Projetu “New CAC Office Building Construction” ho Kustu US$198,612.61 Atraza

Hatutan.com, (23 Maiu 2026), Díli–  Projetu konstrusaun edifísiu foun Komisaun Anti Korrupsaun (CAC-sigla portugés)  ho kustu  US$198,612.61, la’o atraza  tanba obra refere hahú iha tinan 2025 to’o agora seidauk termina.

Kuadru avizu projetu konstrusaun edifisiu CAC. iha Farol, Díli. Foto/Marcelino Tomae

Projetu  konstrusaun ne’e  implementa  husi Ministériu Planeamentu no Investimentu Estratéjiku (MPIE) liu-husi IX Governu Konstitusionál hahú  iha  tinan 2025.

Obra ne’e ho naran “New CAC Office Building Construction” no utiliza númeru kontratu SSS/097/MPIE-2025, Projetu ne’e iha valor kontratu hamutuk US$198,612.61 no kompañia SELENIA ACJ Unipessoal, Lda maka ezekuta.

Komisáriu Komisaun Anti Korrupsaun Rui Pereira dos Santos, Sesta (22/05/2026), konfirma katak bá projetu ida-ne’e Implementa husi MPIE no nia orsamentu  mai husi orsamentu Jerál Estadu. 

Nia esplika orsamentu ba projetu ne’e husi  Grande Projetu ne’ebé  iha institusaun balun nia orsamentu la konsege ezekuta, nune MPIE  hakarak tulun CAC   no mós  ajénsia notisioza Tatóli,I.P.

“Edifísiu rua ne’e, tatóli ho CAC, maibé ami nian maka la’o tarde uitoan tanba kompaña mak la hanesan, ami nia kompaña maka la’o lentu liu, maibé ami husu ona sira atu aselera,  ne’ebé  pagamentu maka foin rekomenda iha  loron hirak liu-bá, pelumenus sira tenke aselera,”  Komisáriu CAC Rui Pereira dos Santos hateten.

Nia dehan,  projetu bá edifisiu ne’e, empreza SELENIA ACJ Unipessoal, Lda kontratu direita ho  Ájensia Dezentendimentu Nasionál (ADN) ho MPIE,  CAC hanesan benefisiáriu, servisu hamutuk ho enjineiru  ADN ninian.

Projetu konstrusaun edifisiu CAC. Foto/Marcelino Tomae

“Ita nia kompaña Timor oan sira balun dala ruma hala’o servisu di’ak, hanesan Tatóli nian halo hotu, maibé  sira hotu ona, ami nian dezde tinan kotuk,  to’o agora seidauk finaliza, maibé  tanba saída paradu, tanba ami maka husu troka kalen,  tanba ADN aprova material hanesan kalen tuir BoQ ne’e,  kalen Austrália nian, hanesan Tatóli nian, maibé kompaña  bá hola fali  kalen Xina nian, ida-ne’e liu fulan tolu de’it kalen sira ne’e bele buradu ona,” nia hateten.

Komisáriu Rui Pereira dos Santos haktuir katak Komisaun Anti Korrupsaun husu atu troka material balu iha projetu konstrusaun edifísiu tanba haree kualidade la di’ak no bele lori risku ba seguransa edifísiu nian.

“Tanba ne’e ami haree katak tenke troka, tanba ami halo inspensaun ba projetu sira tenke ho kualidade. Maibé iha nia matan laran, buat aat ami simu de’it ne’e la bele, tanba ne’e maka ami husu troka. Ami husu dala rua ona, foin dadauk sira troka uza krakton, maibé haree atu monu tun ona, tanba ne’e ami husu ba MPIE atu uza fali bondex,”  Komisáriu Rui Pereira esplika.

Komisáriu Rui dehan tan katak projetu edifísiu CAC ne’e gasta orsamentu boot, liu husi US$198 resin, ne’ebé inklui instalasaun ekipamentu hanesan meza no kadeira. Nia hateten edifísiu refere iha sela no sala investigasaun hamutuk lima (5).

Obserasaun Hatutan.com nota katak  projetu  ne’e seidauk remata maske hahú dezde tinan kotuk. Parte balun hanesan estrutura leten, instalasaun kalen, no akabamentu seidauk kompletu.

Jornalista: Marcelino Tomae