Kazu Baku Estudante Ida Virál, PNTL Asegura Suspeitu Na’in-Lima

Hatutan.com, (17 Abríl 2026), Díli-Komandante Polísia Nasionál Timor-Leste (PNTL) Munisípiu Dili, Komisariu Asistente Polísia Orlando Gomes,Polísia asegura ona suspeitu na’in-lima ne’ebé virál baku estudante ida iha Universidade da Paz (UNPAZ).

Suspeitu sira ne’ebé baku estudante ida iha UNPAZ no virál. Foto/Juvinal Cabral dos Santos

“Kazu ne’e akontese iha Kuarta (15/04/2026) hale’u tuku 16:00 Otl, iha resintu UNPAZ ne’ebé ema kauze na’in-10  baku lesuk vítima ida ne’ebé mak virál iha média sosiál. Kona-bá kazu ida-ne’e mai halo keixa iha Eskuadra Polísia Dom Aleixo nune’e ekipa Taksforce  ba  UNPAZ koordena ho seguransa UNPAZ no Ofisiál Polísia Suku (OPS) hodi buka tuir suspeitu, tanba iha momentu ne’ebá suspeitu halai ses tiha husi fatin akontesimentu,” Komisáriu Asisténte Polísia Orlando Gomes ba jornalista sira iha nia knaar fatin, Eskuadra Polísia Dom Aleixo, Sesta(17/04/2026).

Komandante Munisípiu Díli haktuir, iha loron 16 Abríl, Taskforce koordena ho OPS buka tuir suspeitu sira nia paradeiru to’o kedas iha sira nia rezidénsia halo kapturasaun suspeitu na’in-lima.

Nia afirma, depois halo tiha identifikasaun ba suspeitu na’in-lima, husi vítima hateten katak sira halo ona keixa uluk iha PCIC.

Autoridade seguransa polísia konsidera aktu sira ne’ebé suspeitu sira halo ida-ne’e krime agresaun fíziku simples hasoru vítima na’in-tolu Izaquel, Zito Soares, Manuelito da Costa.

Komandu Polísia Munisípiu Díli apela ba estudante sira labele lori problema husi li’ur tama ba areadores universidade, ka eskola sira tanba ne’e fatin ba hodi estuda no buka matenek la’ós fatin halo krime.

Jornalista: Juvinal Cabral dos Santos