateten, tinan ikus-ikus ne’e foinsa’e oho an liuhusi  tara an,  la’ós solusaun ba  problema, sempre iha dalan seluk hodi rezolve problema ko’alia sai ba família no kolega.

Arsebispu Arkedioseze Metropolitana Díli, Mgr. Virgílio Kardeál do Carmo da Silva, SDB. Foto/Juvinal Cabral dos Santos

“Ne’e duni importante mak buka oinsá atu hadi’a ita nia relasaun. Tara an la’ós solusaun ba ita-nia problema sira sempre iha dalan, ha’u nia hanoin iha situasaun hirak ne’e hotu ohin loron ne’e liu husi média sosiál atu komunika fasil ba ema hotu,” Dom Virgilio Kardeál do Carmo da Silva, SDB haktuir liuhusi konferénsia imprensa iha estudiu Arkedioseze Díli, Kuarta(01/04/2026).

Infelizmente, Dom Virgílio tenik, tara an ne’e,  bele dehan katak indikasaun ida ne’ebé la’ós agora de’it mais maibé iha tinan hira ikus ne’e númeru tara an aas uitoan iha munisípiu balun (dadus sem duvida parte polísia hatene liu).

“Maibé hanoin katak husi númeru sira ne’e loos duni agora pergunta mai ita mak tenke husu saida mak sai razaun ema atu oho an liu-liu tara an,” Dom Virgílio dehan.

Dom Virgílio hateten, tara an barak liu ne’e foin-sa’e sira, Satán hanesan liu-liu feto, nune’e ohin loron  tenke buka hatene saida mak sai razaun ba ema tara an.

“Razaun bele iha oin-oin, ida bele ohin ita dehan presaun bele husi família, dalaruma presaun sosiál, presaun finanseira, buat ne’e mosu dalaruma relasaun ne’e duni iha razaun oioin, bele lori ema atu konklui sira nia vida. Loos duni, sempre dehan katak ida-ne’e la’ós dalan ida ne’ebé di’ak ba ita sarani, ba Timoroan kultura tara an ne’e loos duni ita hotu lakohi, maibé dala barak akontese”, Dom Virgílio afirma.

Dom Virgilio esplika, parte husi Igreja ninian nafatin apela ba joven sira labele buka dalan ida tara an ninian.

“Sé ita nia fiar hanorin katak sé tara an ne’e hasai vida ne’ebé Maromak fó ba ita hasai, ne’e duni ita bá Maromak nia oin ne’e ita sei hatan oinsá ba Maromak,” Dom Virgílio Kardeál do Carmo da Silva afirma tan.

Problema ida ohin loron tara an ne’e mós dalaruma falta komunikasaun, komunikasaun ne’e bele hahú iha família, komunikasaun bele hahú iha belun sira ne’e.

“Ita nia problema  atu rai ba ita nia an de’it, problema ita rai mesak ba ita-nia an ida ne’e wainhira la hetan dalan, uniku dalan mak ita buka di’ak liu atu termina ita nia vida,” Dom Virgílio tenik.

Tempu paskua ne’e fila fali bá Jesus nia moris ias atu bele la’ós hanorin de’it, bele kurizi mós  ita hotu ba Timoroan hotu wainhira iha situasaun sira hanesan ne’e, dalan ida-ne’e la’ós  di’ak liu ba ema, no la’ós dalan sarani nian.

Portavós Polísia Nasionál Timor-Leste (PNTL), Superintendente-Xefe Polísia João Belo dos Reis. Foto/Juvinal Cabral dos Santos

Iha sorin seluk Portavós Polísia Nasionál Timor-Leste (PNTL), Superintendente-Xefe Polísia João Belo dos Reis, Kuarta (01/04/2026) liuhusi Konferensia Imprensa iha Komandu jerál PNTL Caicoli, haktuir, husi tinan kotuk 2025 to’o agora fulan-Marsu, tinan ne’e polísia regista kazu tara an hamutuk na’in-23 maioria feto.

“Dadus ne’ebé ami rekolla liu-liu kona-ba kazu suisidu (oho an), iha tinan 2025 ita rezistu kazu suisidu hamutuk na’in-16 tara an, iha 2026 hahú husi Janeiru to’o mai iha fulan Marsu ita registu kazu tara an hamutuk na’in-6 inklui feto ida tara an maibé la konsege mate,” Portavós Polísia Nasionál Timor-Leste (PNTL), Superintendente-Xefe Polísia João Belo dos Reis informa

PNTL apela nafatin ba inan-aman, família, kolega, no belun sira no alin sira ne’ebé iha problema ho piskolijia no mós mental, karik iha problema ruma komunika ho imi-nia família, no kolega sira atu bele solusiona problema ne’ebé mak ita hasoru.

“Mensajen ba inan-aman sira atu kontrola ita-nia oan sira, karik sira iha problema hakbesik an ba komunika ho sira ho maneira ne’ebé di’ak nune’e problema ne’ebé sira hetan bele buka solusaun hamutuk, labele husik ita-nia oan sira rezolve problema mesak  to’o sira la hetan solusaun sira hili dalan ne’ebé mak ita hotu la espera,”  Superintendente-Xefe Polísia João Belo dos Reis hateten.

Nia haktuir, husi kazu sira tara an ne’e, indikasaun jerál ne’ebé Polísia rekola, liu-liu kazu problema sosiál, problema psikolijia joven sira-nia liuliu ligasaun ba namora, depois problema ne’ebé rai kleur iha nia laran, ne’ebé la konsege rezolve.

Kazu hirak ne’e rejista makaas husi Munisípiu Ermera, depois mak Munisípiu sira seluk. Kazu tara an ne’e kompostu husi feto nain-16, restu mane hotu.

Jornalista: Juvinal Cabral dos Santos