SEATOU Prontu Bá Hatan iha Tribunál

Hatutan.com, (26 Maiu 2026) Díli-Sekretáriu Estadu Asuntu Toponimia no Organizasaun Urbana (SEATOU), Germano Santa Brites Dias prontu ba hatan iha Tribunál karik família  Eugenio Sarmento submeter ona keixa iha Ministériu Públiku (MP) hasoru nia asaun sira.

Lee Mós: Lansa Postajen “Bandalizmu” Ba SEATOU, Eugenio Sarmento Presta Deklarasaun iha Polísia

Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias. Foto/dok.

Sekretariu Estadu Asuntu Toponimia Organizasaun Urbana (SEATOU) Germano Santa Brites Dias  dehan, konsidera liafuan bandalizmu ka bandidu ne’ebé señór Eugenio Sarmento hasai ne’e ninian maibé husik SEATOU halo nia servisu.

“Sente la kontenti ho ami nia servisu nia ba Ministériu Públiku de’it, ha’u rona dehan katak nia ho nia família atu lori ba keixa, ami hein de’it,   lori ba, ami ba hatan ami nia sala”, Sekretariu Estadu Asuntu Toponimia Organizasaun Urbana (SEATOU) Germano Santa Brites Dias, informa ba jornalista sira iha JL World, Díli, Tersa (26/05/2026).

“Sasán sira ne’ebé mak ami foti agora dadauk, importante ami iha Númeru Uniku Krime (NUK) ona, ami lori ba Ministériu Públiku para presta deklarasaun para depois tau ba patrimomiu estadu kuandu nain la koopera,” SEATOU afirma.

Governante ne’e dehan, servisu ne’e la’ós ba SEATOU nia an, ba ema hotu, sidadaun hotu-hotu atu kompriende, tanba kalan ne’e ema atu deskansa, hakarak kontenti ba iha fatin ne’ebé mak apropriada.

“Sé atu halo ita nia uma privadu ba Bar ka diskoteka haree kondisaun sira ne’e para barullu ne’e labele impaktu ba viziñu sira seluk, ne’e labele halo ita nia kontenti”, nia tenik.

Nia haktuir, sasán sira prende ne’e dadaun iha SEATOU nia fatin para atu lori ba iha Ministériu Públiku.

“Ha’u sente katak funsionariu públiku ida kuandu atu halo vizita fatin ida tenke iha audensia la’ós sai husi Eskuadra ba buka SEATOU tanba kolega para ko’alia de’it, depois tama ba para foti de’it sasán sira ne’ebé mak ekipa SEATOU rai ne’e la iha etika”, Germano Santa Brites Dias hateten.

Nia haktuir, asuntu ida iha Sesta kalan (22/05/2026) ekipa  halo servisu ne’e primeiru liu mak bazeia ba Leí.Segundu mak bazeia ba keixa husi komunidade sira mak ita halo servisu iha kalan boot 10:00  to’o 02:00 Otl madrugada mós ita sei halo servisu”, SEATOU esplika.

Nia afirma, tanba ne’e mak keixa husi komunidade ne’e la’ós foin mak mai iha SEATOU mak foin ba gebrek, maibé mai bei-beik ona labele husik hela.

“Ita la’ós gebrek de’it ka foti sasán iha fatin Agua de Coco kampu demokrasia nia sorin, mais primeiru ne’e ita foti kedas husi bar ida iha Santa Cruz nian iha eskola Portugés nia sorin ne’e kedas, sasán sira ne’e ita foti hotu tanba iha kedas estrada ninin no barullu”, Germano Santa Brites hatutan.

Nia esplika, keixa ne’e mai husi komunidade sira ne’ebá, labarik sira toba la di’ak ema moras, entaun keixa ne’e mai dala barak ona halo patrolla ne’e kalan hira nia laran halo observasun, maluk sira ne’e haree hela maibé hanoin ne’e  sira mak di’ak liu ona ne’ebé sira uja tempu kalan ne’e hodi uja halo kontenti ba sira nia an.

“Maibé haluha tiha katak iha vizinu ruma ka iha fatin sira ne’e ema ruma sofre hela moras fuan, ka struk, labarik sira toba la di’ak ne’e sira la hanoin kona. Entaun ita halo operasaun ne’e iha Santa Cruz ita foti nain sira koopera, sira la ko’alia, segundu mak ita mai foti tan agora daudaun virál hela, maibé señór Eugenio Sarmento ita foti sasán nia la iha fatin, ne’e mós la’ós ninian no ha’u rona katak nia oan feto mak iha ne’ebá”, SEATOU haktuir.

Nia salienta, primeiru tenke hatene uma ne’e privadu, restaurasaun ka diskoteka tenke hatene uluk.

“Mais kuandu ami liu iha kurva barullu iha ne’e toka múzika, hemu, dansa entaun ita bá fokus ne’e ba matérial ida barullu ne’e ita la iha hanoin para atu hapara ema nia hemu sira ne’e, hemu ne’e normál ida-idak hemu iha nia fatin problema nmak ida barullu ne’e”, SEATOU Informa.

Nia dehan, tanba Leí ne’e fó dalan iha kalan tenke fó tempu ema deskansa iha kalan 10:00 Otl ne’e. Tanba Leí ne’e bandu nune’e uja Leí ne’e hodi haforsa servisu iha kalan.

“Ita la naran sobu ema nia sasán arbiru, informasaun ne’ebé mak nia foti ka hetan husi ne’ebé mak públika ne’e problema ho señór Eugenio Sarmento ninia bá, ha’u ho ekipa servisu hala’o ami nia servisu, ha’u ba ho polísia Eskuadra Nain Feto mak ba akompaña SEATOU hodi halo servisu”, Germano Santa Brites Dias tenik.

Nia salienta, Leí fó dalan ba SEATOU hodi hala’o nia servisu iha kalan redus volume konjunta iha tempu kalan.

“Kalan ita han, hemu iha estrada ninin ka fatin la seguru no la prepara fatin para diskoteka haklalak, kanta hakilar ita halo ema seluk deskansa la di’ak, depois ita ko’alia bara-barak fali”, SEATOU hatutan.

Tuir informasaun ne’ebé Hatutan.com asesu, foin lalais iha loron Sesta (22/05) ekipa konjunta ne’ebé lidera husi Sekretáriu Estadu Asuntu Toponimia Organizasaun Urbanas (SEATOU) Germano Santa Brites Dias, akompaña husi PNTL halo operasaun hodi prende ekipamentu live múzika ne’ebé organiza husi HENEIKEN iha loja Divaria área Santa Cruz, no kontinua kedas  hale’u tuku 11:30 Otl liu ekipa konjunta  tama diskoteka Agua de Coco ne’ebé lokaliza iha Formoza hodi foti ekipamentu múzika tanba hetan keixa husi komunidade balun.

Fó hanoin fali katak iha loron  Segunda (25/05) Eugenio Sarmento Presta Deklarasaun iha Polísia Nasionál Timor-Leste (PNTL) Eskuadra Nain Feto tanba keixa husi SEATOU bainhira Eugenio Sarmento nia postajen kona-ba atuasaun SEATOU karakter bandalizmu, nune’e nia mós hamutuk família iha planu atu kontra keixa ida ba iha Tribunál.

“Ami mós halo keixa ba Tribunál la’ós de’it bolu ha’u mai hatan iha polísia, la’ós ami mesak mak hatan ne’e lae, ami mós prepara tiha ona karta ba iha Ministériu Públiku (MP) tanba ita ne’e iha Leí”, Eugenio Sarmento hateten ba joranlista sira iha hafoin remata presta deklarasaun iha Eskuadra Nain Feto.

Eugenio rekoñese, nia sala mak la halo karta ida ba Sekretariu Estadu Asuntu Toponimia Organizasaun Urbanas (SEATOU), maibé públika informasaun iha pájina Facebook.

“Ha’u nia esperiénsia tinan 45 nia laran iha servisu, ita kuandu halo karta hanesan ne’e dalaruma mós SEATOU tempu la iha la lee entaun ita halo postajen iha Facebook ne’e la’ós atu odiu fali partikular ka saida. Ha’u orgullu señór SEATOU ema ida ne’ebé tegas halo buat hotu mais iha sala ita tenke hadia ida-ne’e mak ha’u nia objetivu,” Eugenio hateten.

Joranlista: Juvinal Cabral dos Santos

D