“Avoka Hotu Kazu Inkéritu iha CAC Ne’e Ha’u Nia Sasán”

Hatutan.com, (14 Maiu 2026), Díli– Prokuradór Jerál Repúblika (PGR-sigla Portugés),  Nelson de Carvalho, klarifika razaun  hatun despaixu avokasasun bá Kazu inkéritu krime korrupsaun sira iha Komisaun Anti-Korrupsaun (CAC)  tanba prosesu penál bá krime korrupsaun ne’e  iha Ministériu Públiku  nia kompeténsia.

Lee Mós: PDHJ Sei Husu Fiskalizasaun Abstrata Bá Despaixu PGR Avoka Prosesu Inkéritu Iha CAC

Prokuradór Jerál Repúblika, Nelson de Carvalho. Foto/Marcelino Tomae

Prokuradór-Jerál Repúblika, Nelson de Carvalho, bá Jornalista sira hafoin partisipa iha Aniversaríu PCIC bá dala-12 iha salaun mutiosos, Díli, Kinta (14/05/2026), klarifika   katak kona-bá desizaun atu avoka hotu kazu inkéritu sira iha CAC ne’e kompeténsia Ministériu Públiku nian.

Nia hateten, razaun tuir buat ne’ebé konsidera di’ak, maibé desizaun ne’e bazeia ba kompeténsia legál Ministériu Públiku nian,  katak prosesu hotu iha Ministériu Públiku, nia bainhira  hakarak avoka kazu ida, bele halo tiha ona laiha impedimentu ruma.

“La’ós tanba ha’u laiha ona konfiansa bá CAC. Ha’u mós nunka iha dezentendimentu ho CAC. Sira de’it maka ko’alia iha média online, jornál no televizaun sira, maibé ha’u rasik nunka ko’alia kona-bá dezentendimentu ho CAC,” PGR Nelson de Carvalho hateten.

Nia akresenta tan , sé Komisáriu CAC konsidera PGR halo abuzu podér, bele halo partisipasaun tuir mekanizmu legál sira ne’ebé eziste.

Maski nune’e, PGR reafirma katak delegasaun no avokasaun prosesu sira ne’e kompeténsia Ministériu Públiku nian, tanba  kazu sira ne’ebé agora dadaun avokadu husi CAC sei sai nafatin hanesan nia “sasán”, to’o tempu nia deside atu foti fila fali  husi CAC.

“Maibé delegasaun   Ministériu Públiku ne’e kompetensia, agora  ha’u nia sasán maka sira iha to’o tempu ha’u husu fila fali, ha’u  tenke husu fila ka, tanba ne’e ha’u nia sasán ne’e. Agora ha’u nia sasán tiha nusa  ha’u husu fila fali la bele,”  nia hateten.

Iha  loron 03 Fevereiru 2026, Prokuradór Jerál Repúblika, Nelson de Carvalho, hasai despaixu ida hodi oriente ba  Prokuradór Repúblika Koordenadór hotu-hotu atu avoka (foti fila-fali) prosesu inkéritu sira kazu korrupsaun ne’ebé antes delega ona bá Komisaun Anti-Korrupsaun (CAC).

Despaixu  ho númeru 14/PGR/II/2026, Prokuradór Repúblika sira hetan orientasaun atu halo avokasaun prosesu sira iha prazu máximu loron lima (5), hodi garante katak prosesu investigasaun hotu fila-fali ba kontrolu Ministériu Públiku.

Iha despaixu ne’e mós hatete katak depois  avokasaun, Prokuradór Repúblika Koordenadór sira tenke haruka kedas relatóriu ba Gabinete Prokuradór-Jerál Repúblika, hodi fó informasaun kona-ba prosesu sira ne’ebé avoka ona, inklui númeru rejistu NUC.

Medida ida ne’e bazeia ba dispozisaun Konstituisaun Repúblika Demokrátika Timor-Leste no Estatutu Ministériu Públiku, hodi reforsa Papél Ministériu Públiku iha prosesu investigasaun kriminál.

Despaixu ne’e mós distribui bá koordenadór unidade relevante sira no Prokuradór Repúblika hotu-hotu, atu asegura implementasaun efetiva husi medida ne’e.

Jornalista: Marcelino Tomae