Deputadu David Mandati Husu Aplika Pena Forte Ba Autór Sira Importa Sasán Kontra Bandu

Hatutan.com, (28 Maiu 2026) Díli-Membru Komisaun B Parlamentu Nasionál (PN) ne’ebé trata asuntu Negósiu Estranjeiru,  Defeza no Seguransa, David Dias Ximenes “Mandati” afirma  aplika pena forte ba ema iresponsavel desvia selu taxa importa sasán kontra bandu mai teritóriu Nasionál Timor-Leste.

Lee Mós: PNTL Detein Suspeitu Na’in-tolu Importa Sasán Kontra Bandu

Autoridade Timor-Leste halo apreensaun ba sasán kontra bandu. Foto/Juvinal Cabral dos Santos

“Primeiru ne’e iresponsabilidade husi Timor-oan ita sira ne’ebé halo komérsiu negru ne’e, buat ne’e loloos labele akontese nu’udar Timor-oan, buat ida selu taxa ne’e obrigasaun husi Timor-oan sira ne’ebé hakarak halo sira nia negósiu sira ne’e atu ajuda ita nia rai ne’e ba oin,” Deputadu David Dias Ximenes “Mandati” ba jornalista sira iha resintu Parlamentu Nasionál (PN), Kinta (28/05/2026).

Deputadu Mandati hateten, taxa sira ne’e la’ós governu sira mak han mesak, taxa sira ne’e mai hanesan agora orsamentu jeral estadu ne’e, ida ne’e mak intensaun husi selu taxa ne’e.

“Timor-oan ne’ebé hatama sasán kontra bandu ne’e hanesan forma subersiva ida ne’ebé modula Penál ba nia ne’e tenke boot, porque nia kontra fali ita nia Estadu,”  David Mandati hateten.

Tuir nia, ida-ne’e bele mós dehan katak hahalok ne’e kontra estadu, ida-ne’e loloos labele maibé ha’u mós lahatene kaer duni iha fronteira ka tama liu mai mak kaer sé karik tama liu mai, tama husi ne’ebé”, Deputadu Mandati kestiona.

Nia afirma, sé tama husi fronteira entaun neglizensia ne’e iha fali servisu sira fronteira ninia, tenke haree ba gravidade situasaun ida-ne’e.

“Tama liu mai Tibar mak kaer ne’e problema iha ne’ebá, orsida iha investigasaun sei dezenvolve sira tama husi ne’ebé  ida-ne’e mak tenke deskobre,” Deputadu Mandati hateten.

Buat sira ne’e akontese tanba ema ida mantein nia pozisaun kleur, hanesan sira iha ne’ebá kleur kria visius tanba tentasaun ne’e barak halo ema haree ba osan, la haree ba nia profisáun maibé haree ba osan fasilidade.

Deputadu David Dias Ximenes “Mandati”.

“Ema sira negósiu ne’e mós gosta buat sira hanesan ne’e, ha’u fó osan hanesan ne’e o fasilita ha’u, buat sira ne’e akontese, sasán volume sira mós fó osan boot. Hanesan buat ida subornu sira ne’e mak halo para depois sasán kontra bandu ne’e to’o tiha ona Tibar mak ema   kaer fali ne’e,” David  Mandati preukupa.

Nia rekomenda, ema hotu hanoin rai Timor-Leste ne’e mak hetan independensia husu ba autoridade sira servisu iha fronteira labele aproveita interese privadu uja mentalidade subornu.

“Loloos ne’e pena ne’ebé forte, ita oho ema ida, mais ida ne’e oho ema barak aumesmu tempu oho estadu. Tanba aktu ida ne’e mós bele iha ona dalan atu lori liu Droga mai Timor-Leste, ne’e ema hatene ona sira nia dalan iha ona tanba kauza barak ne’e dalaruma sira tau hotu ba iha klaran tidak-munking ita haree hotu buat ne’e oinsá,” Membru Parlamentu komisaun B esplika.

Fó hanoin fali katak, Polísia Nasionál Timor-Leste (PNTL), Kuarta (27/05), detein suspeitu na’in-tolu ho naran inisiál AA, RD, no DA ne’ebé importa no transporta sasán kontra bandu, hanesan bebidas Cocacola kaixa-110, Sprite kaixa-13, Red Bull kaixa-13, Larutan Cap Kaki tiga kaixa-4, Milko karon-28, Pocari Sweat-11no seluk tan.

Informasaun ne’ebé Hatutan.com rekolla husi autoridade seguransa balun katak hale’u tuku 14:20 Otl, ekipa konjunta kompostu husi   Unidade Polísia Maritima (UPM),  N2 Komponente Naval FALINTIL-Forsa Defeza Timor-Leste (F-FDTL) kaptura suspeitu na’in-tolu hamutuk ho evidensia ba krime sasán kontra-bandu iha área Tibar, Munisípiu Liquiça.

Ekipa konjunta PNTL ho F-FDTL hapara kareta baskolante kor kinur ho xapa matrikula A.57.0XX iha área Tibar, Munisípiu Liquiça ne’ebé ba transporta sasan kontra bandu iha área Kosteira Palaka-Bobonaro mai Díli.

Ekipa konjunta bainhira hapara tiha transporte refere iha Tibar hamutuk ho evidénsia kompletu, no ekipa transporta evidensia refere ba kedas  Kuartel Jerál PNTL iha edifisiu Diresaun Servisu Investigasaun Kriminál (DSIK) hodi submete prosesu enkéritu no identifikasaun.

Hafoin ekipa entrega ba Diresaun Servisu Investigasaun Kriminal kontinua kedas submete ba prosesu flagrante-delitu, kazu ne’e prosesu ho NUK : 0199/26.PNSIC.

Observasun Hatutan.com Kinta (28/05/2026) Diresaun Servisu Investigasaun Kriminál tula sasán Kontra bandu no suspeitu na’in-tolu naran inisiál AA, RD, no DA   aprezenta ba iha Ministériu Públiku (MP) Maliana hodi submete ba primeiru interogatóriu.

 Jornalista: Juvinal Cabral dos Santos