Kazu Asédiu Seksuál iha UNTL, Dosente Na’in-Rua Hetan Suspensaun ho In-Atividade

Hatutan.com, (13 Maiu 2026), Díli– Dosente nain-rua iha Universidade Nasionál Timor Lorosa’e (UNTL) ne’ebé komete kazu asédiu seksuál  hetan konsekuénsia suspensaun no la hala’o aviidade hanesan dosente.

Lee Mós: JU’S Lamenta Desizaun CFP Fó Deit Xamada Atensaun Ba Kazu Asédiu Seksuál iha TIC Timor

Ilustrasaun kampaña kontra asédiu seksuál husi UN Women

Dosenta na’in-rua ne’e, ida ho naran inisiál MB hetan pena in-atividade (la halo atividade)  iha UNTL ho muldura tempu tinan rua  no Dosente ho naran insiál MS hetan suspensaun durante fulan tolu.

Komisáriu Protokóliu Asuntu Disiplinár Komisaun Funsaun Públika, Agapito da Conceição bá  Jornalista sira iha nia Kna’ar fatin,  Kuarta (13/05/2026) informa CFP fó ona sansaun disiplinár bá dosente na’in-rua; MF ho MS  husi UNTL tanba envolve iha kazu asédiu seksuál.

“Kada pesoál  la hanesan ho seluk. Ita fó pena tuir rezultadu investigasaun no gravidade hahalok ne’ebé komete, hanensan Dosente  MB hetan pena in-atividade durante tinan-rua tanba kazu ne’ebé konsidera grave liu no envolve kontaktu físiku, enkuantu Dosente MS hetan suspensaun durante fulan tolu,” Komisáriu Agapito da Conceição hateten.

Komisáriu Agapito hatutan, iha  tersa 12 Maiu  2026, CFP halo  audénsia ho deputadu sira iha Parlamentu Nasionál, deputadu sira husu kona-bá diferensa sansaun ne’ebé CFP fó bá dosente rua ne’e, ida hetan pena in-atividade durante tinan rua no ida seluk hetan suspensaun durante fulan-tolu.

Tuir nia katak, desizaun ne’e bazeia bá rezultadu investigasaun ne’ebé CFP halo hamutuk ho diresaun investigasaun UNTL, katak kada kazu iha gravidade diferente, tanba ne’e maka pena ne’ebé aplika mós la hanesan.

Nia subliña, desizaun husi CFP mós inklui mudansa ba rejime jerál no proíbe dosente rua ne’e atu hanorin fila-fali,  Karta desizaun  husi CFP  ne’e submete ona  reitór UNTL tenke asegura MB no MS  atu la bele autorizasaun atu kontinua hanorin iha UNTL.

“Kazu barak komete husi funsionáriu kontratadu sira, maibé vítima sira dala barak tauk atu ko’alia. Tanba  ne’e mak ami sempre husu bá vítima sira atu labele tauk tanba vitíma sira-nia identidade ne’e  ami sei proteze,” hateten nia.

Agapito mós hateten katak kazu asédiu seksuál la akontese de’it iha Dili, maibé mós iha munisípiu sira seluk,  CFP fó ona sansaun oioin hanesan repreensaun eskrita, suspensaun, in-atividade no demisaun, depende bá  kazu ne’e ninia gravidade sira.

Nia esplika katak asédiu seksuál la’ós de’it kontaktu físiku, maibé mós mensajen liu husi WhatsApp ka Messenger bele konsidera nu’udar asédiu seksuál.

Tuir informasaun ne’ebé fó sai, kazu ida seluk husi Fakuldade Agrikultura seidauk tama bá CFP atu hetan desizaun final. Maibé, dosente MB no MS submete ona rekursu kontra desizaun CFP,  katak sé iha evidénsia foun, komisaun Funusaun Públika sei analizé fila-fali kazu ne’e.

“Se karik la iha evidénsia foun ne’ebé forte, CFP bele aumenta tan pena hasoru sira,” nia dehan.

Jornalista: Marcelino Tomae