Metade Kokáina Grama 980,5 Lori Bá Teste iha Portugál Seidauk iha Rezultadu

Hatutan.com, (12 Juñu 2026), Díli— Metade droga ho tipu kokaína grama 980,5 ne’ebé halo teste iha portugál to’o agora seidauk iha rezultadu.

Matéria droga ho tipu kokaína ne’ebé MP sei halo destroisaun iha HNGV, Segunda 17 Novembru 2025. Foto/Espesiál

Prokuradór Jerál Repúblika  (PGR-sigla portugés), Nelson de Carvalho, Sesta (12/6/2026),  informa ba jornalista sira katak  droga restante ne’e grama 2,094 ho tipu kokaína Ministériu Públiku halo tiha destroisaun  dezde tinan kotuk iha Hospitál Nasionál Guuidu Valadares (HNGV).

“Sei ita boot sira lee jornál sira  ha’u fó sai tiha, restu ne’ebé uluk ita-boot sira  akompaña bá halo destroisaun iha HNGV, ida-ne’e restante sira maka ne’e, metade ne’ebé ita haruka  bá halo teste iha Portugál  to’o agora seidauk mai, ne’ebé ita haree tiha lai,”  PGR Nelson de Carvalho hateten.

PGR Nelson Carvalho seidauk fó serteza kona-bá rezultadu teste bá  droga  ne’ebé Ministériu Públiku Timor-Leste haruka bá teste iha Portugál.

Fó hanoin fali katak Informasuna ne’ebé Hatutan.com halibur husi fontes sira katak tanba kazu ne’e parte sira, liuliu autoridade polisiál sira la aprezenta suspeitu ka argiudu iha kazu droga ne’e, maka parte Ministériu Públiku  deside taka kazu ne’e no halo destroisaun ba prova materiál droga ho tipu kokaína grama 980,5 iha HNGV.

Iha Segunda, 17 Novembru 2025, Ministériu Públiku liuhosi  Gabinente  Sekretáriu Jerál  Prokuradór Jerál Repúblika (PGR-sigla portugés)  halo destroisaun bá  materiál droga ho tipu Kokaína hamutuk grama  2,094 (tuir lolos grama 980,5) iha Ospitál Nasionál Guido Valadares (HNGV), hale’u tuku 07:00 dadeer.

Matéria droga ho tipu kokaína  hamutuk  grama  2,094 asegura hela iha Gabinente  Sekretáriu Jerál  Prokuradór Jerál Repúblika nu’udár rezultadu husi kazu kriminál trafíku droga ne’ebé prende husi autoridade seguransa iha  tinan sira  liubá, no agora prosesu judisiál kompletu ona tuir prosedimentu legal, nune’e destroisaun presiza halo tuir lei.

Prokuradora Lídia Soares ne’ebé akompañia prosesu destruisaun iha Ospitál Nasionál Guido Valadares (HNGV), haktuir katak droga ne’e tama Timor-Leste ho ajénsia DHL atraves aviaun komersiál Citilink  ho grama 2.0094, depois  amostra uitoan  hela de’it kilograma 2.094 ne’ebé maka halo destroisaun.

“Destruisaun ne’e ho desizaun judisiál  bazeia bá  pepidu Ministériu Públiku nian  deklara lakon a-favor bá Estadu, tanba sasán la bele rai kleur tenke halo destruisaun,” Prokuradóra Lídia Soares hateten.

Nia esplika, droga ne’e antes tama mai  ho tipiu kokaína, maibé depois   teste  bá laboratóriu  ho konfirmasaun katak ninia kontein  tipu loloos ne’e ketanína,  hanesan tipu droga ne’ebé tama    iha lei droga nian númeiru 2/2007 anexu  iha aliña 7 ne’ebé konsidera hensan tipu droga. Uluk  halo aprensaun  1 ons de’it hetan $100-resin, kada grama 300 resin.

Iha fatin  hanesan Adjunta Prokuradór Jerál Repúblika Angelina Joaninha Saldanha, agaradese  bá parte HNGV ne’ebé maka sempre  ajuda ba objetu krime  dorga ne’ebé  atu halo teste laboratóriu.

“Ita mós agradese bá Polísia Sientifika Investigasaun Kriminál (PCIC) ho Polísia Nasionál Servisu Kriminál ne’ebé fasilita hodi  halo  destroisaun ba droga ida-ne’e, agradese bá parte hotu- ne’ebé partisipa iha proseu ida-ne’e, nune’e ita deskobre  krime ne’e nia objetu,”  Angelina Joaninha Saldanh hateten.

Iha relatóriu Autoridade Aduaneira, Diresaun Nasionál Operasaun, Departametu Alfándega Aeroportu Internasionál Preizdente Nicolau Lobato ne’ebé Hatutan.com asesa, haktuir  nia kronolojia katak  droga tipu kokaína ne’e orijen husi Fransa ho númeri tracking 391202546897 ho nia rute: Fransa-Singapura- Denpasar-Bali- Díli.

Dokumentus: Air waybill, Tracking number 391202546897, preforma invoice, DAU ho numeru C. 1921 kanal mean, data rejisto DAU, loron  21fulan-Agostu  tinan 2025.

Merkaduria refere data tracking loron 21 fulanJullu tinan 2025 data submete DAU mai ekipa kargu loron 25 fulan-Agostu tinan2025.

Relatóriu husi  Autoridade Aduaneira, Diresaun Nasionál Operasaun, Departametu Alfándega Aeroportu Internasionál Preizdente Nicolau Lobato revela mós matéria droga ho tipu kokáina ne’e exportador husi FUJIGANG, 13 RUE DE LA GARE FONTENAY-SOUS-BOIS, 9494120 FR-FRANCE no nia destináriu/Consignee ba Timoroan ida ho naran inisiál SdCA, hela fatin Fatuhada, Postu Administrativu  Dom. Aleixo, Díli, no TIN 3959358, Expedisi FEDEX, Declarante Everise Warehousing and Transport, Finansiál  ho indeitade inisiál DO  ho  SdCA. 

Kronolojia

Haktuir husi Relatóriu   Autoridade Aduaneira, Diresaun Nasionál Operasaun, Departametu Alfándega Aeroportu Internasionál Preizdente Nicolau Lobato, hanesan tuir mai ne’e;

Iha Segunda-feira, 25 fulan-Agostu  tinan 2025, oras 10:09 Ekipa kargu AA Aeroportu IPNL halo scan ba merkaduria refere, rezultadu husi scan hatudu figura balu ne’ebe presiza halo inspesaun fiziku mais de tallu.

Iha prosesu inspesaun fizika ekipa hetan pasta mamuk laptop  rua , laiha Laptop iha laran, ekipa hato`o kedas informasaun ba Xefe Departamentu atu mai haree objetu ne’ebé deskonfia iha risku boot.

Momentu ne’e kedas ekipa Kargu ho Xefe Departamentu foti desizaun hodi kua “kemasan” ne’ebé falun pasta leptop mamuk rua refere no  nia rejultadu hetan po’o ou (bubuk) kristal balun iha kemasan ne’e nia laran.

Ekipa kargu ho Xefe Departamentu   Autoridade Aaduaneira (AA) halo kedas teste dala-rua, uza “NICK TEST”  no hetan rezultadu pozitivu kokaína.

Momentu halo inspesaun ba merkadoria refere,  Staff Agensia Fedex mak reprejenta hanesan nain hodi hambrik iha  Ekipa Kargu nia oin hodi loke merkadoria no halo teste ba merkadoria .

Hafoin  teste hetan ona rejultadu pozitivu kokaína, Xefe Departamentu  AA Aeroportu passa kedas informasaun ba  Komisáriu AA no mós  Diretór Nasional de Operasaun AA.

Komissariu AA halo kordenasaun ho PCIC iha tuku 12:00 pm, ekipa PCIC to’o iha edifício kargo AA Aeroportu Internasional Prezidente Nicolau Lobato (AIPNL) hodi halo koordenasaun entre Komisáriu AA, Diretór Nasional Operasaun (DNO), Diretór Jestaun de Risku, Xefe departamento AA Aeroportu Internasionál Prezidente Nicolau Lobato (AIPNL), Xefe Anti Fraude no PCIC.

Equipa AA, Agencia FEDEX hamutuk ho PCIC hodi merkaduria refere ba edificiu PCIC. Iha oras 13:02 Otl,  ekipa AA ho PCIC molok atu halao teste ba merkaduria refere, premeiru sei tetu hodi hatene nia todan ingeral ho nia rezultadu;

• Todan kaixa 1 =   483,0 gram kakaina
• Todan kaixa No. 2 = 497,5 gram kokaina
• Total kaixa rua ne`e hetan 980,5 gram kokaína

Depois halo teste no tetu hotu merkaduria refere halo termu de entrega ba PCIC.

Jornalista: Marcelino Tomae