Kazu “Rinha Costa” husi ICCTL Remete Ona Bá Ministériu Públiku

Hatutan.com, (12 Juñu 2026), Díli– Polísia Sientífika Investigasaun Kriminál (PCIC) remete ona kazu insultu no injuria ne’ebé deskonfia envolve husi membru balun husi Igreza Katólika Karismátika Timor-Leste (ICCTL) ba Ministériu Públiku (MP).

Lee Mós: Dirijente ICCTL Na’in-Rua Husu Deskulpa, PCIC Kontinua Remete Ba Ministériu Públiku

PCIC lori suspeitu nain-rua husi ICCTL ne’ebé deskonfia utiliza konta Facebook “Rinha Costa” ba hasoru Dom Virgílio Kardeál do Carmo da Silva, SDB iha Rezidensia Amu Bispu Arkidioseze Dili nian iha Lecidere, Díli, Sesta (29/05/2026). Foto/Dok.Juvinal Cabral dos Santos

Membru balu husi ICCTL deskonfia utiliza konta Facebook “Rinha Costa” halo insultu no injuria hasoru bispu no saserdote sira Igreja  Katóliku Timor-Leste, foin lalais ne’e.

Diretór Nasionál PCIC, Vicente Fernandes e Brito,   bá Hatutan.com  hafoin   partisipa iha lansamentu revista Ministériu Públiku, Sesta  (12/06/2026), informa rezultadu husi investigasaun  PCIC  nian, identifika indikasaun bá krime diskriminasaun relijiaun no krime seluk tan, ne’ebé agora tama ona iha prosesu legál, no nia  autoriza tiha ona investigador pikete atu remete autos prosesu ne’e bá Ministériu Públiku.

“Krime ne’e diskriminasaun relijiaun ho krime seluk ne’ebé ha’u la lembra  ona, maibé ha’u autoriza ona investigadór ne’ebé pikete bá kazu ne’e, remete kedas autos notísia bá Ministériu Públiku,” Diretór Nasionál PCIC Vicente Fernandes e Brito informa.

Atu kontinua investigasaun, PCIC  hein banhira   Ministériu Públiku delega  fila-fali prosesu bá PCIC, atu  nune’e  kontinua halo investigasaun téknika atu rekolla prova sira hotu, inklui rona deklarasaun husi suspeitu sira no kompleta  elementu prova sira seluk.

Direitor Nasionál PCIC Vicente Fernandes e Brito, afirma,  remesa kazu ne’e ba Ministériu Públiku halo ona ho imediatu, enkuantu PCIC hein orientasaun tuir mai husi autoridade judisiál atu kontinua prosesu investigasaun.

Iha loron 28  Maiu 2026, PCIC ho ekipa Servisu Nasionál  Intelijénsia (SNI) detein membru Igreja Katólika Karismatika Timor-Leste (ICCTL, sigla portugés)  na’in-rua ne’ebé deskonfia utiliza konta Facebook “Rinha Costa” hodi insulta no injúria bá Arsebispu Arkidiosese Metropolitana Díli, Dom Virgílio Kardeál do Carmo da Silva, SDB no Bispu Dioseze Baucau, Dom Leandro Mari Alves iha média sosial.

Informasaun ne’ebé Hatutan.com asesu husi fontes servisu sekreta,  konfirma katak  iha Kinta, 28 Maiu 2026, hale’u tuku 19:00 Otl, PCIC  hamutuk ho SNI detein suspeitu ne’ebé utiliza konta Facebook “Rinha Costa” hodi halo injúria no insulta ba Kardeál no Bispu sira.

Iha Sesta, 29 Maiu 2026, hale’u tuku 16:30 Otl,  PCIC   akompaña suspeitu  na’in-rua husi ICCTL lori ba rezidénsia Dom Virgílio Kardeál do Carmo da Silva, SDB   nian  iha Lecidere ho objetivu atu husu perdaun diretamente bá lider relijiozu sira ne’ebé hetan ofensa.

Jornalista: Marcelino Tomae