Projetu Konstrusaun Kuartel Jerál PNTL Paradu Hela Tanba Enfrenta Forsa Mayor Rua

Hatutan.com, (16 Juñu 2026), Díli-Projetu konstrusaun Kuartel Jerál Polísia Nasionál Timor-Leste (KJ-PNTL) paradu hela tanba enfrenta forsa mayor/force majeure rua.  

Kuadru avizu projetu konstrusaun Kuartel Jerál PNTL. Foto/Juvinal Cabral dos Santos

Forsa mayor/force majeure rua ne’e mak hanesan empreza internasionál Shanghai Construction Group Co., Ltd ne’ebé ezekuta obra ne’e nia kontratu mate ona no forsa mayor seluk mak Tribunal de Constas seiduak fó vistu hodi hein hela justifikasaun husi parte relevante sira kona-bá proposta empreza nian husu tan orsamentu adisionál 20%.

Projetu ne’e ho valór  kontratu inisiál $13,228,909.78 ka kuaze  millaun $13,2 no tuir kontratu tenke temrina iha fulan-Setembru 2027, maibé to’o agora paradu no la hatudu progrsus ne’ebé di’ak iha terrenu.

“Husi Tribunal de Contas seidauk hasai emisaun ne’e, tanba seidauk iha vistu prosesu ne’e agora la’o iha Konsellu Administrasaun Fundu Infrastrutura (KAFI). Planeamentu PNTL ninian servisu nafatin hamutuk ho tékniku sira husi Ministeriu Interiór (MI) no mós husi KAFI para halo justifikasaun bá iha Tribunál de Consta, iha semana kotuk, halo tiha ona komunikasaun formál balun bá iha Tribunal de Contas,”  Komandante Administrasaun PNTL, Komisáriu Asistente Polísia Arquimino Ramos informa ba jornalista sira iha Ministru Interiór, Tersa (16/06/2026).

Komisáriu Asistente Polísia Arquimino Ramos hateten, bainhira hetan tiha informasaun lubuk ida,  justifikasaun ne’e ba tiha, hein katak Tribunal de Contas aseita ona atu kontinua o konstrusaun, maibé ne’e kompeténsia gabinete Ministru Interiór ninian.

“Konstrusaun sei hein hela Tribunal de Contas tanba iha razaun rua trivunal de Consta  kestiona, maka  ida justifikasaun kona-bá tanba saida mak aumenta ba orsamentu 20%  husi totál orsamentu ba konstrusaun Kuartel Jerál PNTL. Ida seluk mak  kontratu ba kompañia ne’e mate tiha ona iha tinan 2021, tanba ne’e mak presiza iha justifikasaun para Tribunal de Consta bele aseita,” Komisáriu Asistente Polísia Arquimino Ramos esplika.

Komadante Administrasaun PNTL ne’e hatutan obras seidauk la’o sei paradu hela, hein desizaun husi Tribunál de Contas.

Iha fatin hanesan Segundu Komandante Jerál PNTL, Komisária Assistente Polísia Natercia Eufrasia Soares Martins, hateten, kondisaun Kuartel Jeáal PNTL ne’ebe agora dadaun uza nee nakfera hotu ona no la  seguru atu ema servisu iha okos.

“Kuartel Jerál ida agora polísia sira uza ne’e tinan hira ona, ita haree nia kondisaun, nia nakfera tiha depois ita lori buat ida plamer ne’e taka tiha ida nakfera ne’e para taka ida nakfera sira iha laran ne’e, ne’e risku boot ba iha polísia,” Komisária Assistente Polísia Natercia Eufrasia Soares Martins hateten.

Nia espera katak ho lideransa exelensia Ministru Interiór nia hanoin di’ak ba polísia oinsá mak atu bele kria fasilidade ida ne’ebé mak  dignu no mós para nune’e fasilita polísia sira atu halo servisu no konsentra ba servisu seguransa ba komunidade sira.

Governu Timor-Leste liuhusi Ministériu Interior hahú ona projetu konstrusaun foun ba kuartel Jerál PNTL iha Caicoli, ne’ebé tuir kontratu atu termina iha tinan rua nia laran iha fulan-Setembru 2027.

Bazeia ba dadus kontratu ICB/036/MI-2017, konstrusaun edifísiu Kuartel Jerál PNTL nian ne’e sei hala’o durante loron 730 ka tinan rua, hahú husi fulan-Outubru 2025 to’o fulan-Setembru 2027.

Parte konsultóriu nian, kompañia lokál Gihon Lda Timor-Leste serbisu hamutuk ho PT. Wanukarsa Mega Cita husi Indonézia iha sistema joint venture. Kompañia rua ne’e responsavel ba dizeñu edifísiu no mós supervizaun obra nian durante konstrusaun.

 Jornalista: Juvinal Cabral dos Santos