Mane ida Deskonfia Moras Mentál Sona Reinaldy To’o Mate no Na’in-rua Seluk Kanek

Hatutan.com, (06 Abríl 2026), Díli-Aktu brutál ida halo hakfodak rezidente sira iha Aldeia Naroman, Suku Madohi, Postu Administrativu Dom Aleixo, Munisípiu Díli, hale’u tuku 15:59 OTL. Mane ida deskonfia moras mentál ho insiál FXC lori tudik rua sona vitíma Reinaldy dos Santos to’o lakon vida no hakanek mós abitante na’in-rua seluk Junidia Neno Caet ho Vitalis Colo.

Foto/Ilustrasaun

Vitíma Reinaldy dos Santos ho idade tinan-neen (6) lakon vida, vítima na’in-rua seluk kanek ne’ebé kanek grave  Junidia Neno Caet ho idade tinan-lima (5) sona iha parte kotuk laran no kelen, no vítima Vitalis Colo idade  tinan 21 hetan  kanek iha parte kotuk laran.

Polísia Servisu Investigasaun Kriminál Munisípiu Díli ho patrollamentu to’o kedas iha fatin akontesimentu hodi  halo atuasaun no  lori kedas matebian no vítima sira kanek ba iha Sentru Saúde Comoro hodi halo tratamentu.

Polísia Servisu Investigasaun Kriminál ho Forensik mós lori  matebian Reinaldy Dos Santos nia mate isin ba iha Ospitál Nasionál Guido Valadares (HNGV) hodi submeter ba prosesu autopsia.

“Ha’u rona vizinu dehan ha’u nia oan mós kanek, ne’e mak ha’u halai mai  lalais mai ospitál, ida sona ne’e ha’u la haree ho matan, viziñu ida mak ba fó hatene ha’u halai mai lalais iha ospitál,” vítima Junidia nia aman Pedro Caet informa ba jornalista sira iha Sentru Saúde Comoro.

Aman husi vítima ne’e haktuir, labarik sira halimar hela iha viziñu sira besik ida sona ne’e no la nota katak suspeitu FXC halo asaun ida brutal hodi rezulta Junidia kanek no nia maluk Reinaldy dos Santos to’o lakon vida.

“Uluk-uluk FXC tanba moras mentál nia hakilar hela de’it, mais bai-bain nia bá misa ne’e normal no bainhira nia hakilar ona, feto sira labele ba kaer só mane mak ba kaer mais na’in-tolu ka haat mak bele, nia hakilar sai nia sempre kaer tudik entaun ita la besik,” Pedro Caet haktuir.

Nia hatutan, suspeitu FXC refere foin mak halo kanek ema ohin ne’e, durante nia moras ne’e hakilar foti tudik ema labele besik nia, maske durante ne’e nia uza kro’at maibé la foti asaun to’o sona ema.

Nia dehan, ema sira ho kondisaun moras mentál tenke lori ba iha sira nia fatin ne’ebé prepara atu nune’e bele halo tratamrnut ba sira. La bel husik hela de’it iha uma to’o ikus situasaun ne’ebé la espera bele akontese hanesan ne’e.

Daudaun Polísia asegura ona suspeitu FXC no  ba detein iha sela Komandu Polísia Munisípiu Díli.

Jornalista: Juvinal Cabral dos Santos