MJ Husu Sidadaun Sira iha Faktu Funsionáriu Prátika Broker Iha Instituisaun Públiku Bele Hato’o Keixa Iha PNTL

Hatutan.com, (30 Abríl 2026), Díli-Ministru Justisa (MJ) Sergio de Jesus Fernandes da Costa Hornai, husu sidadaun sira ne’ebé sai vítima funsionáriu prátika broker hodi trata dokumentu ofisiais Timor-Leste nian iha instituisaun públiku sira hato’o keixa iha Polísia Nasionál Timor-Leste (PNTL).

Lee Mós: PNTL Asegura Broker Ne’ebé Trata Dokumentu Ofisiál Sira

Ministru Justisa (MJ) Sergio de Jesus Fernandes da Costa Hornai

“Sé broker iha ita kaer, ita boot sira kaer ha’u bele kaer, hodi lori ba iha autoridade polísia porque ita la admite iha fatin ida ne’ebé fatin atu funsionariu sira servisu ba iha ne’ebá para atu bele fó asistensia ba iha sidadaun sira, atu bele mai trata sira nia dokumentu atu halo interasaun instituisaun públiku ninian, ho sidadaun sira ba buat ne’ebé defini tiha ona iha Leí  servisu instituisaun públiku estadu nian, tantu iha diresaun servisu registu notariadu no servisu sira seluk”, Ministru Justisa (MJ) Sergio de Jesus Fernandes da Costa Hornai ba jornalista sira iha Palásiu Governu, Kinta (30/04/2026).

Ministru Justisa informa, funsionáriu balun mak inklui iha broker tenke halo medida, primeiru tenke halo averiguasaun liuhusi Inspetór Auditóriu atu haree, ka sira iha Xefe Departamentu, Diretór Nasionál, Diretór Jerál para atu haree, oinsá mak atu bele kontrolu ba iha sidadaun sira.

“To’o agora dadaun ha’u hanoin teknolojia ida avansadu ema hotu-hotu bele halo denunsiu, halo keixa, naran katak nia iha faktu no prova  bele aprezenta iha instituisaun kompetente,” Ministru Justisa informa.

Ministru Sergio de Jesus Fernandes da Costa Hornai hateten, antes ne’e iha broker, buat balun halo ona medida hodi halo transferensia balun partisipa ba iha sansaun .

“Sansaun ida mak ita  haree ninia gravidade ne’ebé nia involve, defende ba iha nia averiguasaun ne’ebé auditoria ba Inspetor halo iha de’it infrasaun administrativu, bele iha seluk kriminalidade tenke partisipa ba iha Ministériu Públiku (MP), balun iha ona ita partisipa mais ida-ne’e segredu ha’u labele pronunsia iha ne’e”,  Ministru Justisa afirma.

Rekorda fali katak, iha semana balun liubá, iha loron 10 fulan-Abríl 2026, Polísia Nasionál Timor-Leste (PNTL) asegura sidadaun ida ho inisiál A iha área Taibessi, Díli tanba halo atividade hanesan broker hodi husu osan komisaun ba trata dokumentu ofisiál sira Timor-Leste nian.

Suspeitu A durante ne’e halo públikasaun iha média sosiál Facebook oferese aan bele trata dokumentu ofisiál Timor-Leste nian, hanesan Billete Identidade (BI), Sertidaun RDTL, Passaporte, Karta Kondusaun no seluk nia kobra interesadu sira kada ema husi US$20.00 to’o US$100.00.

Jornalista: Juvinal Cabral dos Santos