Detidu Cancio Mauno Halai Lakon iha Tribunál Oé-Cusse Entrega An Ba PNTL

Hatutan.com, (28 Maiu 2026) Díli-Komandante Polisia Nasionál Timor-Leste (PNTL) Rejiaun Administrativa Espesial Oé-cusse Ambeno (RAEOA), Superintendente-Xefe Polísia, Nicolau F. Da Costa informa Kinta (28/05/2026) hele’u tuku 13:00 Otl, detidu  ida ho identidade Câncio Mauno entrega an hikas  ba autoridade seguransa iha nia rezidensia Bioni, Aldeia Makela, Suku Taiboko, Oé-Cusse hafoin halai lakon husi Tribunál Judisiál Primeira Instánsia Oé-Cusse (TJPIO).

Lee Mós: Detidu Ida Halai Lakon iha Tribunál Judisiál Primeira Instánsia Oé-Cusse

Detidu Câncio Mauno entrega an ba autoridade seguransa. Foto/Espesiál

Superintendente-Xefe Polísia, Nicolau F. da Costa via telefone ba Hatutan.com hateten, prizioneiru ka detidu  Câncio Mauno entrega an hikas ba ekipa konjunta  Servisu Intelejensia Polísia (SIP), J2 no Servisu Nasionál Intelejensia (SNI).

“Hale’u tuku 13:00 Otl ne’e detidu entrega an koopera di’ak, tanba nia durante ne’e nia halai sai husi guarda prizioneiru nia liman iha Tribunál Judisiál Primeira Intánsia Oé-Cusse (TJPIO). Komu nia durante loron hira nia laran iha li’ur, nia la augenta ho situasaun sira hanesan ne’e entaun nia hili desizaun intrega an diretamente ba ekipa konjunta,” Komandante Polísia Nasionál Timor-Leste (PNTL) RAEOA, Superintendente-Xefe Polísia, Nicolau F. da Costa informa.

Komandante PNTL RAEOA haktuir, agora daudaun detidu iha hela Komandu Rejiaun Administrativa Espesial Oe-cusse Ambeno (RAEOA) hein para entrega ba iha Ministériu Públiku (MP).

“Ne’ebé detidu agora dadaun iha ne’e hela ita hein para entrega ba investigasaun kontinua ninia servisu para hodi kontinua re-intrega fali ba iha Ministériu Públiku”, dehan Komandante PNTL RAEOA.

Fó hanoin fali katak Prizioneiru ka detidu  ida ho identidade Câncio Mauno, Sabádu (23/05/2026), hale’u tuku 18:00 Otl, halai lakon husi Tribunál Judisiál Primeira Intánsia Oé-Cusse (TJPIO) hafoin partisipa iha juglamentu.

Kronolojia husi Polísia Nasionál Timor-Leste (PNTL) Rejiaun Administrativu Oé-Cusse Ambeno (RAEOA) katak iha Sábadu ne’ebá Guarda Prizionál lori detidu Câncio Mauno mai submete ba julgamentu iha TJPIO, maibé depois juglamentu detidu ne’e hala’i tiha no Guarda Prizionál sira la hetan nia ain-fatin.

Jornalista: Juvinal Cabral dos Santos