Uncategorized
PCIC Halo Buska no Apreensaun iha Edifisiu TIMOR GAP
Hatutan.com, (29 Abríl 2026), Díli– Polísia Sientífiku no Ivestigasaun Kriminál (PCIC- sigla-portugés), Kuarta (29.04.2026), hale’u tuku 09:00 dadeer Otl, halo buska no apreensaun iha edifisiu empreza estatál TIMOR GAP iha CBD 01 Timor Plaza.
PCIC halo buska iha Edifisiu TIMOR GAP,E.P iha Timor Plaza, Kuarta (29/04/2026). Foto/Marcelino Tomae
Tuir observasaun Hatutan.com nian, katak iha asaun buska no apreensaun husi autoridade polisiál PCIC ne’e diretamente ba dirijente TIMOR GAP, E.P ida ho inisiál AC nia eskritóriu.
Iha buska no apreensaun ne’ebé hala’o durante oras tolu nia laran ne’e, tuir informasaun katak PCIC halo ezaminasaun ba objetu importante balun, hanesan komputadór, laptop, telemovel, USB ho dokumentu importante sira balu tan.
Jornalista sira husi Média oin-oin hein iha resepsionista atu foti imajen bá atividade buaska no apreensaun ne’e, maibé Prezidente TIMOR GAP,E.P, Rui Maria Alves Soares, la autoriza atu jornalista sira asesa tama to’o iha edifisiu TIMOR GAP nian.
“Sé maka konvida imi (jornalista-red) mai, imi sai husi ne’e, hodi fó espasu bá ami atu hala’o servisu,” Rui Maria Alves Soares hateten hodi taka odamatan ba jornalista sira.
Tuir informasaun katak atuasaun buska no apreensaun ne’e kontinuasaun husi buska ne’ebé Komisaun Anti-Korrupsaun (CAC, sigla portugés) halo tiha ona iha loron 17 Dezembru 2025, ba dirijente ho insiál AC ne’e nia rezidénsia privadu iha Aldeia 03, Suku Comoro, Postu Administrativu Dom Aleixo, Munisípiu Díli.
Deskonfia dirijente TIMOR GAP, E.P ho inisiál AC ne’e iha relasaun ho kazu projetu irrigasaun iha Munisípiu Aileu no mega projetu balun iha Suai, ne’ebé tuir relatóriu CAC nian katak kazu hirak ne’e iha ona prosesu investigasaun ne’ebé artinje ona 60%.
Informasuan ne’ebé Hatutan.com rekolla husi fontes oioin husi CAC katak kazu projetu irrgasaun Aileu ne’e iha ligasaun ho maun-alin rasik ho suspeitu inisiál AC ne’ebé nu’idar dirijente TIMOR GAP,E.P iha kompañia kontaktor ida inisiál L.
Jornalista: Marcelino Tomae