Katuas-Oan Baku Ferik-Oan Nu’udár Inspetora Asistente Polísia iha Kuartel Jerál PNTL

Hatutan.com, (09 Abríl 2026), Díli– Polísia Nasionál Timor-Leste (PNTL) halo identifikasaun ba suspeitu VC iha Unidade Pesoál Vulneral (VPU-sigla ingles) tanba komete violénsia doméstika hasoru nia ferik-oan ho inisiál ODS nu’udár membru PNTL ho diviza Inspetora Asistente Polísia.

Suspeitu ho vitíma hasoru malu to’o suspeitu baku vitíma hanesan membru PNTL ida. Foto/Juvinal Cabral dos Santos

Kazu agresaun fiziku ne’ebé akontese iha resintu Kuartel Jerál PNTL, Kinta (09/04/2026),  tuku 10:30 Otl, halo membru PNTL sira ne’ebé serivus iha Kuartel Jerál PNTL liluliu ofisiál membru Polísia sira ne’ebé kolokadu iha Departamentu Aprovizionamentu, hakfodak tanba derrente de’it, la iha udan-anin, vitíma ODS hala’o ba dirasaun Servisu Aprovizionamentu Kuartel Jerál PNTL nian hodi husu ajuda tanba nia katuas-oan VC baku nia.

Informasaun husi parte Polísia balu katak suspeitu VC halo agresaun fiziku hasoru ODS nu’udár ferik-oan tanba de’it deskonfia ferik-oan blokeia tiha nia númeru telefone no halo nia kontaktu dala uain la tama. Ho nune’e,  VC foti inisiativa ba direta fatin servisu ODS nian hodi buka hatene.

Kazu ne’e rejista ona ho Nuk: 0128/26-PNSIK ho alegasaun krime maus-tratu ka violénsia doméstika iha Timor-Leste krime grave ida ne’ebé fó kastigu prizaun tuir Kódigu Penál (Artigu 154°, 155°, 156°) no Lei Kontra Violénsia Doméstika (Lei 7/2010).

Jornalista: Juvinal Cabral dos Santos