Detidu Ida Halai Lakon iha Tribunál Judisiál Primeira Instánsia Oé-Cusse

Hatutan.com, (26 Maiu 2026) Díli-Prizioneiru ka detidu  ida ho identidade Câncio Mauno, Sabádu (23/05/2026), hale’u tuku 18:00 Otl, halai lakon husi Tribunál Judisiál Primeira Intánsia Oé-Cusse (TJPIO) hafoin partisipa iha juglamentu.

Detidu Câncio Mauno halai husi TJPIO, Sábadu (23/05/2026). Foto/Espesiál

Kronolojia husi Polísia Nasionál Timor-Leste (PNTL) Rejiaun Administrativu Oé-Cusse Ambeno (RAEOA) katak iha Sábadu ne’ebá Guarda Prizionál lori detidu Câncio Mauno mai submete ba julgamentu iha TJPIO, maibé depois juglamentu detidu ne’e hala’i tiha no Guarda Prizionál sira la hetan nia ain-fatin.

Komandante Polisia Nasionál Timor-Leste (PNTL) Rejiaun Administrativa Espesial Oe-cusse Ambeno (RAEOA), Superintendente-Xefe Polísia, Nicolau F. da Costa, Tersa (26/05/2026),  konfirma Guarda Prizionál na’in-tolu akompaña prizioneiru ka detidu ne’e mai julgamentu iha TJPIO, maibé  lakon kontrolu husi ekipa prizonál hodi rezulta prezu ka detidu ne’e husi Suku Taiboko, Aldeia Makela  halai lakon.

“Detidu sira mai halo julgamentu no depois halo julgamentu sai mai  faltae kontrolu husi ekipa sira detidu konsege halai, ita bele dehan katak julgamentu ne’e remata ona depois sira la konsege asegura detidu sira ne’ebé mak tuir prosesu julgamentu iha Tribunál,” Superintendente-Xefe Polísia, Nicolau F. da Costa  haktuir ba joranlista iha Salaun Apuramentu Nasionál Komisaun Nasionál ba Eleisaun (CNE, sigla portugés), Díli.

Komandante PNTL RAEOA afirma, nia simu informasaun hale’u tuku 19:00 Otl husi xefe investigasaun Kriminál Oé-cusse dehan katak detidu Câncio Mauno konsege halai sai husi ekipa ne’ebé mak lori mai halo julgamentu.

“Ha’u rona ida ne’e kalan ha’u orienta kedas ita nia ekipa, kontaktu tan bá xefe investigasaun Kriminál, ba iha J2 ne’ebé mak destaka iha Oé-cusse, parte Servisu Nasionál Intelijensia (SNI) atu kolabora buka no deteta detidu nia paradeiru,” Superintendente-Xefe Polísia, Nicolau F. da Costa hateten.

Nia esplika, to’o agora ekipa konjunta kontinua buka tuir prizioneiru Câncio Mauno ne’ebé halai husi prosesu justisa.

“Ita esforsu nafatin oinsá atu buka para koopera ho justisa, sé nia halai hanesan ne’e ita bele dehan katak nia pena ne’e bele todan liu. Ha’u nu’udar komandante Polísia Rejiaun Administrativa Espesial Oé-cusse apela ba ita hotu,  liuliu ba família sira ne’ebé mak subar detidu ne’e di’ak liu entrega an para kolabora justisa hodi hetan rezultadu final,” Komandante PNTL RAEOA informa.

Iha sorin seluk Ministru Justisa (MJ) Sergio de Jesus Fernandes da Costa Hornai hateten, nia parte simu ona informasaun husi  diretór nasionál servisu nasionál guarda prizionais nia fó ona orientasaun atu halo koordenasaun ho instituisaun estadu ninia hodi buka tuir.

“Ha’u simu ona informasaun husi ita-nia diretór nasionál servisu nasionál guarda prizionais ninia, informa mai ha’u katak prizioneiru ida halai bainhira prizioneiru ne’e atu ba hasoru julgamentu ida iha ne’ebá maibé nia halai sees tiha”, Ministru Justisa (MJ) Sergio de Jesus Fernandes da Costa Hornai, ba jornalista sira iha Ministériu Finansa (MF).

Ministru Justisa fó ona orientasaun atu halo kordenasaun ho instituisaun estadu ninia, atu haree oinsá mak atu halo dezmantelamentu hodi nune’e bele halo medida tuir lei haruka, para hetan fila fali prizioneiru refere.

“Se karik mak nia sei iha ita-nia territóriu nasionál konserteja ita sei halo visilansia halo servisu ho ita-nia aparelu sira ne’ebé mak iha atu bele intermus Institusional ita kordena para bele detekta nia paradeiru, no bele halo medida ba nia nune’e nia halo reintegrasaun fila fali ba ba servisu prizionais ninia”, Governante ne’e afirma.

Nia esplika, konserteja nia iha konsekuensia mak hanesan nia tenta atu halai husi nia responsabilidade entaun sei iha medida balun hanesan tuir sira-nia Leí kona-ba medida pena ninia, nia sei hetan iha futuru.

Ministru Justisa haktuir nia prizaun iha Becora, atu partisipa julgamentu iha TJPIO mak falta kontrolu nia halai sees.

“Dalaruma falta husi kuidadu karik tanba ne’e mak ema ne’e halai, nia kala iha ona intensaun. Maibé ha’u hanoin ha’u lalika loke la’o konkluzaun maibé husik prosesu averiguasaun ha’u instrui ona ba iha diretór jerál servisu prizionais ninia polítika justisa,  no mós diretór nasionál para atu bele halo lai averiguasaun relatóriu ida mai tanba sa mak ema ne’e halai, ita-nia responsabilidade hanusa tanba iha formasaun ida para atu hasoru kualkér rekluzu prizioneiru sira-ne’e”, Ministru Sergio Hornai Informa.

Jornalista: Juvinal Cabral dos Santos