Hatutan.com, (10 Abríl 2026), Díli– Polísia Nasionál Timor-Leste (PNTL) asegura sidadaun ida ho inisiál A iha área Taibessi, Díli tanba halo atividade hanesan broker hodi husu osan komisaun ba trata dokumentu ofisiál sira Timor-Leste nian.

Lee Mós: La Tolera Broker Sira iha Diresaun-Jerál Servisu no Rejistu Notariadu

PNTL asegura broker ida ne’ebé trata ema nia dokumentu ofisial sira hodi buka komisaun (komisi). Foto/Juvinal Cabral dos Santos

Suspeitu A durante ne’e halo públikasaun iha média sosiál Facebook oferese aan bele trata dokumentu ofisiál Timor-Leste nian, hanesan Billete Identidade (BI), Sertidaun RDTL, Passaporte, Karta Kondusaun no seluk no kobra interesadu sira kada ema husi US$20.00 to’o US$100.00.

Portavós PNTL Superintendente Xefe Polísia João Belo dos Reis, Sesta (10/04/2026), informa  Diresaun Servisu Investigasaun Kriminál (DSIK) asegura sidadaun ho inisiál A tanba sidadaun ne’e públika informasaun katak nia bele trata dokumentu ofisiál nasaun nian.

“Polísia halo monitorizasaun no simu mós keixa balun husi ita nia sidadaun sira ne’ebé sente ofendidu, sente lakon ba hahalok suspeitu A nian, entaun komesa a Kuarta (08/04/2026), Polísia monitoriza atividade husi sidadaun ne’e no kaptura nia iha parte Taibessi, agora dadaun iha Polísia nia liman halo hela prosesu identifikasaun ba nia,” Superintendente Xefe Polísia João Belo dos Reis informa ba jornalista sira iha Kuartel  Jerál PNTL.

Portavós PNTL afirma, Polísia konsidera kazu ne’e fragalante delitu tanba dokumentu sira ne’ebé nia uza lori bosok ema hodi trata ema nia dokumentu lansa informasaun falsu liuhusi nia ID Facebook naran inisiál MMN maibé nia naran loos inisiál A.

“Evidénsia mak hanesan ema nia sertidaun RDTL, BI kopia balun, no mós kartaun eleitorál. Nia lansa informasaun katak liuhusi nia dokumentu sira ne’e bele trata ho lalais iha tempu badak  nune’e ema selu nia husi US$20.00 to’o US$100.00 bainhira nia trata ema nia dokumentu ho lalais,” João Belo informa.

Nia salienta, PNTL sei konsulta nafatin ho parte Ministériu Públiku (MP),  atu prosesu tuir mai, ne’ebé agora daudaun halo hela prosesu identifikasaun.

Evidénsia seluk ne’ebé Polísia prende mós motór Beat-streat ida, sertidaun RDTL balun, kartaun eleitorál, BI iha nia liman no depois iha mós ba dokumentu falsifikasaun sira seluk kona-bá sira uluk involve iha kompañia Rai Makmor ne’ebé sempre bosok ema,” Superintendente-Xefe Polísia João Belo dos Reis haktuir.

Autoridade seguransa apelu nafatin  ba públiku katak dokumentu nasaun nian parte iha Notariadu dokumentu sira ne’e  balun la selu (trata gratuita), karik ema balun bosok hodi selu husi kotuk informa ba polísia halo atuasaun.

Jornalista: Juvinal Cabral dos Santos