Hatutan.com, (19 Maiu 2026), Díli –  Defensóriu Públiku Jerál (DPG- sigla portugés), rejeita  akuzasaun famíliarizmu bá iha rekrutamentu ofisiál Justisa bá Defensóriu Públiku  Timor-Leste. 

Defensór Públiku Jerál Câncio Xavier .

Defensór Públiku Jerál Câncio Xavier bá  Hatutan.com  iha Palásiu Prezidensiál, Tersa (19/05/2026), konfirma katak prosesu rekrutamentu ofisiál Justisa iha Defensóriu Públiku la’o di’ak no tuir lei vigente, no to’o agora laiha ema ida maka prova katak prosesu ne’e la loos ka involve famíliarizmu.

Nia esplika katak kandidatu sira ne’ebé konkore iha lista ne’e hotu-hotu hatene ona regra no mekanizmu rekrutamentu, tanba instituisaun públika ona lista no esplikasaun sira klaru ba públiku. Tuir nia, kandidatu sira rasik maka iha obrigasaun atu lee no komprende avizu ne’ebé publika.

Câncio Ximenes, hateten kandidatu na’in 10 ne’ebé tama iha lista ne’e bazeia ba Dekretu-Lei Nú. 19/2012, Artigu 17, ne’ebé determina katak sidadaun sira ne’ebé servisu liu tinan ida iha Defensóriu Públiku iha direitu atu tuir formasaun.

“Lista na’in-10 ne’e tama tanba sira servisu ona kleur iha Ofisiál Justisa iha Defensóriu Públiku, tuir atribuisaun Dekretu-Lei ne’ebé Governu halo,”  Câncio Xavier argumenta hodi hatan kona-bá. Naran kanddiatu sira ne’ebé públika no selesionadu husi numéru 01 to’o númeru 10 la tuir teste eskrita no oral, maibé teki-teki de’it sira-nia naran ademetidu no públika iha Jornál Repúblika.

Nia hatutan, bainhira kandidatu sira tama ona iha formasaun, no la konsege liu, automatikamente sira sei lakon sira nia pozisaun hanesan ofisiál Justisa temporáriu, tanba sira tuir ona prosesu konkursu.

Nia agrumenta, iha kandidatu balun ne’ebé hetan valór di’ak iha klarifikasaun, maibé lei maka determina sira ne’ebé merese atu tuir formasaun. Tanba ne’e, nia husu bá parte sira ne’ebé kestiona lista ne’e atu lee didi’ak avizu no dispozisaun legál sira ne’ebé públika dala barak ona.

Nia afirma, dekretu-Lei Nú. 19/2012, Artigu 17, fó kompeténsia bá Ofisiál Justisa sira tantu iha Tribunál, Ministériu Públiku no Defensóriu Públiku hodi tuir formasaun

“Ha’u la gosta ko’alia kona-bá famíliarizmu. Kuandu sidadaun ida iha kapasidade no kbiit hodi konkore no pasa, tenke respeita rezultadu. Iha kandidatu balun hetan valór 11 to’o 13  pasa, maibé balun hetan valór to’o 15 mós la pasa, tanba kompetisaun ne’e rigorozu no presiza haree didi’ak lista sira ne’e,” Câncio   Xavier hateten.

Jornalista : Marcelino Tomae